Ихина сомбой юн’ округна’’ этнокультурной центрхад намдаваць.

Тюку ваеравы по’ творческой сезонхана «Ханийко» ненэцие’’ ӈацекы’’ группахана манзарана’’ ӈацекы’’ ӈокавна манзараць. Теда нылана’’, нерня’ манзарава’’, тоходанава’’ е’’эмня ныхыдамдо’ ма’’ламби’’. Ӈэрёйӈэ’ хэсь ӈани’’ манзаяхато’ лапцеӈгуд.

Ӈацекы’’ нылана’’, тикы поӈгана «Ханийко» манзаравам’ нерня’ минрена Светлана Вокуева Новосибирск’ маркана ваеравы Всероссийской творческой конкурсан’ «Традиции игры и игрушки народов России» манзаяндо’ «Хой’ тер’’ ӈацекы’’» тарем’ нюмдевы видеоролик ӈэдарась.

Таняна ӈацекына’’ Лауреат 3 степени нювм’ ня’’ма’’.

Тамбир’ ӈарка конкурсан’ ӈока манзая’’ тэвравыць, ӈокханда 1319 манзая’’, РФ’ 66 регионхат’’, тамна ӈани’’ я’ тер’’ коллектив’’ Беларусьхад, Казахстанхад, Приднестровской Молдавской Респуб­ликахад манзаядо’ ӈэдаравыць.

«Видеоработа» номинацияхана жюри 43 манзаям’ манэ’’cарӈась, тарця номинацияхана «Ханийкова’’» – Лауреатӈэ 3 степени хая.

Этнографической программаханандо’ маня’’ ӈацекына’’ коллектив’ хари’’ тэнздо’- ненэцие’’ сянакови’’ манэ’’лабтаць, тамна невхы’ хынабц, тены’’ по’’ сё’’ мэ’’ӈаць.

«Ханийко» манзая’ нерня’ тарпы’’, ӈацекына’’ пэдава’’!

Тюку яля’ хари’’ вадам’ минренаха’, «Ханийкохона» манзаранаха’, ӈацекы’’ манзаям’ нерня’ минренан’, ӈацекы’’ мяд’ терха’ ихид’ минда вади’’ хэтбива’’.

Пыдара’’ сидда’’ сцена’ нина’’ пили’’ ӈатева’’, тамна пон’ сеюна’’ манзаида’ маймбтембая, ӈоб’’ нерня’ тю’’ури миӈада’’!