Округханана иленаӈэ’ ты’’ ялява мадаваць. Тарця ӈарка ялям’ хусувэй по’ хусувэй выӈгана мюсерта’’ ненэциена мэцьтыдо’. «Ямб то» няна тарця ялям’ саць тарана яляӈэ’ мэ’’ӈадо, тикы яляхана хой’ тер’’ нина’’ варёмдо’ мэць ныланасьты. Тюку по’ таняюв Роза Ивановна Канюкова нита’’ няюв ӈэдалёрӈась. Таняна мэ’’мида няна’’ тэврэйдась.

Пилю ирийхана 5-6 яляха”на «Ямб то» община’ еремяманзь. Пудана мэва таняна юд по’ тяхана Вылка’, Тайбари ӈэсыхына мэманзь. Теда’ Ӈокатэтта” ӈэсын’ еремядм’. Ты ялян’. Те”ны Ӈарка Хэбидя ялу ханзер” мэцьтыдо? Нерня ӈаркта” вадидо’ мэцьты”.

Няръяна Маркад, Амдермахад тона” лаханаць. Тадькэд Мань лаханамась, Вадин тарцяць:

Ямбтондер”, ӈани” торова!

Вертолётхана маня” това”.

Та’ ерм’ – Ты ялям’ саць

Сававна мал’ мэтава”.

«Ханебцёна’» не” хынота”ма”,

Пушкин’ вадаком’ мэта”ма”.

Пыдара”, выӈгана иленаӈэсь,

Тыбэртяӈэсь, мюсенаӈэсь,

Пирдырць сянакодада”ма.

Ӈармбой неда”, пирибтякуда”

Пирензёда”, Та ерт’ хамекода”.

Ӈадьбя”нанда со” мядондава”.

Теда’ ӈани” нермбэртида”

Ӈокатэтта Федорла”, Вылкида”

Тайбарида”, Лаптандерда”

Няръяна Маркад тона” ня”

Ивъер” лахарё мэта”.

Ӈока саву”лана вадам’

Яля’ ямбан’ намдурта”.

Ненэсянда ӈо” маркад тона” не” ӈокавна хыно”ӈаць. Сёёта нехэвына” – Федосья Семёновна Кауц (ӈавнанда Косковась) няби Помылева Анастасия Аристарховна (ӈавнандаТалеевась). «Ябта Саля’ ерв ню» сюдбабцм’, А.С.Пушкин’ золот халяко’ нямна ӈэда вадаком’ манэ”лабтава мальӈгана мунзьда сырта хибяри яӈгованбясь. Тэ”элтаӈгода” ӈадимзеты” (сюдбабц мальӈгана). Писензеты” пухуця” ва”леро маниева мальӈгана. Ӈани ханяӈэхэ”на ӈобнзер” Ябта Саля ерв’ нюм хонрамба тёреласетыд”. «Ханебцё» фольклорной группа манэ”лабтяро” сата”евна мал петиндорӈаць.

Амдэрма’ терхав” ӈобтарем я”авлыць, инструментальной ансамбльм вынд’ тэвравыць. Ӈокавна яӈгэрӈаць, Амдерма’ нямна, Няръяна Мар’ нямна, тамна ӈаниндэс яӈгэбц. Вы’ нямна Алексей Пичков’, Прокопий Явтысой’ стих” толабиць.

Ӈобтикы яляхана Та ерт’ – Ты ялян’ тобэй” ямбтондерад пирдырць пядо’. Сямянд ӈаха’ Тайбарей Петр Ильич, Ламдо Клавдия Николаевна санарць мел”ха’. Хано” нимня санарма мальӈгана Соболев Степан Яковлевич сямянхат ӈока ханм’ пирда”ле. Тароць ӈока ӈацьмбой ненэць’ таро”ӈась. Сямянхат ныхытадо’ Соболев Иван Яковлевич ӈэвы. Тубкам’ моёпада” поӈгана сямянхат мэетадо’ Ӈокатэтта Федор Григорьевич няби Тайбарей Лиза ӈэвы. Тынзяӈгана Тайбарей Михаил Ильич тамна Тайбарей Александра ня’ мел”мана ярколаӈаха’. Сюрберкава Соболев Семен Яковлевич Анна ненянда ня’ мерець сюрберӈаха’.

Няби яляхана тэхэ”на пирдырӈаць. Пирдырта ӈэдалёдар ӈокась. Сенений ватонито”омна нито’ пумна хэсьты’. Маркавана мал’ ӈобкана ӈэдаласетыд”. Няхахэй халятана то хэвхана, Саля Пэ’ са”нюй явна пирдыць сибицярка. Сямянхат мер” Соболев Семен, Тайбарей Михаил, Соболева Анна сямянхат мерець ӈэдалыць.

Нябимдей мэвахана Нензяминдямда танета мэць, пелеямда нявота мэць сямянхат мел”манна, сямянхат мер” Соболев Иван Яковлевич Тось.

Ты ялям’ сававна мэць Ӈэрм’ выӈгы паӈго мэта” манзаи пэрти” илени” (КМНС) управления’-манзарана” нисядом” няда”. Талеев Сергей Александрович «Ямб тон’» ӈэдарабэйӈэсь ивъер” манзарась. Ӈока ӈамгэм’ вынд’ тэврась. Хусувэй мяд’ хэвхана флаг лабанась, ӈоб” мя” банэркана паскоймдевысь. Киселёв Сергей Дмитриевич ня’ выӈгы хибяри” ня’ ты пэрма нямна, выӈгана тарана’ ӈаво’ нямна лаханакурӈаханзь.

Хибяри” малмбоё Та ерм’ – Ты ялям’ сававна мэ”ӈадо’. «Ямбтондер”» харто’ яханандо’ ӈэто’ ниня мэёвна ну”.

Роза Канюкова падвы