Маня’’ яханана «Илебц» нюбета театрава хибя’’ нидо’ тенева’’. Ненэцие’’ театр’ яханана сидя юд’ мян по’’ ямбан хари’’ манзаямда манэ’’лабтамби. Таняна сянакода’’ хибярина малӈэ’ харто’ вадамдо’ мэ’’ӈа’’, харто’ культурамдо’ тенева’’, паӈгудо’ тенена’’.

Хусувэй хэбидя яляхана театрхана сянакода’’ нина’’ масьтевы’’ манзаи’’ маниесьтына’’. Тикы’ хавна таняна сянакода’’ нина’’ ӈокавна округмана ӈэдалёрцеты’’, ӈани’ ян’ тэвормадо’ танесеты’’. Пыдо’ нядандо’ нянэй ненэця’’ таневам’ я’ сяр нина’’ илена’’ ӈани’ тенз’ хибяри’’ теневадо’. Пыдо’ маня’’ вадава намдурӈаць, ненэцие’’ хынс’ тенева. Ваеравы та’ ямбан театрхана мэна’’ нина’’ манзаямдо’ нидось хаембю’’, ӈэдалёрӈаць. Тарем’, пилю’’ ирийна нюртей’’ яля’’ мальӈгана «Илебц» театрхана сянакода’’ нина’’ Венгриян’ ӈэдалёрӈаць. Тикы яхана финно-угорский тензхад’ перена’’ хуркари’’ тенз’ мэта ненэця’’ ма’’люрӈаць. Венгрия’ яхана «Финноугориям’» нюбета международной фестиваль’ манзарась. Тикы яхана тарця ӈарка ма’’лёвам’ ханярид’ товы’’ хибяри’’ манзаи’’ манэ’’ма’’ е’’эмня маля няхарамдэймэвна хамадаць. Тарця фестивалян’ Ненэцие’’ округхад’ «Илебц» театрава ядэрӈась. Финно-угорский тензхад’ перена’’ хибяри’’ яндат’ товыць, Мордовия яхад’ «Умарина» ансамбль, Марий Эл яхад’ сидя коллективха’ фольклорно-этнографический ансамбль «Марий памаш» нябиюм’ «Морко кундем» вокально-инструментальный ансамбль, Ӈысма республикахад’ тюку’ мэвахана «Ухтинский сувенир» ансамбль музыки и песни товысь, ненэцие’’ яхад’ ненэцие’’ самодеятельный теарт «Илебц». Сян’’ яля’’ ямбан товы’’ коллектив’’ харто’ программыдо’ манэ’’лабтамбиць. Венгрияхана илена’’ хибяри’’ яндат’ товы’’ ненэцие’’ культурам’ манэ’’ӈаць. Товы’’ хибяри’’ тамна ӈопой паской ям’ торомдаць.

Тюку’ мэвахана маня’’ нина’’ ненэцие’’ тюнтавам’ , тикахад’ «Самбдава» манзаямдо’ манэ’’лабтаць. Ханярина ненэцие’’ яхад’ товы’’ мядонди’’ сававна ядабтамбидось. Нина’’ сава ихиня мякандо’ тэвыдаць. Нерняна тамна ӈэдалёрмидо’ танеӈгу’’. Театрхана сянакода’’ нина’’ тянембёвна нылась ӈани’’ ма’’люрць пяӈгудо’, едэй манзаи’’ масьтебгу’’.