Мань’ манзараван’ ямбан ӈока ихиня сомбой хибярим’ ядтамась, таӈок по’’ ямбан ӈока хибяри’’ торомдамась. Тикы теневанин’ маркана иле’’, округна ӈэсыхына; малӈэ’ пыдо’ хуркари’’ манзаяхана манзарана’’.

Нянэювна манзаяв’ минреван’ сер округна школахана манзарана’’ нина’’ няюв ӈобт’ тэворцетыва’’. Поӈгнандо’ ненэцие’’ вадам’ минрена’’ тохолкодина’’. Ӈокаювдо’ сими’ ӈахы’’ похот’ нядабасьты’’. Радиона манзараван’ мальӈгана пыдо’ вадидо’ мэцьты’’., теда газетахана манзарась вадам’пэртя нина’’ падвыдо’ тэврабсеты’’. Сава нядаӈгодаӈэ’ тохолкода’’ Матрёна Ивановна Талеева, Нина Сафроновна Ноготысая, Елена Гавриловна Хатанзейская, Марина Григорьевна Хатанзейская. Тарця нин’’ таня, малӈэ’ нюмдева’ серта яӈгу. Няндо’ ӈарка вада.

Тамна саць сава нядаӈгода няв’, ӈобтарем’ няхар’’юд’ мян по’’ теневанав’ – Галина Григорьевна Тайбарей. Пыда – тохолкода. Илеванда ямбан ӈокавна манзарана не. Нянэй не – ненэцие’’ вадамда мэӈа, ненэцие’’ культурам’ теневана, паӈгуда тенена. Пыда округна Ӈарка яхана мюсерта’’ ненэцие’’ мякана ёнар’’ хасуюёнар’’ самляӈг ю’’ тетимдей по’ февраль ирий си’’ивумдей толыркана соявысь. Тюку по’ сава няна со’’яма ялям’ мэ’’манзь мэта’’ си’’ивна самлязимдей яляхана ма’’лаӈгуна’’, ихид’ ӈэда’’ вадина нянда хэтгува’’.

Галина Григорьевна Ленинград’ маркана институтм’ ёльце’’махаданда округна школахана манзарась, ӈока ӈацекым’ тохолась, илан’ табадась. Юкад’ вата по’’ ямбан педучилищехэна тохолкодаӈэ’ тоходанна’’ пирибця’’, наны’’ тохолкодаӈэ’ манзарась. Ненэця’’ вадам’ теневавандо’ е’’эмня ӈарка манзаям’ сертабись. Галина Григорьевна тохолабвы’’ хибяри’’ теда округна школахана манзара’’. Теда ӈод’ Галина Тайбарей манзаясю’ ни’’, пилибт’ сертавндада танесеты’’. Пыда паднава’ серм’ харвабта. Падвы’’ манзаида ӈока толабасьтына’’, намдурцетына’’. Манзаида луца’’, ненэця’’ вадавна падвы’’. Сейхад’ ӈэда’’ вадида мэнена янда нямна падбида.

Галина Григорьевна Тайбарей теневана паднана, ненэцие’’ вада’, культура’ тохолкода, ЛитО «Заполярье» паднана. Луца вадахад’ ненэця вадан’ сертавы манзаямда теда толада’’.