По’ пудана’’ яля’’ха’’ тэвотына’’. Сян’ ялякоцям’ мадась, луца’’ илӈгана илена’’ нянэй ненэцяӈэ’ ӈод едэй товнда, сидя ёнар’’ самлязимдей яӈганя пом’ ядтабгува’’. Тарця ӈарка ялям’ мэць маля торомбэва’’. Тарця ялям’ ӈатесетыва’’.

Пом’ мадамбава’ сер хусувэй хибярир’ ибедорцеты: мэ’’мы по’ нянан’ хурка ӈэса? Ӈамгэ’ савада танеса, ӈамгэ’ вэвада таневакы? Манзарана хибярир’ по’ ямбан манза’’рамида тасламби. Тарем’ ӈод толанго’ хардахана манзарана’’ нина’’ тасалкуць. Округна толаӈго’ хардахана ӈэрм’ ненэцие’’ отделкана мазарана’’ нина по’ ямбан’ сертавы манзаядо’ тянё ни’’ӈа. Маня’’ ӈод манзаина минревана сер’ таняюв’ тэворцетыва’’. Нина’’ пэдова’’, харвась манзара’’.

Сидя ёнар’’ тетимдей яӈганя похона таняна тарця ӈарка мероприятия’’ таняць. Толаӈго’ хардахана сидна’’ паднана Тимофей Петрович Синицын – Пеля Пунух юр’’ сидя ю’’ пом’ мэ’’манзь’ нина’’ ма’’ламбиць. Ӈока ихиня сомбой вадам’ паднана ил’ нямна намдаваць, падвы’’ манзаида нина’’ толабиць. Тикахад’ тюку по’ Мария Яковлевна Бармич сиднтет ю’’ пода панысь. Пыда нямнанда хамандавы ма’’лёва ваерась. Яханана падтаӈгода Надежда Выучейская иле, пыда падтавы манзаита выставка’ ханярина ваерасьты. Надежда Алексеевна тамна паднана ненэцие’’ книги’’ падтамби. Толаӈго’ хардахана «Самодийский эпос» книга’ презентациям’ нина’’ хамадаць. Хусувэй товы’’ мядонзэйм’ ня’’амась. Тюку по’ округна со’’яма ялям’ мэ’’ӈаваць, округна сиднтет ю’’ самляӈг пода панысь. Тамна ӈопой ӈарка юбилейм’ носиндалава ирийхана мадаваць. «Няръяна вындер» газетана ӈоб’ сиднтет ю’’ самляӈг поданда хая. Округна газетахана ненэцие’’ вадавна паднава’’. Сиднтет ю’’ самляӈг поход’ сидя ю’’ мат’’ по’’ ямбан округна газетахана ненэця’’ вада яӈгусь. Ёнар’’ хасуюёнар’’ сиднтет ю’’ хасуюдимдей похона округна газетахана В .А. Ханзерова «Ялумдава» нэсь. Тикы поход’ те’ ӈэсонд газетанана ненэцие’’ вадавна паднава’’. Тарця ялям’ ӈод толаӈго’ хардахана манзарана’’ нина’’ нивыць юр’’. Пыдо’ «Ялумдхана» манзаравы’’, теда манзарани’’, теда паднани’’ е’’эмня вечер’ хамадаць.

Тюку яля’ Зоя Ивакилева округна хибярихи’ тарця вади’’ мэ’’ӈа: ваеравы по’ ямбан ӈока хибяри’’ толаӈго’ хардахана турӈаць. Толаӈгода’’, книгам’ мэнена’’ хибярина яханана таня’’. Нянэй толаӈгодина хойхана мюсерӈа’’. Пыдо’ е’’эмняндо’ маня’’ хусувэй по’ библиотечки’ хамдабсетыва’’. Ты’’яля’ мальӈгана хоян’ тэврабсетына’’. Тюку по’ ӈод тарця мядонзэйна’ хоян’ тэвыдаць. Нерня ӈод тарем’ манзараӈгува’’.

Сян яля’’ ваерась едэй пом’ ядтаӈгува’’. Товнда пом’ сава ихиня ядабтара’’, сензда’’ ӈада’’, хусувэй хибяри манзаяда таняя. Толаӈго’ хардахана турӈада’’, сидда’’ маня’’ пилибт’ ӈатева’’.