Маня’’ яханана хуркари’’ выӈгана мюсерта’’ ненэциена хэбидя яляхандо’ хамяку’’. Минрена’’ манзаито’ ӈарка ялям’ мэ’’мась хойхана илена’’ нина’’ хусувэй по’ пилю’’ ирий’ тось мэцьтыдо’. Тюку по’ ӈод таремъюв’ ӈэвндя. Ты’’ ялям’ округханана тюку по’ неняӈг’’ ирий’ пудана толыркана нэӈгува’’. Сямянд’ пуданаӈэ’ маркана иленаӈэ’ мэтава’’. Ты’’яля това нерцюна округна делегация’ Всемирный конгрессхана манзаравнда. Нина’’ Китаян’ ӈэдалавась’ хамяку’’.

Китайхана ӈод’ ты’’ таня. Ханзер тикы яхана тыдо’ пэръядо’ тарця серм’ манэ’’манзь тюку ирийхана я’ сяр ниня’’ манзарана’’ ты’’пэртя’’ тикы яхана ма’’лаӈгуд’. Маня’’ округхадана ӈод’ таняюв’ хэвндя делегация’ таславы. Неняӈг ирий’ сидя ю’’ самлязимдей сидя ю’’ сидндетимдей толыр’’ ӈэсонд Китайской народной республика Генхе маркана Всемирный конгресс оленеводов ваераӈгу. Тарця конгрессан’ хуркари’’ я’тер’’ ты’’ пэртя’’ ма’’лёда, самлязимдеймэвна тарця ма’’лёян’ ма’’лаӈгуд’. Маня’’ округхадана самляӈг хибяри’’ таняна манзаравнда. Ӈахы’ ян’ хэвндя поӈгана Ольга Владимировна Явтысая Нельмин’ Саляхад, тикы не «Вы’ту» семейно-родовой община серм’ пэртяӈэ’ тара. Харта ты’’пэртя ненэцие’’ мякана соявы, вадювы. Нися’ хасада илеванда ямбан «Выучейской» нювм’ нюбета колхозхана тэхэна мэсь, небя’ хасада мядм’ манзаям’ пэртяӈэ манзарась. Не нюди’ ӈод ты’’ илм’ нида хаембю. Вэсакомда, хасава нюда нядабась хойхана нянэй мядм’ мэць иле. Тюку по’ «Сямянхат’ мерета» пирдырмахана Ольга Владимировна не’’ поӈгана тэхэна ӈэдалёрмахана сямянхат’ меретаӈэ’ хаясь. Пыда тыда’’ нюртейӈэ’ финишан’ тэвыдаць. Мядонзэйӈэ’ мирета снегоход’ ня’’амась. Тикы общинандо’ е’’эмня саць тарана ӈамгэ.

Алексей Ледков ӈобтарем’ Саля’ тер ненэць, пыда ӈод’ илеванда ямбан тэхэна манзарана хибяри. Хойхана вадювы, колхозхана ты’’пэртяӈэ’ манзаравы. Колхозандо’ яӈгумзь ида ядэлыць: ханзер нерня илесь, тэси’ хаёва сер’ вани’’ӈа’’. Тикахана пыда ӈобтарем’ семейно-родовой общинам’ сертась. «Нерута» общинахана тыдо’ пэрць Нюдя явна теда мюсерӈа’’. Харто’ тыдо’ пэрӈа’’, ямдо’ сахарамбась харто’ манзаидо’ минре. Хибяхартан’ нись’ ена харто’ илевамдо’ нерняри тасламбидо’. Манзаядо’ таня, тыто’ толыр’’ ӈарумдаби, нянэй ненэцие’’ илм’ мэць иле’’.

Тамна конрессан’ хэвндя поӈгана Андрей Терентьев «Ижемский оленевод и К» СПК зоотехник – селекционер. Николай Латышев тикы нява нись’ ӈахакуд’ «Восход» СПК серм’ пэртяӈэ’ тара. Пыда ӈод’ ты’’пэртя’’ мякана соявы, вадювы. Нюдякоданда тэхэна мэнась, ты’’пэрма сер’ савовна теневада. Харвабнанда сян по’’ ваерась «Восход» СПК серудо’ тю’’увку’ ханта. Падарм’ теневана нява тарця серт’ ныхымда масьтеӈгу.

Округна делегациям’ ханавнда Юрий Хатанзейский губернаторна ӈуда ӈылӈэ’ тарана нява, ӈэрм’ тенз’’ ненэцие’’ серу’’ тасламбада управление’ серм’ пэртява.

Тет яля’’ ямбан нина’’ ты’’пэртя’’ конрессхана манзаравнда. Хурка серу’’ ваеравнда ма’’лёвахана ханярид’ товы’’ ты’’пэртя’’ таслаӈгу’’? Мал’’ тикым’ нина’’ пуня’ то’’омахад ваде’’тадо’. Несэй юн’’ яхандо’ тэвраӈгу’’.

Россияхад’ конгрессхана манзаравнда хибяри’’ ӈани’ ӈэрм’ яхад’ ӈод ханта’’. Ты’’пэртя’’ ма’’лёвахана манзаравнда Дмитрий Хороля «Союз оленеводов России» президент, Григорий Ледков Всероссийский ассоциацияна президентӈэ’ тэравы нява.