Индига’ ӈэсыхына тохолкода Татьяна Юрьевна Давыдова манзара. Тикы тохолкода’ няюв нини’ маля няхар’’ юд’ мян по’’ ямбан теневыни’. Радиона манзараван’ мальӈгана Няръяна март’ тобнанда, харта ӈэсында, манзаянда нямна ӈока вадам’ мэцьты’’.
Тюку ирийна си’’ив яӈганя толыркана Татьяна Юрьевна мат’’ ю’’ помда ядтась. Маля ӈарка не, мэбета тохолкода. Тюку’ мэвахана Няръяна март’ «Учитель года» конкурсан’ товысь. Заполярный районхана’ пирдырта’’ тохолкода’’ поӈгана нюртей этапхана нерня тарпвыць. Нябимдей этапамдо’ теда мэ’’ӈадо’.
Татьяна Юрьевна харта тензда (Соболева ) ӈэвысь. Тиманской выӈгана соявысь, тет юд’ мян’по’’ ямбан Тиман’яхана манзара. Со’’яма, манзарава янда нямна тарця вади’’ мэ’’ӈась: – Мань’ Тиманской выӈгана соямась, Болванской сопка хэвхана. Таняна яхако лохорӈа, теда тикы яхакоцям’ – «Танькин ручей» нюмдембидо’. Някав’ ма’’нисяв’: пыдар’ е’’эмнят яхако’ тарем нюмдебэй, таняна соянась. Нюмда тамальӈгана яӈгувысь, тикахана мавыць таремъюв’ нюмдевы ӈэя. Харн’ со’’яма яхан’пилибт’ хэван’ харвасетым’. Тедахова ханзер тэвгув’? Маля ӈэдалёрць я’’амам’, ӈамгахэвахана ӈэдалась’ тарава’’. Няв яӈгумась Соболев Прокопий Иванович, хуний танямна ӈэдалёрӈась. Маттамдэй ӈэсына пыда манзарась. Харн’ со’’яма ян’ нямна стихотворением’«Тиман’ выӈгана сояманзь.» падамась.
Небя’ хасав Ксения Игнатьевна Соболева сим’ вадабись, саӈго’’воць илесь, ӈокавна манзарась. Тет ю’’ поӈэ’ маля’ хая ханзер’ яӈгумась. Война мальӈгана манзарась, яв’ варувна Матрена Захаровна Апицына ня’ военный экспедиция’ ям’ лэтбада’’ хибяри’’ тэвобихись. Пыди’ ям’сававна теневадись, хасава’’ яӈгуць, сайнорман’ хэбэяць. Самляӈг ю’’ нюртей – самляӈг ю’’ нябимдей похона небяв’ культпросветшколам’ ёльцевы. Тикахад’ яханана «Няръяна мякна» манзарась. Мань’ тенебан’: вымна ӈэдалёрцетыва’’, киномеханиква танесеты Двойников Николай Мотеевич, Малыгин Эдуард Яковлевич. Маймбасьтывов’ ӈацекэӈэ’ кинон’ сырман’ харвасетыва’’. Тад’ хоба’’ни ӈамдгуна’’, сэрако экранан’ сыртава’’. Тикахад’ фельдшерма’ танесеты. Маня’’ мякнана флагма танясь, антеннава, журнална’’, книгана’’ ӈока ӈэсьты’’. «Тиманец» колхозхана сян’’ ӈэсы’’ танеса’’ хусувэй ёльцяӈгана ӈэсысятыва’’. Хусувэй ӈэсына илесетыва’’, просветительской манзаи’’ сертабасьты’’. Тикахад’ мань’ школан’ хэвндямась, небян’ ня хардан’ ха’’мынись илевась. Небяков’ зверофермахана манзарась. Выучейскойхана илеваць, таняна ненэцие’’ школа’ ӈась, таняна тоходанась пявась. Тикахад’ сидя по’’Няръяна маркана санаторной школахана тоходанамась. Маркад’ то’’махадан’ Индигахана тоходанась пявась, небяв’ таняна маля манзарась.
Школана директор Тамара Николаевна Апицына саць савась, мань’ сим’ нерня тоходанвась’ табадась. Ма’’нисяв: – пыдар’тохолкодаӈэ’ тоходанвась’ хантан’. Мань’ ӈод’ инян’ мам’: тарадак тохолкодаӈэ’ хэсь, хаям’, тоходанам’. Педучилищен’ томась сиднтет класс’’ пуд. Тюкохона Валентина Артемьевна Ханзеровам’ ядтамась. Ненэця’’ вада урокан’ инян’ саць харвасетым’, маймбась таня турцетым’. Харн’ вадав’ намдурць, сейханан’ саварха ӈэсьты. Педучилищем’ ёльцесь, 1975 поход’ ненэця’’ вадам’ пэрӈам’ харн’ школанан’, харн’ ӈэсынан’. Сян’ манзарам’, таӈок по’’ ненэця’’ вадам’ пэрӈам’. Манзаяв’ саць мэнев’, теневав’, ӈацекын’ харвась тоходана’’. Тикы нянан’ маймбцо.»
Тет юдимдей по’’ маля Татьяна Юрьевна Давыдова Индига школахана манзара. Сяӈок ӈацекым’ тохолавакы теда толава серта яӈгу. Нюртей тохоламбавыда маля ӈарка хибяри’’, ханярина харто’ иле’’, манзара’’. Тохолкодамдо’ тенедо’.
Манзаямда мэнена нява хаювы яля’’хана мат’’ ю’’ помда ядабтась. Сава илевам’ мэ’’та не, няхар’’ нюмда вадась, теда нюта нюкци’’ вадабась нядаӈгосьты’’. Харвабтана манзаямда ӈод’ тамна минреда, ӈока ныхымда манзаяханда масьтебсеты’’.
Тюку яля’ Татьяна Юрьевнан’ сейхад’ ӈэда’’ вадин’ мэ’’ӈадм’: сензан’ ӈа, ӈоб нерня ненэцие’’ вадава, культурава минре; сава ихиня хусувэй товы ялямд’ ядтабю.
