«Няръяна ӈэрм» нюбета газетахана Няё Вэнго манзара, пыда явнанда ӈэдалёрманда’ сер ӈока лаханако’’ падбасеты’’. «Хасава ӈацекы» лаханако нюртей’ пелямда тюку яля толада’’.

Нянзяда Мынико Итя Ӈабтеня яв’ сядо’ нимня мерця’ сер’ пу’’лары. Тарем’ сырпата, хасава ӈацекэця яв’ мраковна сюрамби. Маниеб’’нанда, ӈудаханада ӈоб’ неро ӈынеӈгада, сидя неро лукцяда. Сидя неро муӈгацямда минда ед’ ӈэдаб’’нанда, ян’ ха’’амванди’ нерцю’ ните’’катанди’ ня’’марцетыхаюда.

Нянзяда Мынико хасава ӈацекэцям’ пуданда нёдал’’ӈада. Хасава ӈацекэця си’’ив’ яля’ сюрамби. Неранда няна ямӈгад ня’’вота хасрё’ сё танявы. Хасрё’ сён’ пыда табы’’, сёда ёря ӈэвы. Хасава ӈацекэця хасрё сём’ танда сюрбы’. Танянанда хунананда хасре’’эн’ та’ тэвы’. Хасрём’ сюрте ярха’’ халэв’’, ӈопой’ тёрдо’. Ӈоб’’ халэ’’ ню’ ня’’амбато’, тикыдо’ пидыдо, нидо’ хада харва’’. – Ка-ха,ка-ха, ка-ха! Ка-ла,ка-ла, ка-ла! – халэв’’ тёры’’ӈа. Ӈэва лекаӈга. Хасава ӈацекэця хасрё’’э хэвхы хой’ ня’ пыда сюрбы’. Хасрё’’э хэвхы хой’ ниня ӈоб’’ ной мя’’. Техэ мят’ тэва, мят мя’’ тю. Сидяда сэвда тум’ сиде’’ӈаха: мякна сидя ва’’авдо’ ӈэвы. Няби хэвхана халэв силер’ ваделта. Няби хэвхана халэв вэсако. Халэв вэсако ва’’ав ерня мякы ваделта. Ва’’ав нёняӈы малхана халэв пухуця ӈэӈгоданакы. Халэв вэсакохо’, пухуцяха’ ва’’ав ниня пыди’ та ваделтаӈаха’.

Халэв’ синякуна, ва’’ав малхана ӈоб’’ халэв’ силер’, ва’’ав ниня ваделта. Хасава ӈацекы тарем’ сырпата, мяд’ мюня ненэцяӈгав ӈоб’’ яӈгу. Халэв вэсако’’я ӈоселабтада, манзь ханада: - Хасава ӈацекэцян ӈэвананю’. Ёртини’’ таняць, ховы ӈэбат? Пэвсюмя’ няӈы едандо’ тер мэдамдо’ хадабатум’? Хасава ӈацекэцяр манзь ханада: – Ёртид’’ ти’’ ӈэдакы’’: палкаридо’ сило’’ла’’. Ӈоб’’ халэ’’ ню’’ хадабато’, та’’вавдавэй’ нихимбидо’. Ӈобо’ халэ’’ ню’’ е’’эмня нидо’ хада харва’’. Ханесэхэвадо’ манэтами’ яӈгу. Тёркодо’ тёр: - Ка-ха, ка-ха, ка-ха, ка-ла, ка-ла, ка-ла».

Халэв вэсакор мунзи’ тебкада. Ӈамгэ’ пиркана халэв’’ сабна това’’нондо’. Мят’ тюӈгалъяд’’. – Ёртикоина’’ товэданю’’, халякоедамда’’ хадабатам’’? Манзь ханадо’: - халя хаданава’’ вуни таня’. Ханяӈына’’ тикахандо’ вуду’’ма’’.

Халэв’ вэсакор манзь ханада: – Хадананда’’ яӈгоб’’, хасава ӈацекэцяра’’ ӈамада’’. Таӈок’’ халэв’’ хасава ӈацекэцямдо’ тодо’ яха’’ нэхэ’’ӈадо’. Ӈобкарт ютекэцяда ни хаю’. Нянзяда Мынико хасава ӈацекэцянда хахава, ӈэванда сер’ пу’’лэй’’. Яв’ мран’ ха’’мы’. Яв’ мраковна неры’ то’’олха хасава ӈацекэця сюрамби. Мальцякоцямда ӈули’ тю’’умна сярвэда. Сюрамбаб’’нанда сидя енядакода мальцянда панан’ теберӈаха’. Неро ӈынеӈгам’ ня’’амбавы. Сидя неро лукцямда минданда ед’ ӈэдабата, ян’ ха’’амванди’ нерцю’ ните’’катанди’ ня’’марцетыхыюда – та’ пирувнанда сюрамби. Минданда е’’ня ямӈгад ня’’вота хасрё танявы. Хасрё’ сё ёря ӈэвы. Хасрём’ тю’’уня’ тандада. Хасрё’’э певхана ярха’’ халэв’’ ӈопой тёрдо’. Ӈобо’ халэ’’ню хадабато’, нидо’ хада харва’’. Тарем’ нид сюрамба маниебта, халэв’’ мал’’ ӈавормы’’ то’’олха’’, ӈохоюдо’ мал’’ пан’’ӈа’’. Хасрём’ сюрте хасрё’ ӈэва’ ня’ сюрбы’. Хасрё’ ӈэвахана ӈоб’’ ной мя’. Хасрё’’э танёда танявы. Танё’ мал ӈани’ хасрё ӈэвы.

Тикы хасрё’ певхана ярха’’ хуряв’’. Ӈобо’ халэ’’ ню хадабато’, нидо’ хада харва’’: ӈопой тёрдо’. Тикы хасрё ӈэвахана ӈани’’ ӈоб’ ной мя’. Нянзяда Мынико тарем’ хода: Хурёхо вэсако’ мя’ ӈэдараха. Няби мя’ хадрё’ Халэв вэсако’ мя’ ӈэдакы?

Хасава ӈацекэця таль’’няӈы мяд’ ня’ сюрбы’. Мят’ мятю. Мякы мякна сидя ва’’авдо’ ӈэвы. Няби хэвхана ӈоб’ халэв’ силер’ танявы.

Лаханако малда тамна ни’’ӈа’’.