Ямалкана манзарана’’ депутат’’ сертамбада манзаядо’ тянё нисьты’’ ӈа’’. Хусувэй по’ округханандо’ илена’’ ненэцие’’ нядамбава сер’’ нямна тарана’’ Закон’ ня’’амарпи’’, тикы нямна яханандо’ яӈга ня’’амвы программа’’ манзара’’.

Округандо’ депутат’’ поӈгана сян’ нянэй ненэця’’ таня. Маля ӈока по’’ ямбан Ямалкана манзарана’’ депутат’’ манзаям’ нерня минренаӈэ’ Сергей Николаевич Харючи тара. Тикахад’ депутатӈэ’ Елена Тимофеевна Пушкарёва, Александр Вадетович Евай манзараӈаха’. Тюку ирий’ нюртей яля’’хана Саля’хардахана мэван’ мальӈгана Александр Вадетович Евайм’ лаханакурць ня’’ӈадамзь. Пыда ӈули’’ нерде вадамда ӈармбэй ненэцие’’ нямна ханадась.

Александр Вадетович Евай маля ӈахакуд’ округандо’ Думахана депутатӈэ’ тара’’, ӈэрм’ тенз’ ненэцие’’ серу’’ тасламбада комитетхана манзара’’. Тенева’’, хурка тарана’’ падар’’ е’’эмняндо’ падась, хурка серкана нядась. Пудана похона Ямал’ депутат’’ ӈэрм’ тенз’ ненэцие’’ ед’ таславы’’ манзаидо’ тянё нивыць’ ӈа’’. Тикы нямна Александр Евай тарця вади’’ мэ’’ӈась: – Маня’’ округханана хуркари программа’’ манзара’’, ханяӈыдо’ ӈармбэй нина’’ няюв’ таславы. Округханана хибя’’ ӈока по’’ манзараса’’, тарця нина’’ нядамбина’’, мал’’ тикы ӈопой программахана пады’’. Ӈока ӈацекым’ тю’’у и’’илвы’’ ненэця’’ е’’эмня яӈга Законва пады. Тикахад’ ӈарка ненэциена юрбю’’ ванина’’. Маня’’ пенсионерна’’ малбуйӈэ’ еся’’ няд’’маӈэ’ хусувэй ирийхана сидя ёнар’’ есям’ ня’’амарпи’’. Тарця ненэциена ӈокарка.

Теда ӈани’ ӈопой тасламбадава’’. Сайнорма’ похо’’на ӈацекы’’ ӈэвы’’, тикахад’ тамальӈгы’’ похо’’на соявы’’ нямарпада есядо’ сидя ёнаркад’ ӈокарка ӈэбнанда’ тара. Ханзер тикы есякудо’ нядась, тикы нямна ива ядэрӈа’’.

Сямянд’ нердева еся’’ тола’’ тарана’’ ним’’, тикым’ тасла’’махад’ депутатӈэ’ Закон’ ня’’амгува’’. Тедари’’ серуна тасламбина’’. Хибярина е’’эмня тарана падар’ ӈэ’’нив.

Сайнормы’’ ненэцяӈгавина савовна нядамбина’’. Тарця ненэциена хусувэй по’ тянёркаӈэ’ хантананё’’, хусувэнд’ пода маля ӈока’’ма’’. Пыдо’ е’’эмняндо’ яӈга падар’’ манзара’’.

Тарем’ хусувэй хибяри’’ няюв’ таславы Закон’’ яханана манзара’’, ненэциена янамбовна нядамбина’’. Нерняна товнда похо’’на тоенаркась’ мэнарха. Еся’’ тянёркаӈэ’ хантана’’. Бюджетва няхар’’ пон’ таславы. Нерняна хурка ӈэӈгу? Нерняна манэ’’тава’’, тедари’ ти’ тарця.

Тарем’, янамбовна ямалкана илена’’ нина илевамдо’ нерняри минредо’. Округханандо’ илена’’ ӈармбэй ненэциедо’ нисьтыдо’ юрбю’’, пыдо’ нямнандо’ депутат’’ тарана падро’ манэ’’сарӈа’’. Маня’’ яхана таслась, округханана илена’’ ӈарка нина’’ илевадо’ хэвхы округханана илена’’ нито’ пирувна саварка ӈэдарха. Ямалкана илена’’, сайнорма по’’ мальӈгана ӈацекы’’ ӈэвы, тамальӈгы похо’’на соявы’’ хибяридо’ пенсияндо’ еся няд’’маӈэ’’ тюку ялян’ таслась валакада сидя ёнар’’ нямарпи’’. Маня’’ яханана тарця хибярина мат’’ ёнаркад’ вата есям’ нямарпи’’.

Тикахад’ маня’’ яханана пенсияхана мэна’’ хибярина понанда няхармэвна ю’’ ёнар’’ есям’ нямарпи’’. Тикы тарця пенсионер’’ – не’’, хуний подо’ самляӈг ю’’ самляӈгхад’ ва’’ӈа’’, хасава, хуний мат ю’’ подо’ панвы’’. Тикахад’ ветеран труда, инвалид тамна ю’’ ёнар’’ ня’’амарпи’’.

Ямалкана тарця серудо’ депутат’’ валакада теда манэ’’саръядо’.