Вы здесь

Нянэй мякана иле, паднавам харвабта

Хаювы ирийна пудана’’ яля’’ ямбан хэвхы округна еркы маркана, Саля’хардахана финно-угорский тенз’ мэта’’ паднана’’ ненэця’’ ма’’люрӈаць. Няхар’’яля’’ ямбан ӈока тарана серу’’ таслаць. Нянэювна ӈацекы’’ литература’ нямна вадидо’ мэ’’ӈаць.

Я’малкад тарця ма’’лёвахана няхар’’ ю’’ сидндет паднанадо’ манзараць. Тасу’ яхад’ Надежда Сергеевна Салиндер товысь. Тикы не илеванда ямбан паднава серм’ минреда, падвы’’ манзаида маля ӈока. Надежда Сергеевна Салиндер няюв лаханамась.

Корр: Надежда Сергеевна, теда пыдар’ Тасу яхад’ тонась, таняна илена’’ нянэй ненэця’’ ханзер’ иле’’, пыдар иламд’ ханзер мэ’’ӈар, ӈаву’’ пэрӈан’?

Салиндер: Яни’ тер’’ таремгов’ савовна иле’’. Тедарихова тэсодо’ тамна таня’’. Мань’ ӈани’ теда сидя по’ нянэй мякана иледм’. Нянэй мякана иледам’, сыра’ ханяна лакри’ хардан’ тосьтыни’. Теда пенсиян’ хэ’’мяхадани’ ӈули’ савовна илем’, ини’ ватомна иледм’, ӈэвни’ согудм’ иледм’. Варёми’ мэць иледм’, сэдорадм’, паднадм’.

Корр: Теда пыдар’ Саля’хардан’ паднани’’ ӈарка ма’’лёван’ тэвын’, хурка серу’’ тюкохона намдван’ харван’ паднава сер’ нямна?

– Етри’ таремгов’ ванидм’ падна. Теда тарем’ тодамзь, ӈацекы’’ е’’эмня сертавы’’ падвыни’ тэврадамзь’, ӈацекы’’ лаханако’’, луца’’ вадавна падвы’’. Нянэй вадавна падвыни’ таневэ’, сидя по’’ тяхана тюкон’ тэврэйнась’ ӈани’ тэри’’ тюкохона юседаць. Тикахад’ тикы манзаин’ тад’ луца’’ вадавна сертэян’ ӈани’, тэда тикыни’ тэврадамзь’. Тикы нерня ӈани’ иле’’ми’’ падамась, ӈани’ тюкон’ тэврэйнась. Тикыни’ теда ханяна хэвня’’, тикыни’ хонрагудм’. Тарця сер’ е’’эмня теда ядэрӈадм’. Тикы’ поӈгана нини’’ манэ’’мась тодамзь’. По’ Саляхардан’ нидамзь’ тэвор’’. Нина’’ сабе ванина’’ хомбю’’. Теда пэдарахана нидум’ иле’ ӈани’, сабе ванидм’ тэвор’’ нина’’ няку’’.

Корр: Надежда Сергеевна, пудана похо’’на’’ ӈадимы книгар’?

– Теда сидя поӈэ’ хаява ӈани’ «Кочевье к счастью» тарем’ нюмдевась. Тикы’ поӈгана округ юбилей ӈэ’ нисяв’ сабе’ парумба сертась тарась’. Тарця книжками’ ӈадимясь. Невхы ненэцие’’ иле’’мя, не иле’’мя нямна падвы. Параӈгоди’ мальӈгы.

Корр: Ӈацекы’’ е’’эмня паднан’?

– Ӈацекы’’ е’’эмня паднадм’. Падбадин’ ӈани’ ӈацекы’’ сёкоци’, илевани’ ямбан ма’’лабвыни’, ханяна хэбидя ялям’ мэцьтыва, ты’’ яля’ ӈэдакы тарця яха’ ӈэдалёрмани’ ёльцяӈгана мэцьты, лаханако’’ мэта’’ танесеты’’ – тарця ӈани’ ма’’ладамзь. Тарця манзаин’ ӈани книжкаӈэ’ ханта.

Корр: Пыдар’ нянэй вадавна нин’ падна’’, луца’’ вадаривна?

– Нянэй вадавна ӈани’ паднадм’. Стихкоця’’ луца’’ вадавна манзь’, пелядо’ маля сёӈэ’ мэй’’до’. Нянэювна теда лахако’’ падбидамзь, тикахад’ хобцоко’’ӈэдакы’’, вада’’ хара’’ тарцякоцини’ таневэ.

Корр: Пыдар’ падвы’’ манзаид’ ханяхад’ хова’пир’’, лавкахана тэмдась’ серо’’ӈа?

– Ханяхана ӈэдакы, округханана тюкохона ӈадимзеты’’, небо’ самляӈг’ книжкам’ таць. Тикахад ханяна хантакы’’? Ехэрадм’…

Ненэця’’ тэри’ манзеты’’: вэй, книжкамд’ ходамзь, ханяхад’ хобдакыдо’ ет’?

Теда лаханая, Надежда Сергеевна Салиндер харта со’’ямы яхананда варёмда мэць’ иле. Пудана сян’ по’’ ямбан илевамда нянэй мякана мэ’’ӈада, хой’ илм’ мэ’’ӈа. Хардан’ тэвормада ӈули’ тянё ӈэсьты. Мякана сэдора, падна. Илеванда ямбан ма’’лавы лаханакуда, вада’’ хара’’ ӈэдакы, хобцокуда, книжкаӈэ’ хэвндавэй падвыда’’ манэ’’сарць тасалку: тамна хурка книжкам’ ма’’лась. Надежда Салиндер мэбета не, нерняна падвыда тамна манэ’’тына’’.