Тюку ирийхана сямянд’ ӈарка хэбидя ялям’ мэ’’ӈава’’. Тикы Победа яля’. Маля си’’ив юкад’ вата по’’ ямбан яханана сайнорамам’ ехэрась илева’’. Ӈацекына маям’ ехэрась вадюдана’’. Хибя’’ тарця илм’ е’’эмняна сертаса’’, хибя’’ си’’ив юкад’ вата по’’ тяхана ява’ хэвняхад’ товы’’ вэвко хибярихит’ лэтрасадо’.

Маня’’ округна хибяри’’ ӈарка сайнормахана сайнорӈаць, ханяӈына пуня’’ яхандо’ нидаць’ тэв’’. Тарця сер’ юрбада’’ вуни’’ӈа’’. Тикым’ вадюданна’’ ӈацекы’’ ӈод теневабнандо’ тара’’. Сайнорма’ нямна лаханава’’ханярина танесеты. Ихиня сомбой урок’ мужества Антон Пырерко нювм’ мэта школахана ваерась, тарця урок’ тохолкода Оксана Егоровна Ледкова Надежда Николаевна Талеева библиотекахана манзарана нянда няюв’ хамадавэдись. Тарця урокм’ манзаям’ тохолкода Оксана Егоровна минредась. Пыда нися’ хасада сайнормы ненэць’ ӈэвысь. Нисяхаданда ӈока сайнормахана мэвы’’ серу’’ намдсеты’’, тамальӈгана ханярина саць вэвась. Сайнорма хурка ӈэвам’ теда вадюданна’’ ӈацекы’’ ӈод теневабнандо’. Сяӈок хибярина маня’’ яхадана сайнорӈаць, нянэй ненэця’’ хойхад’ хаяць, тыдо’ ханаць. Ӈокаюв’ ненэциена оленно-транспортный батальонхана мэвыць, пыдо’ Победа ялям’ хахаялтамбидось. Хурка литература’’ тикы нямна округна толаӈго’ хардахана таня’’, тикым’ Надежда Николаевна Талеева ӈацекэхэ’ манэ’’лабтадась. Толаӈго’ хардахана выставка’ нэяць, ханяна нина’’ ма’’лавэдось: хурка манзаи’’ паднана’’ хибярина Ӈэрм’ няна сайнормы ненэця’’ нямна падбавыць, тикым’ ӈод пыда ваде’’ ӈась. А.П.Пырерко нювм’ нюбета школахана тоходанна хасава ӈацекы Евгений Ледков Прокопий Явтысый сайнорма нямна падвы няхар’’ стихм’ толась. Тикахад’ ӈацекэхэ’ кином’ манэ’’лабтаць, ханяна манэ’’лабтабидо’ ханзер’’ маня’’ ненэциена Карельский фронтхана сайнормыць. Сямянд’ нертей ненэця’’ оленно-транспортный эшелонхана округхадана ёнар’’ хасуюёнар’’ тет ю’’ нертей по’ ӈэрё’’ хаяць. Ӈокаювдо’ пуня’ яхандо’ валакада ёнар’’ хасуюёнар’’ тет ю’’ си’’ивумдей похона тоць. Тикым’ вадюданна ӈацекы’’ теневабнандо’ тара’’.