Таӈы’ мальӈгана ӈокаюв’хибярина ныланава ялудо’ мэ’’ӈа’’. Хибяхова иба’ яхана нылана’’, хибяхова хоян’ еримзь варёмдо’ мэць иле’’, хибяхова нюдяко ӈэсыхыкоцяна нылана’’.

Валакада культура’ серкана манзарана’’ нина’’ таӈы ирийхана ныланавам’ ехэрасьты’’. Пиликов’ ханяхова ӈэдалась тарасеты. Тарем’ ӈод нянэй ненэцие’’ культурам’ тю’’увку минрена’’ нина’’ ӈобтарем’ ӈэдалёрӈа’’. Ваеравы ирийхана нина’’ маля Архангельскан’ ӈэдалёрӈаць, тикахад’ Валентина Ивановна Тайбарей ӈысма’’ нита’’ поӈгана Ижман’ тэворӈась. Ӈысма’’ яхана «Луд» нюбета ӈарка ялядо’ танесеты’’. Тюку’ мэвахана сидндетимдеймэвна ваерась. Сидя ёнар’’ самлязимдей поход’ Ижмахана хамандабда хэбидя ялядо’ республиканскойӈэ’ таславы. Тюку по’ тарця яляхана ханярид’ товы’’ мядонда’’ ӈока ӈэвыць. Сыктывкар, Ухта, Инта маркад’ хибяри’’ товыць, тикахад’ Ӈысма республика Корткеросской, Усть-Цилемской районхад’, Ямалкана илена’’, тикахад’ Ханты- Мансийский округхана илена’’ ӈысма’’ товыць, Мурманский областьхад’ таняць.

Маня’’ округхадана ядэрмы’’ нина’’ тянё ниць’ӈа’’. Пыдо’ ӈысма’’ нито’ поӈгана харто’ программыдо’ манэ’’лабтамбиць. Этнокультурный центрхад’ ӈысма’’ фольклорный коллектив «Печорянка», «Коми чукор» клубхана мэна’’ таняюв’ тэворӈаць. Тикахад’ округна ӈэсыхына манзарана’’ ӈысма’’ коллектив’’ – Харутахад’ «Войвыв дзоридз», Хонгурейхад’ ӈысма’’ сё’’ мэта’’. Ӈысма’’ яхана «Луд» хэбидя яляхана нянэй ненэцие’’ сё’’ӈод соць. Няръяна маркад’ Валентина Ивановна Тайбарей ӈэдалёрӈась, тикы нява «Илебц» театрхана маля ӈахакуд’ хынотаӈэ’ тара. Сёда ёльце сомбовна сеян’ еримберцеты.

Тарця ялямдо’ Ижмахана хусувэй по’ мэцьтыдо. Мал’’ хибяри’’ ныланавась тарпсетыд’, сидя яля’’ ямбан хуркари’’ ихиня сомбой сер’’ танесеты’’. Сё’’ мэта хыноцеты’’, тарана’’ тарасеты’’. Хуркари’’ яхад’ мирдатна’’ хибяри’’ ӈод тосьты’’. Хари’’ ӈудаханато’ сертавы’’ манзаидо’ мирдапсеты’’. Ӈамгэм’ таняна нин’ хоӈгу- хуркари’’ ӈухуко’’, сянако’’, сярвы’’ ӈавори’’. Тикы’ поӈгана ты’’пэртя’’ ӈод харто’ ӈаворидо’ тэврабсеты’’. «Ижемский оленевод и К» СПК тюку’ мэвахана пиви’’, тапки’’ мирдапиць. Хуркари’’ ябцавы’’ ӈавор’’, ӈамдэд’ сяйм’ мирдапда’’ ханярина мирдатаць. Мел’’ хибяри’’ мастер-класс’’ сертамбиць. Ӈамгахэвам’ сертаван’ харвана’’ тоходанаць. Сидя яля’’ ямбан ваеравы сер’’ ӈокаць. Ӈысма’’ вада ханярина сось. Хибяри’’ харто’ вадавнандо’ лаханаць, стих’’ толабиць, сё’’ мэӈаць.

Тюку’ мэвахана Ижмахана ӈока хибяри’’ ма’’люрӈаць. Хусувэй яхад’ товы’’ харто’ ембдяродо’ мэ’’ӈаць, харто’ вадандо’ хара, харто’ сянакудо’. Хуркари’’ я’ тер’’ ӈысма’’ ӈобт’ ма’’лась, нидо’ хамандабась ӈарка яляхана ныланаць. Ӈарка хибяри’’ поӈгана ӈацекы’’ ӈод ӈокаць. Мал’’ ӈацекы’’ ӈысма’’ вадаривна лахана’’. Иринато’, хадунато’ тэвравы илм’ нерня минре’’, вадамдо’ лэтби’’. Тарем’ ӈэбнанда нив’ тара.

Тюку яляхана маня’’ яна выӈгана мюсерта’’ ненэциена ты’’ ялямдо’ мэӈа’’. Таняюв’ ӈод культурам’ пэртя’’ нина’’ ядэрта’’. Тарця яляха’’ нина’’ маля ӈахакуд’ хамякуць. Пилю’’ ирий нябимдей толыркана «Ханебцёва» Канин’ ян’ ӈэдалаӈгу. Канин’ выӈгана мюсерта’’ нина’’ нянэй ненэцие’’ сёхо’ инзелеӈгу’’. Тикахад’ «Ямб’ то» няюв’ хэвндя ӈани’ таня. Харто’ ватовнандо’ илена’’ ненэциена маймбась Няръяна маркад’ товы’’ нидо’ ядабтабсеты’’. Тюку’ мэвахана ӈод’ нидо’ маймбтевась сё’’ мэта нина’’ ханта’’, ӈока нибнанда ӈа’’ӈод танеӈгу’’. Хахаяда ӈэсыхы хэвндина ӈобтарем’ таня. Нельмин’ Саляхана манзарана’’ нина’’ семейно-родовой община няку тэворта.

Маня’’ ӈод манэ’’мы ява’ танеӈгу, тикы нямна паднаӈгува’’.