Ӈарка пэвдэй ирийхана округна еркы маркана сян’’ мероприятия’’ ваераць. Ханяна ӈэрм’ тенз’ ненэця’’ ма’’лёвандо’ сер’ илӈгана танеда серудо’ тасламбиць. Тарця яля’’ мальӈгана маркана ма’’лавы’’ хибярина поӈгана мядондина’’ таняць.

Ихиня тарцяда’ савархась, мядондина поӈгана сян’’ ӈацембой хибярим’ хомбидамзь. Тикы тарця хибяри’’, хуний ӈацекы’’ ӈэбнандо’ ӈод, илан’ мэёвна сырӈа’’, харто’ ивняндо’ ӈэда манзаидо’ пэрӈа’’, манзаравито’ поӈгана тоходана’’. Хадри Окотэтто, Алла Набутова Няръяна март’ Москва маркад’ то’’ӈахась, пыди’ этнопаркхана манзараӈаха’. Таняна харти’ тенз’ ненэциети’ илм’ мэць илеӈаха’, нянэй мякана илесь’ ӈэрм’ тенз’ ненэця’’ илм’ манэ’’лабтабихи’, нянэй ненэця’’ культура’ нямна лаханасьтыхы’. Тикахад’ ненэця’’ вадам’ тохолаван’ харвана’’ хибяри’’ тохоламбихи’. Тамна ӈопой турмы хасава ӈацекы Алексей Салиндер, теда лахась пыда Санкт-Петербург’ маркы Герцен’ нювм’ нюбета университетхана тоходана. Алексей Я’мал тер’, Сюнай Саля ӈэсыкоцяхана ненэцие мякана соявы, нюдяко ӈэсыхына вадювы. Школамда ёльцесь ӈарка март’ тоходанвась тэвыць, тетимдей по’ маля тоходана. Харта паӈгуда теневана, харта вадамда мэнена, илан’ мэёвна сырта. Тарця ӈацекына таняван’, маймбава сер’’ли. Пыдо’ ӈэрм’ яханана нерня илевнда, пыдо’ пудана’’ хаёвнда. Алексей Няръяна март’ нябимдеймэвна турӈась. Тюкумэвахана турмахананда маня’’ округна ӈацекы’’ слётхана манзарась, тикахад’ ненэцие’’ письменность’ ма’’лёвахана вадамда мэ’’ӈась, «Ясавэй» ӈарка ялян’ хамандавы ма’’лёвахана турӈась. «Нерня сырта’’» таремъюв’ нюмдевы слёт’ округханана нюртеймэвна ваерась, ханяна ӈацекына ма’’лась харто’ серудо’ тасламбиць. Маня’’ ӈацекына няюв’ Я’мал тер’ хасава Алексей Салиндер манзарась, нида’’ лаханась ня’’ӈась. Тюкохона мэванда’ нямна тарця вади’’ хэтась: – Ненсянда слётхана манзарадамзь. Ӈацекыда ӈули’’ сава’’. Манзараван’ харва’’, тэтнаць. Лаханакурць няпни’, вадамдо’ тохолабван’ харва’’. Няни’’ ма’’ним: вадава тохолабван’ харвава’’. Валакада теда Няръяна маркана вадава нива’’ тохолабю’’, нёлеко хардахавана вадамдо’ тохолабидо’. Теда ӈацекы’’ хахаяда яля’’хана активдамдо’ ма’’лабиць. Ӈарка ассоциацияра таня, «Ясавэй» нюмда. Тикы ассоциация ма’’лёва мальӈгана пыдо’ манзараць, тикахад’ харто’ серудо’ таслабгудо’, харто’ серудо’ нерняку пэрта’’. Ӈацекы’’ активдамдо’ ма’’лаван харваць. Слётандо’ нюм’ «Нерня сырта’’». Ненсянда ӈацекыда нерня сырман’ харва’’. Ӈодьбянда ӈобкана ма’’лыць, манзаидо’ таслабиць, падродо’ таслабиць. Нянэй ненэцие’’ ӈацекы’’ мал’’ ма’’лавыдось. Тикахад’, тарем’ манэць, манзаидо’ сертамби’’. Ӈацекыда «Хаяркана» манзара’’, тэтна’’, культурамдо’ манэ’’лабтамби’’. Ӈацекыда тохолку’’, савовна тохолкодида ӈани ӈока’’. Тарем’ мамб’’ӈо’’, ӈока’’ ненэцяӈгад тэравы’’ ӈацекы’’ ӈули’ саваць. Нерде лаханакурпани’, хонрэйнась: харвада’’ тарця ассоциация’ мальӈгана харта отделениемда сертаван’? Пыдо’ ма’’ним’: Тарця отделениева тара. Маня’’ харна’’ манзаина ваде’’тына’’, ӈарка ассоциациява нядабаӈгува’’. Ассоциация теда манзаям’ минрена’’ ненэця’’ ӈарумд’ ним’’, пыдо’ пудандо’ маня’’ нива’’ тут’’? Тарця вада’’, сава вада’’.