Мэта ирийна сиднтетимдей яляхана не’’ ӈарка ялям’ мэцьтыва’’. Не’’ е’’эмня маня’’ яханана хусувэй по’ конкурс’ танесеты. Тарця конкурс’ «Ненэцие’’ округ’ Женщины России» региональной движение’ ватовна миӈа.

Ваеравы сидя ёнар’’ тетимдей яӈганя по’ хуркари’’ серкана, хуркари’’ манзаяхана нердевы’’ не’’ нюмдець. Хаювы си’’ив маттамдэй яляхана «Арктика» хардахана не’’ ма’’люрӈаць, хуний конкурс’ номинации’’ ня’’амаць, ӈокханда тет’’ яӈганя не – «2014 по’ не» нювм’ ня’’амаць. Тарця ма’’лёвам’ округна не’’ региональной движение нерм’пэртя Ольга Старостина нэдась. Тикахад’ по’ ямбан нердевы нехэ’ мядонзэй’ мипиць.

Сямянд’ нерде сценан’ сайнормы похо’’на манзаравы, ява сахарамбавы не Ангелина Ивановна Тарасова танэяць. Пыда нянда премиям’, диплом’ округна губернатор ми’’ӈась, ихид’ миндя вади’’ хэтась. Ангелина Тарасова «Женщина победитель» номинациям’ ня’’амвы.

Тет’’ яӈганя номинацияхад’ сидямдо’ нянэй некоця ня’’амадись. «Наши надежды» номинациям’ ӈацембой некоця Надежда Васильевна Латышева ханась. Тикы не ӈацекы сертабада манзаяда ӈули ӈока, илан’ мэёвна сырта хибяри. Тамна ӈопой номинация’ ня’’амвы «Хранительница народных традиций» Нина Ивановна Баркулёва. Пыда илеванда ямбан Хонгурейхана илесь, «Няръяна ты» колхозхана тет ю’’по’’ ямбан манзарась. Сэдорава серкана мел’’, ненэцие’’ театрхана сянаку’’. «2014 по’ не» конкурсхана нердевы нянэй не нямна вадина товнда си’’ив тетимдей яляхана таневнда газетанана толаӈгуда.