Надежда Сергеевна Салиндер паднана не. Хойхана соявы, хойхана вадювы, теда ӈод’ ӈарка хибяриӈэ’ хэсь илевамда ӈани’ нянэй мякана мэ’’ӈада. Нянэй мята’ Тазовский район’ иба’ яхана пэдара’’ поӈгана нусьты. Варёмда мэць Надежда Сергеевна таняна иле, падна, сэдора.

Салиндер: Ненэцие’’ округханана иленя’’ ненэцяӈга’ сейхад’ ӈэда’’ вади’’ мэ’’ман’ харвадм’: нянэй ненэць’ пили илея выӈгы яхананда, тыда лэтрамбая. Тыда’ танеӈгу’’ ӈань нянэй ненэць пили’’ илеӈгу. Нянэй ненэця’’ нини’’, Няръяна мар’ нини’’ сенз’ ӈэя’’, невхы ил’ идо’ нёдо’ юрбю’’, вадамдо’ нёя’’ юрбю’’, паныдо’, мальцидо’ пили’’ мэ’’ӈая, тыдо’ лэтрамбая’’.Мято’ тер’’ сенз’ ӈэя!

Зоя Степановна Ивакилева округна толаӈгова’ хардахана отдел’ Севера ервотаӈэ’ манзара. Пыда минрена манзаянанда хуркари’ сомбой сер’ танесеты’’. Отдел’ Севера мякана ма’’лёбнана ихиняна сава ӈэсьты’’. Тюку по’ ӈарка пэвдэй ирийхана сян’ мэвна сидна’’ таняна ма’’ламбиць. Ненэцие’’ паднава ялуна’’ мэ’’мана мальӈгана сян’ мероприятия’’ хамандавыць. В.Н.Ледков сиднтет’’ ю’’ пон’ таняна мэ’’ӈаваць, паднанава тензебтембиваць. Тикахад’ Н.М.Терещенко юр’’ самляӈг пон’ хамандавы ма’’лёвава таняна ваерась. Роза Ивановна Канюкова округханана теневана не, пыда ты’’ ниць ирийхана си’’ив ю’’ самляӈг пода панысь. Роза Ивановна е’’эмня хамандавы ма’’лёвава ӈобтарем’ толаӈгова’ хардахана ваерась. Тюку по’ ӈарка пэвдэй ирийхана паднана няна Лукерья Валей мат’’ ю’’ пода панысь. Няна’’ со’’яма яляхана сейхад’ ӈэда вадина толаӈгова’ хардахана мэйнаць.

Едэй пом’ ядабтавахана Зоя Степановна округна хибярихи тарця вади’’ хэтась: – Маня’’ нина’’, товнда пом’ сава ихиня ядабтара. Товнда похона сававна иледа’’, хусувэй хибярина манзаяда таняя, нюда’’ сенз’ ӈэя, ябда илевамда мэ’’ӈара’’. Маня’’ манзара’’ хардахана турӈада’’, толаӈгуда’’.