Та’ мальӈгана янда’’хана’’ хуркари’’ фестиваль’’ минзьты’’. Тарця фестивалька’’ ӈэрм’ тенз’’ мэта’’ ненэця’’ ӈод’ тэворцеты’’. Няръяна маркана илена’’, харто’ ӈудидо’ мэта’’ мел’’ хибярина’’ тарем’ еримбнанда  ӈобтарем’ тарця фестивалька’’ ӈэдалёрцеты’’. Тюку ирийхана Ханты-Мансийский округ’ Урай маркана луца’’ вадавна хэтась – «Х1 Международный фестиваль ремесел коренных народов мира «Югра-2016» ваерась.

Таняна юр’’ самляӈг ю’’ мастер’’ Россияна тет’’ яӈганя регионхад’, тет’’ ӈани яхад’  ма’’лавыдаць, хусувэдо’ харто’ манзаидо’ тэвравыць. Невхы’’ похо’’на илевы’’ нина’’ ӈоб мел’’ ӈэвыць, ханяӈы тамальӈгана сертабавы манзая’’ тены’’ похо’’на юрвы’’. Ханяӈы хибяри тарця манзаи’’ ихиньдо’ таслабидо’, невхы’’ хаювы падар’’мана тарця манзаи’’ сертабась несэювна тоходана’’. Тюкумэвахана фестивалькана тарця серт’ ӈани яхат’ товы’’ нидо’ тохолабиць. Мел’’ хибяри’’ фестиваль’ ёльце сававна хамадавы’’ ӈэвысь. Маня’’ округхадана Галина Анатольевна Артеева таняюв’ тэворӈась. Тикы не’ сэдвы манзаи’’ теневына’’, ӈока округна еркы маркана танеда’’ выставкаха’’на’’ маниесьтына’’. Мел’’ нява’ «Мел нехэна» нита’’ няюв ӈахэт’ маля сэдора.

Яндахат’ товы’’ ӈудидо’ мэта’’ хибяри’’ мат’’яӈганя номинацияхана пирдырӈаць’’. Тарця фестивалян’ товы’’ хибяри’’ мастер-класс’’ манэ’’лабтабиць, тикахад’ хусувэдо’ сян сяс’ ямбан сертавы’’ манзаямда конкурсан’ тэврадась. Сертавы’’ манзаяхат’ сямянд’ сававна сертавыдо’’ жюри’’ таслабидась. Хусувэй мел’’ хибярит’ манзаянанда’ харта мэбебцода’’.  Хибяхова манзаямда няхар’’ сяс сертабидась, хибяхован’ сидя яӈганя сяс’ тянёлэяць. Хибяри’’ пихиня манзараць. Сава нум’ яляхана фестивалян’ товы’’ хибяри’’ сырӈаць: ханзер’’ненэця’’ манзара’’. Хибяхова пэвна, пявна маторась; хибяхова няха’’бахад’ манзам’ сертабись, хибяхова ӈодякоход’ паской манзаям’ ма’’лась, берестахад’ сертавы манзаи хибяхова падтабись, халя’ хобахад’ сертавы манзая таняць. ӈэрм ненэця’’ ӈухуко’’ сэдбиць. Галина Анатольевна ӈухукоцям’ ембпись. Пыда нянэй ненэця сянако’’ нямна лаханась. Пыда’ хэвхананда ма’’лёда хибярихина маня’’ ӈухукуна’’ мэкадархаць. Ханзер’’ ӈухуко’ сэдбада? Тикы нямна хонаркода’’ хибяри’’ тянё нивыць’’ӈа’’. Галина Анатольевна вадавна:- сидя яӈганя сяс’’ ямбан мань тет’’ ю’’ сантиметр’ пир ӈухукон’ е’’эмня  пимя’’дамда, имбытадамда, паныдамда сэдамась.

Тарця фестиваль мальӈгана ӈацекы’’е’’эмня творческой мастерской «Подворье» манзарась, ӈацекы’’ сидя яля ямбан манзарась тоходанаць, харто сертавы манзаяхато’ маймбиць. Хибя’’ тенева’’ харвабнанда тарця ӈацекы’’ поӈгахат’ нерняна манзараванда мел’’ хибяри’’ танедакы?

Тикахад’ мел’’ ненэця’’ фестивалян’ сырманзь’ товы хусувэй маркана илена’’ хибяри ихинянда сомбой манзаям’ ярмаркахана тэмдась пир’’ӈадась.

Урайхана ваеравы фестиваль’ программада ӈарка ӈэвысь. Хибяри’’ манзаидо’ сертабава поӈгана’’ семинаркана манзараць, тикахад’ Учинский музеян’ тэворӈаць, «Силава» нюбета этностойбищен’ ядэрӈаць.