Ӈока теневана’’ хибярина ханярина иле’’. Ханяӈыдо’ манзаина минрева’’ сер’’ торомдавына’’ ӈэсьтына’’, ханяӈына илева’’ сер’’ теневына’’. Хибяхова яӈгума’’ сер’ ихиняна вэва ӈэсьты’’.

Тюку ирийна няхарамдэй яляхана ӈани’ ихиня ниня’ сомбой юнм’ намдава’’. Анастасия Федоровна Михайлова (харта тензда Канюковась) яӈгума. Пыда маля ӈарка хибярись, небой по’’ ты’’ ниць’ ирий’ мат’’яӈганя толыркана си’’ив ю’’ помда нянэй мякана ядабтаваць. Тамальӈгана ӈока теневана’’ нида’’, перенида’’ мядоманзь’ ма’’лась. Няхата’’ маймбись. Маня’’ ихид’ ӈэда вадина нянда хэтбиваць.

По’ тамна ни’’ ваера, Анастасия Федоровна теневана’’ нида’’ ӈани’’ ма’’ла. Тюку’ мэвахана пудана’’ вадина’’, ӈэвна’’ хавравась хэвханда’ товаць. Хусувэй ихинянда нямда ханзер’ теневавам’ тензебтембись. Анастасия Фёдоровна Нюдя яхана саю’’похона соясь, ёнар’’ хасуюёнар’’ тет ю’’ няхарамдэй похона. Нися’ хасада сайнормахана, не нюкцянда со’’ямам’ ехэрась, яӈгумась. Ленинград’ маркы хэвхана Синявином’нюбета ӈэсыкоцяхана братской могилахана сюры. Небя’ хасада хойхана мюсерць не нюмда вададась. Анастасия Федоровна школамда ёльце’’махад’ Архангельск’ маркана мединститутм’ ёльцесь. Нисяси’ вадюданась незел’’ нись’ ӈа’’. Ӈока маедормам’ манэ’’макы. Институт’ пуд Анастасия Федоровна ӈока по’’ ямбан округханана лекарьӈэ’ тарась. Сямянд’ нерде Харутахана манзарась, тикахад’ Няръяна март’ тэвась Искатель’ ӈэсыхы геолог’’ амбулатория’ лекарясь. Манзаямда теневана, мэнена некоцясь. Илан’ сибицювна сырӈась, хибярихина савась. Хуркари’’ манзаяхад’ сейда нисьты’ пин. Ӈока округмана ӈэдалёрцеты. Нюдяко нюда мяканда хаесь тоходанвась ханцеты.

Харта вадамда теневана несь, ненэцие’’ культурам’ сававна теневась. Ида’ тикы нямна пилибт’ няркнасьты. Школанда’ пуд ӈопой по’ ямбан няръяна мякана манзарась, тикахад’ пенсияхана мэсь округна этнокультурный центрхана ненэцие’’ отделкана манзарась. Тамальӈгана нюртей нянэй мя’ маркана ӈадимясь, таняюв’ округна хибяри’’, мядондина’’ турцеты’’. «Тедарма» коллективхана сянакусь, тикахад’ «Илебц» театрана сянакодаӈэ’ тарась. «Сава сё» фестивалькана хыноцеты. Хуркари’’ общественный манзаяхад’ нисьты хадю’’, «Ясавэй» ассоциацияна манзаям’ нерня минресь ӈока нядагосьты. Анастасия Федоровнам’ округханана ӈока хибяри’’ теневадось. Хусувэй теневана хибяри ихиня сававна хаюда. Тенеӈгува’’.