Саво’ ириян’ тэвась тоходанва по’ ямбан манзаравы’’ ӈацекына’’ ныланавась’ тарпыд’. Пыдо’ таӈы няхар’’ ирий ямбан нерня’ тоходанвандо’ е’’эмня ныхыдамдо’ ма’’лабгу’’. Маркана санаторной школава’ таня’’, тарця мякана округна ӈацекы’’ тоходана’’. Тикы нямна мань’ тохолкода Юлия Ледкова няюв’ лаханамась.

Ледкова: - Мань’ санаторной школахана малясидя ю’’ няхар’’ по’’ манзарам’. Тамальӈгы’ похо’’на ӈацекына ӈоб’ ӈокаць,самляӈг ю’’ няхар’’ ӈацекысь. Тубдиспансеркана ханяӈына’’ тоходана’’, ӈанина’’ школанана мэ’’. Хаӈгурта’’ ӈацекы’’ няюв’ манзарава’’, хануй’’ ӈацекы’’  тохолабива’’. Сидя ю’’ няхар’’ луца’’ вадавна манзь - тубинфекцированной ӈацекэва’’, тамна ю’’ ӈацекы’’  тубконтактхана мэбэй’’.

Тамна тюку  тоходанва’ поход’ школаханана вэба ирийхад’ хануй’’ ӈацекы’’, хуний  ӈобӈгэв’’ едецеты’’ тоходанаць. Тарця ӈацекы’’ тоходанва по’ ямбан ӈока’’ едэрцеты’’. Хануй’’ ӈацекы’’ няюв манзарава’’, тикахад’ тоходанва’ хавна  ӈацекына’’ савумдабидо’. Тикахад’ хуркари’’ саву серу’’ пыдо’ няюв’ сертабасьтыва’’, ӈобкана ныланасьтыва’’. Тоходанва по’ ямбан минрена программава ӈарка’’ ӈэсьты’’. Ӈацекына’’ бассейнан’ ядэласьтына’’, хуркари’’ секцияха’’на мэсьты’’. Сава ныланава яляхана пэдаран’ тохолкодито’, воспитательто’ няюв’ ядэрцеты’’, таняна едейкольсьты’’ сыра’ мальӈгана, сянакосьты’’. Тамна  ӈацекына’’ «Красной крестан’» ядэласьтына’’, няхар’’ ирий ямбан таняна савумдабсетыдо’. Ӈацекы’’ саць мэнесетыдо’ таняюв’ ядэрць, маймбасьты’’. Нибнандо’ таня хань’’, ярцеты’’, идо’ вомзьты’’. Хонаркосьты’’:  ӈамгэсь’ бассейнан’ нива’’ мий’’, ӈамгэ’ «Красной крестан’» нива’ хань’’?! Хаӈгурмандо’ мальӈгана нисьтына’’ ханяхарт’ ядэла’’.

Корр: Ханяхад’ турта’’ ӈацекыда’’, хурка  ӈэсыхыт’?

- Маня’’ ӈацекына хуркари’’ ӈэсыхыт’ турцеты’’. Тюку по’ Нельмин Носхад’ ӈокаць, тикахад’ Краснойхад’ таня’’, Каратайкахад’ таняць’’, Карахад, Варнекхад’ таняць’’, Индигахад’ ӈокаць. Маркад’ турта’’ ӈацекына’’ ӈани’’ тянё ни’’ӈа’’ тюку’ по.

Корр: Теда таӈы нюртей ирий мэ’’ӈава’’, ӈацекыда’’ маля мякандо’ хэбэй’’?  Ӈамгахэна’’ пыдо’ хаяць,ся’’ня?

- Тюку по’ мал’’ ӈацекына’’ вертолётхана ханэйдось. Нюртей ӈацекына’’маля ты’’ ниць ирийна сиднтетимдей’яӈганя толыркана Индиган’ хаяць, тикы яляхана Пылемецан’ ӈацекына ханэйдось. Ӈанина’’ пунарка хаяць. Мал’’ ӈацекы’’ ёльцьханандо’ ханэйдось, тоходанвамдо’ ёльцесь маймбась мякандо’ хаяць. Небянандо’, нисянадо’, нидо’ сиддо’ ядтабиць.