Тарем’ Алексей Салиндер тасламбида. Тикы хасавако’ Ямалкана соявы, теда Санкт-Петербург маркана тоходана. Харта вадамда сававна теневана, вадамда тю’’у минрена.

Интернет’ мэць ненэцие’’ вадавна нита’’ поӈгана лаханасьты’’. Хаювы ирийхана пыда Няръяна март’ турӈась.

Надежда Сергеевна Салиндер паднана не. Хойхана соявы, хойхана вадювы, теда ӈод’ ӈарка хибяриӈэ’ хэсь илевамда ӈани’ нянэй мякана мэ’’ӈада. Нянэй мята’ Тазовский район’ иба’ яхана пэдара’’ поӈгана нусьты. Варёмда мэць Надежда Сергеевна таняна иле, падна, сэдора.

Салиндер: Ненэцие’’ округханана иленя’’ ненэцяӈга’ сейхад’ ӈэда’’ вади’’ мэ’’ман’ харвадм’: нянэй ненэць’ пили илея выӈгы яхананда, тыда лэтрамбая. Тыда’ танеӈгу’’ ӈань нянэй ненэць пили’’ илеӈгу. Нянэй ненэця’’ нини’’, Няръяна мар’ нини’’ сенз’ ӈэя’’, невхы ил’ идо’ нёдо’ юрбю’’, вадамдо’ нёя’’ юрбю’’, паныдо’, мальцидо’ пили’’ мэ’’ӈая, тыдо’ лэтрамбая’’.Мято’ тер’’ сенз’ ӈэя!

Сидя ёнар’’ няхарамдэй’ яӈганя пова’ маня’’ округханана «Мяд’ тер’’» поӈэ’ миӈась. По’ ямбан мяд’ тер’’ ненэцие’’ нямна хуркари’’ сер’’ таняць, сава вада’’ саць; тикахад’ округна ерв’’ ӈока нюсавэй семьи’’ есяхана, мяду’ нямна нядамбидо’.

Маркана, округна ӈэсыхына ӈод’ мяд’ тер’’ нямна хамандавы сава сер’’ таняць. Тарем’ӈод Хонгурейхана. Мэта ирийна сидя ю’’ нябимдей яляхана Хонгурей’ ӈэсыхы культура’ хардахана ӈока хибяри’’ ма’’лэйдаць. Тикы ӈэсыхына илена’’ хибяри’’ ӈокаювдо’ «Няръяна ты» колхозхана сяӈгова манзараць, ханяӈыдо’ хойхана мюсерць’ ты’’ пэрӈаць, не’’ мядм’ манзаям’ пэртяӈэ’ тараць. Тэхэна манзаравы’’ ненэця’’ теда нюдо’, нюто’ ню’’ маля тэхэна’’ мэнаӈэ’ тара’’. Тюку’ мэвахана тэхэт’ перена мяд’ тер’’ ненэцие’’ ма’’лаць.

Сян’ яля’’ ваерась я’ сяр ниня’’ илена’’ хибяри’’ едэй пом’ ядабтаӈгу’’. Тюку’ мэвахана сидя ёнар’’ тет’ яӈганя по’ тута. Хусувэй хибяри хэбидя яляхана няхато’ сейхад’ миндя’’ вади’’ мэцьты’’. Тюку яля’ тарця вади’’ маня’’ округна хибярихи’ хэвхы округханана илена’’ нина’’ хэтби’’.

Ваеравы си’’ивхана таневы газетаханана Матрёна Ивановна Талеева школахана, интернатхана иле’’мида ваде’’ӈась. Нюртей’ пелямда маля толараць. Тюку яля’ вадита’ пуданам’ намдада’’.

Ӈопой мэва сидя не’ ӈацекэва’’сата мерцяхана пу’’лэйханзь. Ӈэсындер’ хибяри’’ мал’’ пюрманзь тоць, яӈгумы’ хибяри сюрплава’ ян’ (кладбище) крест’ понд’ не’ ӈацекэхэ’ таркавэхэнзь, таняд’ хибяри’’ хойдось. Мертёвна интернатан’ не’ ӈацекэхэ’ хибяри’’танахаюдонзь, Алевтина Ивановна’ ӈэсына’’ медсестра не’ ӈацекэхэ’ ма’’нэманзь тось, ядембада ӈаволавахана воспитательма’’ сяйлабтабидась, саць нивэхэ’ ханив’’, юӈаха’. Маня’’ саць сейна’’ хаяць, ханяӈы ӈацекы’’ ярӈаць. Тохолкодина’’, воспитательна’’ тикы’ пуд саць вэва нумгана ӈэсындер’’нядаӈговась ханзетыдо’.

Сиднтет ю’’ по’’ тяхана Нюдя яхана мюсерта ты’’пэртя’ ненэця Никола Паханзеда мякана хасава ӈацекы соявысь. Тикы хасавакор’ вадёванда’ сер ӈокавна тоходанась, падарм’ сававна теневанаӈэ’ хэвысь. Хуркари’’ манзаям’ пэрць теневавысь. Мэбета’ паднанаӈэ’ теневава’’. Тикы паднана Василий Николаевич Ледков.

Ӈока по’’ ваера’’, яв’вархана ӈэда мэнена ӈэсыва’’юрувнда ни ӈа. Ӈэсыва’’ нянана’’ ӈаркараха ӈэсьты, пя’хардако’’няхатату нись ӈахана ирт’ нуць. Хусувэй хардахана иленя’ хибярим’- семьям’ теневынаць.

Сава теневанина’’

Хаювы ирийна пудана’’ яля’’ ямбан хэвхы округна еркы маркана, Саля’хардахана финно-угорский тенз’ мэта’’ паднана’’ ненэця’’ ма’’люрӈаць. Няхар’’яля’’ ямбан ӈока тарана серу’’ таслаць. Нянэювна ӈацекы’’ литература’ нямна вадидо’ мэ’’ӈаць.

Носиндалава ирийна сидя ю’’ си’’ивумдей яляхад’ сидя ю’’ хасуюдимдей’ толыр’’ ӈэсонд’ хэвхы округна еркы маркана Саля’хардахана финно-угорский тензхад’ перена’’ ненэця’’ паднана’’ ма’’лёй манзарась.

Маля ӈока по’’ ямбан Юлия Александровна Ледкова Няръяна маркы’ санаторной школа- интернатхана манзара, пыда тохолкода. Няхар юкад’ вата по’’ тяхана институтм’ ёльце’’махаданда ӈацекы’’ тохоламби. Нули’’ нерде харта со’’ямы яхананда, Холговхана илена’’ ӈацекы’’ тохоламбись.