Ханяна со’’ясан’ таняна таралъян’ луца’’ тарця пословицадо’ таня. Ненсянда ӈод тарця, ӈокаюв’ маня’’ хибярина ханяна со’’яса таняна манзара. Харто’ ӈэсынандо’ таромдо’ мэ’’ӈадо’. Тарем’ ӈод Надежда Алексеевна Канева. Тюку ялян’ лаханась, пыда Хонгурей’ ӈэсыхына иле.

Таняна няхар’’ юкад’ вата по’’ ямбан манзара, сидя хасава нюкцяда вадась. Теда ӈод варёмда мэць’ харта яхананда харвась манзара. Хаювы’’ яля’’хана Надежда Канева Няръяна март’ турӈась. Тамальӈгана лаханакурмами’ танясь. Харта нямнанда лаханакурць’ няв’ тарця вади’’ хэтась: – Мань’ теда Хонгурей ӈэсыхына илем’. Паӈгун’ ты’’пэртяхат’ миӈа’’. Нюдя яхана соямась, хойхана соявэм’. Нисяв Алексей Гермагенович Ардеев илеванда ямбан тэхэна мэсь, небяв Сталина Яковлевна ӈэсын’ тована’’ ӈэсонд’ мядм’ пэртяӈэ’ тарась. Хонгурей’ ӈэсын’ семьява ёнар’’ хасуюёнар’’ мат ю’’ тетимдей похона хойхад’ ха’’мыць, тикахад’ тюкона илева’’. Теда мань’ ӈэсына почтана начальникӈэ’ тарам’, тикахад’ оператор’ манзаям’ пэрӈам’. Манзаяв’ саць ивнян’ ӈа’’, мэкадарха, тарана. Манзараван’ мальӈгана почтан’ ӈока хибяри’’ турцеты’’, ӈока хибяри’’ няюв’ манзарась’ тарасеты. Хибярина посылки’’, бандероль’’ ӈэдарабсеты’’; подпискам’ сертабасьты’’. Маня’’ хибярина газеты, журнал толабась’ мэнедо’. «Няръяна вындер» газетава хусувэй семьян’ турӈа, тикы газетава ветеран’’, труженик тыла есяси’ ня’’амарпидо’. «Здоровье», «Комсомольская правда», «Российской газетам» хибярина ня’’амарпи’’. Ӈацекы’’ харто журналто’, газетыдо’ таня.

Корр: Теда пыдар’ Няръяна март’ хурка серу’’ таславась’ тонась?

– Едэй по’ февраль’ ирийхана Сочи’ маркана олимпиада ваераӈгу. Олимпиада ту’ теда явнана миӈа, Няръяна март’ турӈась. Мань’ март’ тарця тум’ минревась’ томась. Факел’ минребдаӈэ’ сим’ манзаяхадан’ «Почта Россияхад» тэраць. Ся’’ня нерте нян’ тарця сер’ ваде’’ӈаць, мань’ сацьри’ нимась’ пунрю, мамась: харвабнанда ни’’ тэраӈгу. Тикахад’ нян’ телефонувна лаханаць, ма’’ним: – Пыдар’ сит’ факел’ минребдаӈэ’ тэра. Мань’ тарця юн’ намдась, ихинян’ савархась, маймбимась.

Мань’ спортхана ӈахэт’ занимайсям’, лыжахана сюрберӈам’. Школахана тоходанбан’ ӈока спортивной секцияха’ ядэрӈамась. Волейболхана, баскетболхана сянакосьтым’. Хуркари’’ округхана танеда’’ соревнованияхана мэсьтым’, школьной соревнованияхана мэсьтым’. Школам’ ёльцесь, теда маля ӈахэт’ манзарам’ пилибт’ лыжахана сюрберӈам’. Тяӈы’’ похо’’на сельской спортакиада’’ ӈэсьты’’, маня’’ ӈэсыхыдана командава ӈобтарем’ ядэрцеты’’ тарця спортакиадаха’. Хасава’’ теннисхана сянакосьты’’, лажахана сюрберцеты’’, мань’ ӈод лыжана сюрберцетым’. Спортивной сер’ маня’’ школаханана сававна масьтевысь. Тохолкодина Прокопий Андреевич Явтысой нябю Юрий Семенович Скачков пилибт’ нянана’’ сянакосьты’’, ив’ ер нянана манзарасьты’’.

Корр: Хонгурейхана илена’’ хибяри’’ спортан’ ханзер сырӈа’’?

– Маня’’ ӈэсынана спорт’ мэнена’’ хибяри’’ тянё ни’’ӈа’’. Хуркари’’ спортивной сер’ танесеты’’. Апрель’ ирийхана ӈарка рыбалкава ӈэсьты, тикы’ хавна тамна «Быстрая лыжня» соревнования’ танесеты. Пудана’’ сян’ по’ маля маня’’ ӈэсынана Егор Васильевич Рочев сидна’’ ма’’ласьты’’, маня’’ ӈобкана ныланасьтыва’’, лыжахана сюрберцетыва’’. Тикахад’ биатлонхана сянакуваць тюку по’ нара мальӈгана. Тарця соревнования е’’эмня тарана’’ ӈаворидава’’ тэмдаць, «Пустозерский сельсовет» сидна’’ нядась. Маня’’ е’’эмняна лыжи’’, ботинки’’ тэмдаць, палатки’’. Егор Васильевич Рочев сидна’’ нерня пилибт’ пэрцеты. Маня’’ ихиняна саць сава – тарця хибярива ӈэсынана таня. Нянда сямянд’ сава вада’’.