Маля ӈока по’’ ямбан Юлия Александровна Ледкова Няръяна маркы’ санаторной школа- интернатхана манзара, пыда тохолкода. Няхар юкад’ вата по’’ тяхана институтм’ ёльце’’махаданда ӈацекы’’ тохоламби. Нули’’ нерде харта со’’ямы яхананда, Холговхана илена’’ ӈацекы’’ тохоламбись.

Нюртей тохоламбавы’’ ӈацекыда маля ӈарка хибяри’’. Теда пыда санаторной школа – интернатхана ненэцие’ вадам’ пэртя тохолкода. Таняна манзараванди’ нямна газетахана падарм’ падась.

Няръяна Маркы’ санаторной школа – интернатхана округхад’ товы’’ ӈацекы” тоходана”, иле”. Ненэй вадам’ маня” школаханана” мал’ ӈацекы” нюртей классхад’ самляӈ-гдимдей класс’ ӈэсонд тохоламбидо’. Нюртей классхад’ тетимдей класс’ ӈэсонд ӈацекы’’ ненэця’ вадан’ Полина Александровна Большакова тохоламбида. Самляӈгдимдей классхана’ тоходана ӈацекы’’ ненэця’ вадан’ Юлия Александровна Ледкова тохоламбида.

Урок’ мальӈгана ӈацекы” ненэй вада грамматикам’ пэрӈа’’, ненэцие’ падтаӈгода сертавы, Ӈэрм’ няна, Дальнёй Восток’ няна иленя’’ хибяри” вадаку”, лаханаку” толамби”.

Ӈацекы” урок’ мальӈгана маймбась едэй вади’’ тумдаби”. Мал’ школахана мэна” ӈацекы” тенева’’: ханзер ненэй вадавна тороварць тара, хурка вадам’ хантана мэ”я, ӈарка вадам’ хэтбасьты”.

Хусувэй по’ школаханана февраль’ ирийкана месячник «Россия многонациональное государство» ӈэсеты. Тикы месячник международной хусувэй хибяри хари ваданда е”эмня, письменностяндо’, культурандо’ Ӈарка ялян’сертабада.

Ирий’ ямбан’ ӈацекы” викторины пэрӈа”, хуркари конкурсхана тарасеты”, стихотворения тохоламбасеты”, яӈгерцеты”. Хуркари маня” ӈарка янана иленя’’ хибяри’’ культурам’, илевам’ тумдабасеты”, ӈокавна ненэцие’ хибяри илева е”эмня лаханакосеты”. Тикы месячник’ мальӈгана мядондина тосеты”. Мядондина ” школа’ ӈацекына” ня’ сянакосеты”, хуркари представлениям сертабасеты”. Харна” ӈо ӈацекына”ня” мят’ мядоманзь ядэрцетыва”. Тарця месячник’ мальӈгана тоходанна” ӈацекына” харто’ нюдя’ ямдо’, ӈарка илева’ ява” мэне тохоламбива”. Ӈацекы” харто’ культурамдо’, ханзер” ненэцие’ илевам’ теневабто’ тара.