Сиднтет ю’’ по’’ тяхана Нюдя яхана мюсерта ты’’пэртя’ ненэця Никола Паханзеда мякана хасава ӈацекы соявысь. Тикы хасавакор’ вадёванда’ сер ӈокавна тоходанась, падарм’ сававна теневанаӈэ’ хэвысь. Хуркари’’ манзаям’ пэрць теневавысь. Мэбета’ паднанаӈэ’ теневава’’. Тикы паднана Василий Николаевич Ледков.
Тюку по’ ӈарка пэвдэй ирийна мат’’ яӈганя’ толыркана сиднтет ю’’ пода пангусь. Яӈгу’’махаданда маля юкад’ вата по’’ ваера’’. Пуданда хаевы’ сарпявнанда хибярина илевамдо’ нерняри’ минредо’, паднавы’ нямдо’ тенедо’. Тюку по’ паднана няна юбилейм’, иленаӈэ’ мэ’’ӈава’’. Хуркари’’ мероприятия’’ тикы’ яля ед’ ханярина хамандавы’’.
Ӈарка пэвдэй ирийна маттамдэй яляхана маркана илена’’ хибяри’’ культурно-деловой центр’ кинозалхана ма’’лэйдаць. Таняна вечер-памяти этнокультурный центр ненэцие отделкана манзарана’’ нина’’ хамадаць. Паднана няна нямна вадам’ намдвась, вадам’ мэ’’манзь хибярина ма’’лэйдаць.
Ханяхад’ Василий Николаевич Ледков паӈгуда’ миӈа? Тикы’ нямна вадам’ Екатерина Петровна Тайбарей хамандась, тикым’ вечеркана ваде’’ӈадась: – В.Н.Ледков мань’ вэсакон’ Михаил Федотович Тайбарей переня. Тюку сидяӈгхана мань’ вэсакон’ хадам’ маниеда – Мария Артемьевна Ледкова. Пыда Василий Ледков нися’ хаса Николай Артемьевич не’ ня ӈэвысь. Николай Артемьевич няхар’’ нюда – Василий, сидя не нюда – Анастасия няби Ирина. Василий Ледков Николай нюбета’ хасава нюда таня, тамна сидя не нюда.
Тикахад’ Екатерина Петровна Василий Ледков падвы повесть’ «Белый ястреб» пелям’ толась.
В.Н.Ледков Ленинград’ маркана тоходанась, филологический факультетм’ ёльцевысь. Тохолкодаӈэ’ харта яхананда манзарась, тикахад’ литсотрудникӈэ’, ответственный секретарьӈэ’ «Няръяна вындер» газетанана тарась. Тамальӈгана нянэювна паднась’ пядась, пыда стихда округна газетахана падбидось, «Правда Севера» газетахана ӈадимберӈаць, тамальӈгана «Звезда», «Огонёк», «Сибирские огни» журналкана толава’’ пирась. Нява ӈокавна паднанась. «Белая держава» сборниканда ед’ Василий Ледков Всероссийский литературный премиям’ имени Федора Абрамова ня’’амась.
Сямянд’ нюртей манзаяда В.Н.Ледков 1960 похона Ленинград’ маркана тарпыць, «Дети моего стойбища» нюмдевы. Илеванда ямбан няхар’’ юкад’ вата книгам’ падась. Манзаида ӈани’ яхана илена’’ харта вадахандо’ сертамбидось.
Паднана няна ед’ хамандавы ма’’лёвахана Василий Николаевич тохоламбавы’’ хибяри’’ таняць, хуний ӈацекы ӈэвандо’ мальӈгана паднанава тенедо’. Матрёна Ивановна Талеева тохолкодамда тенад’ тенеда.
Василий Николаевич со’’яма яля ед’ хамандавы ма’’лёвахана вадам’ хэтван’ харвана’’ ӈокаць, хусувэй лаханана’’ ӈока сомбой вади’’ мэ’’ӈась. Хусувэй ваде’’ӈадась: ханзер паднана нява теневада, ханяхад’ торомдадась, сямянд’ харвабтана падвыда толабиць. Сергей Константинович Никулин Няръяна маркы администрацияхана культура’ серу нерня пэртяӈэ’ манзара, пыда мась: – В.Ледков Архангельск’ маркана илебнанда ӈод, харта со’’явы ямда саць мэнедась. Тюкон’ турпада, масьты – Варандэян’ тэворман’ харвадм’, хари’ явнан’ невхы по’’ тотрев’ мюсебнан’. Пыда сейда пилибт’ округханана хаюрӈась. Маня’’ Василий Николаевич Ледков нямна телефильм’ сертаваць. Тикы фильм’ этнокультурный центрхана таня, манэ’’ира’’. Фильм’ сертабавана мальӈгана Архангельскан’ тэворӈаваць, Алефтина Ивановна – Василий Николаевич пухуця’ сидна’’ нядабись. Ӈобкана паднанана сюрвы ян’ тэворӈаваць. Неда ваде’’ӈадась: ханзер хасавада Архангельскхана илесь, манзарась.
Тамна вечеркана ненецкие театр «Илебц» сянакода’’, сё’’ падбада, мэта ненэць Валерий Ледков няюв’ литературно-музыкальный зарисовкам’ хамандавыць. Маня’’ хибярина паднанана’ падвы’’ стих’’ ненэця’’, луца’’ вадавна толабидонзь, сёӈэ’ мэ’’эйдонзь.
Ӈока сава вадам’ Иван Егорович Ледков хэтась, пыда ненэця’’ вадавна лаханась.
Ёльце ихиня’ сомбой ма’’лёвам’ паднана’ нямна этнокультурный центрхана манзарана’’ нина’’ хамандавыць, «Илебц» театрхана сянакодина’’ ӈани’ пэдова’’. Няндо’, ӈарка вада’’. Хусувэй таняна мэвы’’ хибяри ихиня’ тарця ма’’лёва пон’ илевнда.
