Округханана тыбэртя’’ ненэциена нянэювна мюсертина’’, невхы по’’ тотрев’ иламдо’ минрена’’ хибярина тамна Ӈарка яхана, Канинхана иле’’, таняна варёмдо’ мэць манзара’’. Нюдо’ хэвханандо вадамби’’, харто’ вадамдо’ мэ’’ӈа’’, паӈгудо’ ханяд’ мимам’ тенева’’.

СПК «Восход», «Канин», «Ерв», «Харп», «Рассвет Севера», «Дружбы народов», «Путь Ильича», «Ямб’ тохона» ненэциена тамна мяд’ терсавэй мюсерӈа’’. Хасава’’ тыдо’ пэрӈа’’, не’’ мяд’ манзаям’ минре’’, нюдо’ нисянато’, небянато’ хэвхана школан’ хэвандо’ ӈэсонд вадюдана’’. Вындер’’ ӈацекы’’ нюдякодандо’ ты’ илм’ маниедо’, харто’ ямдо’ мэнесь вадюдана’’. Тарем’ ӈэбнанда нив’ тара’’. Ханзер’’ нянэй ненэць’ ӈопойӈэ’ мякана илеӈгу? Хибя’’ мяд’ манзаяхана тыбэртям’ нядабаӈгуда? Ӈацекы’’ теда хоян’ нибнандо’ тэвор’’, хибя’’ по’’ ваерась тына’’ пэрта’’? Тэси’’ хаёбнана’’ хурка ненэця’’ма’’ ӈэӈгува’’.

Ӈодьбянда тыбэрма’’ сер’ тю’’ури и’’илбась нив’ тара’’. Тарця серкана хойхана мюсерта’’ нина’’ ӈод харто’ вадамдо’ мэпнандо’. Ханзер’’ пыдо’ иламдо’ маниеван’ харвадо’, тад’ нерня тэхэна манзарава ханзер’’ минднакы. Нянэй ненэця’ илева тэхэт’ нив’ пере’’.

Пилю’’ ирийхана ханярина’’ илена’’, хусувэй выӈгана тыдо’ пэртя’’ хибярина ӈарка ялямдо’ мэ’’манзь ма’’люрта’’. По’ ямбан манзаравахат’ тянембёвна таӈгалць, хойхана манзарана’’, илена’’ нина’’ сывы мюсерць яхато’ мюсевандо’ нерцю нидо’ манэ’’манзь, ӈарка ялям’ ӈобкана мэ’’манзь’ таславы яхандо’ ма’’лаӈгуд’. Маркад’ хоян’ тиртя’’ ӈано’’ тэворта’’, хой’ илӈгана тарана’’ ӈавори’’ тэвраӈгу’’. Хынокад’, тарана’’ хибярина ӈод’ хэбидя яля’ ед хамандавы’’ программыдо’ тэвраӈгу’’. Хойхана ма’’лась хуркари’’ сянакова’’ ваераӈгу’’. Ненэця’’ поӈгнандо’ пирдырта’’, сямянд’ ныхытидо’ нюмдеӈгу’’. Округханана хусувэй по’ ты’ ялян’ тэвась, сямянд’ сававна манзаравы’’ СПК, бригады’’, тыдо’ ив’ ер пэрмы’’ ненэцие’’ нюмдеӈгу’’. Пыдо’ манзаравандо’ ед еся’’ няд’’ми’’ ня’’амӈгу’’. Похона тыбэртя’’ нина’’ ӈопой ялян’ ныланавась ма’’ласьтыд’. Ӈодьбяндо’ тарця ялядо’ саваривна ваерабнана тара. Сававна нылась, ӈока’’ ихид’ миндя вади’’ намдась, нерня манзаравидо’ ив’ер таслась нина’’ манзаидо’ пэрць хаюда’’. Хасава’’ тэхэто’ тэвӈгуд’, не’’ ӈахэт’ минрена’’ серудо’ пяӈгу’’. Ӈаркамбой ӈацекы’’ тоходанвась ӈэдалаӈгуд’.

Хойхана мюсерта’’ ненэциена илевадо’ тарця. Ӈокаюв’ хибярина харвась’ хойхана иле’’, харвась манзара’’. Нюдо’ ӈод хардахана тоходанва по’ ямбан илесь ӈатенасьты’’: ся’’ня ӈани’ мякандо’ ӈэдалаӈгуд’, тыдо’ манэ’’та’’.

Ты’ ялям’ мэ’’манзь округханана тюку по’ маля сиднтет ю’’ няхарамдэймэвна ма’’лаӈгуна’’. Тад’ нерня ӈод, тарця ялява пилибт’ таняя’’. Хойхана мюсерта’’ хибярина ӈокамданая’’, не’’ харвась мякана илея’’, хасави’’ нядабада таняя’’. Хусувэй, хой’ илм’ мэта хибярива ханзоць’ илевамда мэ’’ӈамда’’. Илеванда, манзараванда е’’эмня хусувэй ӈамгэда тэворӈая.