Сян’ яля’’ ваерась пилю’’ ириян’ тэвӈгуна’’. Тикы ирийхана маля самляӈг ю’’ нертей по’ маня’’ округханана иленаӈэ’ хэбидя ялям’ мэтава’’- ты’’ ялям’. Хойхана мюсерта’’ ненэциена харто’ манзаяндо’ ӈарка ялям’ невхы похот’ пилю’’ ирий нябимдей толыркана мэцьтыдо’.

Невхэна нина’’ Ильин’ яляхана ӈобт’ ма’’лась ныланасьты’’. Пудана’’ похо’’на ты’’ ялява сямянд’ нюртейна неняӈг’’ ирийна пудана яляхад мэцьтыдо’. Тюку по’ нянэювна ты’’ ялява’ пилю’’ ирий нябимдей толыркана ваераӈгу. Сямянд’ нюртей тиртя’’ӈано Холгован’ маля товнда си’’ив нюртей яляхана тиӈгу, хоян’ тарана ӈавори’’ тэвраӈгу. Неняӈг ирийна няхар’’ юдимдей толыркана «Харп» СПК сидндетимдей ӈэсыхына ты’’яля ваераӈгу, тикы ӈэсы серм’ пэртяӈэ’ маля ӈахакуд’ Максим Ледков манзара. Тикы ӈэсыхына нидо’ ӈате’’. Тикы’ пуд янамбовна ханярина ты’’ ялян’ хибяри’’ ма’’люрта’’. «Няръяна тэхэна», «Ервхана», «Канинхана», Нельмин’ Саля семейно-родовой общинахана, «Дружба народов» СПКана, «Ямб’ тохона». Няръяна маркана илена’’ хибяри’’ ӈод хой’ тер’’ ненэцие’’ ялям’ мэтадо’. Тюку’ мэвахана тарця ялям’ мэ’’манзь ӈани’ «Нерденя» семейно-родовой общинахана ма’’лаӈгуна’’. Пилю’’ ирийна юдимдей толыркана таняна хойхана ӈока по’’ ямбан манзаравы’’ нина’’ – ветеранна’’ ма’’лаӈгу’’. Пыдо’ ихид’ ӈэда’’ вади’’ намдгу’’.

Тюку’ мэвахана маня’’ яхана ты’’ ялям мэ’’мава’’ манэмась ӈани’ я’ тер’’ мядонда’’ товась’ ятна. Я’малкана, Таймыркана нянэй ненэця’’ иле’’, пыдо’ вымнандо’ ты’’ хадырӈа’’, таняна ты’’пэртя’’ иле’’. Тикахад’ Тюменский областьхад’ хибяхова тован’ харванарха. Я’малкана илена’’ нина’’ тюку’ мэвахана «Ямб’ тохона» илена’’ ненэцяӈга тэворман’ харва’’. Таняюв’ товнда серудо’ харто’ яханандо’ тасламбидо’. Хари’’ тыдо’ пэртя’’ ненэциена ныланава ялян’ Я’мал нина’’ небой’ по’ тотрев харто’ вертолетхандо’ товась’ мэнарха. Таймыркад’ товнда ненэць’ Николай Николаевич Маймаго Долгано-Ненецкий муниципальный район’ серм’пэртя ӈуда ӈылы, пыда ӈод’ «Ямб’тон’» еримян’ харва.

Маня’’ яханана мюсерта’’ ненэциена ӈарка ялямдо’ ӈатедо’, тарця яляха хамяку’’.