Тюку ирий’ сидя юдимдей яляхана округна’’ этнокультурной центрхана «Мел’ не’’» манзая’’ выставка’’ нэяць.

Тарця клуб’ яханана’’ манзаямда 2008 поход минреда. Таӈок по’’ ямбан’ ӈудидо’ мэта’’ не’’ ӈобкана ма’’люрць манзара’’, ненэцие’’ искусством’ торомдаби’’. Тюкумэвахана хамадавы выставкахана ненэця’’ ембдяр’’ мэта’’ ӈухуко’’ манэ’’лабтамби’’. Клубхана сэдорана’’ не’’ сэдвы’’ ӈухуко’’.

– Ӈухуко’’ ӈацекэхэна’’, нехэна’’ мэкад’ ӈэсеты. Тарем’ ненэӈг’’ ирийхана центр’ народного декоративно-прикладного творчества’ мякнана’’ ӈухуко’’ онлайн-выставкам’ сертамбиваць, – тарця вади’’ этнокультурной центрхана манзарана Татьяна Адаменко хэтамби. – Теда’ тамна ӈопой выставкам’ нэва’’. «Мел’’ нем’» нюбета народной клубва’’ таня, нерм’ пэртядо’ Маргарита Латышева. Пыда ӈобкана манзарана’’ нита’’ ня’ ненэцие’ традиционной культурам’ тю’’у пэрӈадо’. Хуркари’’ манзаи’’ сэдаби’’. Ӈули’’ нерде’ тохолабидонзь ханзер’’ паны’’, мальця’’, сава’’, туця’’, пива’’ сэдабада. Тикахад сэдорась тоходанаць. Тедахова’’ таняна ма’’люрта’’ не’’ мал’’ мел’’мана сэдорана’’. Харто’ сэдвы’’ манзаидо’ хуркари’’ фестивалька’ ядэласетыдо’, конкурсха’ тэврабсетыдо’.

«Мань мэнена’ ӈухуков’» тарця выставкахана мел’’ не’’ сэдвы’’ манзаи’’ манэ’’лабтамби’’, хуркари’’ сомбой манзая’’ ӈока. Панытана’’, мальцятана’’, ной’ панытана, савитана’’, пивитана’’ ӈухуко’’ хуркари’’. Тарця манзаи’’ вадахана нир’ хэтаӈгу’’, сэвхана манэць тара’’.

Ихиня’ сомбой выставка’ «Арктикам’» нюбета культурно-деловой центрхана манзара. Маркана илена’’, округна’’ мядонда’’ мел’ не’’ манзаи’’ – ӈухуко’’ манэ’’манзь таня турӈая. Манэ’’лабтабада манзаидо’ не’’ хобахад, пенахад, нойхад, нярахад сэдвыдо’, сэдвы манзаидо’ ӈодякохона падтавы.

Кира Гончарук сэдорана не, пыда выставкан’ тэвравы ӈухукуда’’ нюдя я’ тер’’ ембдярт’ емб’’мыда.

– Тюку та’ мэта савак’’. Тарцям’ сэдась ни’’ саӈговос’’, хасава нида’ таня. Хусувэй ненэць нида’ танябнанда тара, – мел’ не вадамда хана.

Кира Алексеевна тамна мась, сэдорана’’ не’’ клубхана сян’ ирий’’ ямбан’ мэ. Сэдорава’’ серм’ мале’ ӈахакуд’ харвабтада. – Ӈавнанда сянако’’ сэдабась мэнем’, теда’ ӈод’’ тюкохона сэдорана’’ нин’’ ня’ ӈухуко’’ сэдабасетыва’’. Ненэцие’ ембдярт’ ембпина’’. Ханзер’’ хадакуна’’, небякуна’’ сэдораць, тарем’ маня’’сэдорабнана тара’’ нив’. Пыдо’ мэсодо’ нибнанда суса’’. Мань харвась тюкон’ сэдоранзь турцетыдм’, сава ихиня манзарасетыдм’, – Кира Гончарук мась.

««Мань мэнена’ ӈухуков’» выставкахана манэ’’лабтабада ӈухуко’’ хуркари’’. Манэць тара’’. Маргарита Латышева «Мел’ не’’» клуб’ манзаям’ нерня’ минрена не, пыда тарем’ лахана: – Хусувэй выставкан’ тэвравы манзая’ харта сята’’, харта падта’’мида. Ӈарка, Нюдя, Канин’ я’ тер’’ ембдярт’ емб’’мы’’ ӈухуко’’ толырто’ тет юкад’ ва’’ӈа’’. Тарця манзаидо’ клубхана сэдорана’’ нина’’ харвась сертавыдо’.

Хусувэй харвана’’ выставкам’ манэць тамна пиртада, Няръяна маркана вэба’’ ирий’ сидяюдимдей толыр’’ ӈэсонд’ манзаравнда.