Няхар’’ тэта Нохо си’’ми вадавы’’. Нябакоми таня. Тэхэвава’’ тэва’’ – тет ёнре’’э. Ханахавава’’ тет ю’’хурёда.

Хуркаси’’ –хараси’’ няхар’’ ямб по’ таня илева’’. Ся’’ны ӈэбта ӈод’’ няхар’’ охоми ӈобт’ ӈамдавыд’’. Немами малесь, хар’’ни ини сер’’ пин’ хан’’ӈадм’. Инзелеб’’нани няхар’’ Нохоми тарем’ тасалкурӈа’’. – Ӈарка Нохоӈэ недамд пюркава’’.

Ӈарка Нохо пыда тарем’ ма: – Мань нянани не ни тара’’. Мяканани мань си’’ив неми.

Латани таборт хось я’’амадм’. – Ёнэй Нохоӈэ, не нянанд ни тара’’? Ёнэй Нохо ӈани’ тарем’ ма: -Ӈари’ мань ӈод’’ неми, тет неми. Са’’ен’ са’’лемядм’.

Нюдя нохо ӈани’ тарем’ маси’’: – Нянани не ни тара’’. Мань сидя неми.

Тикахавахана Сэр’’ я’ ӈацекэ няна’’ нед пюркава’’. Ӈарка Нохоми ӈани’ тарем’ ма:

– Си’’ив ӈэсоӈгана, юркад яӈганя си’’ив Сэв сэр’’ си’’ив не нядо. Нюдя не нямдо’, няби ӈарка не нямдо’ хоць тараӈаха’. Тарць’’ харахана мань сер’’ми яӈгу. Мякани тюдм’. Хуняна Ӈарка Нохо мякани товы. Си’’ми юркабтамба няби ӈарка пенда пайдэни ӈыламна ӈэдабтавэда. Ӈамда пяв. Едава’’ пява’’. Едава’’ ӈамава’’. Ӈарка Нохоми манзь ханада: – Теда’ тюку яля’ ядэртава’’. Ӈадяда я’’амна ӈэдалёртава’’, пыдар ӈод’’ тутан.

Ӈарка Нохоми тиканда хаянё’’. Тет ёнре’’эм’ сюрлабтэйдо’. Пой ӈутокы ханами сидя пыяхад тю’’у’ нэкалӈав. Наронда ӈылад мюданда савакам’ нэкалӈадм’. Есь’’ тахаруй тынзями ня’’амадм’. Тиканда Ӈарка Нохоми ты ныдабта. Тына ёркалъяна’’. Пыда тет хорсе’’э тым’ сяра. Ёнэй Нохоми тет падвы’ тым’ сяра. Нюдя Нохо тет парисе’’эм’ хабтам’ сяр’’ нив’. Ӈари’’ маньзяван ёнар’’ помна сэвари мэ’’ӈадм’. Ёнар’’ поӈгана мэ’’мани пир тым’ нидам’ манэс’’. Ты’’ техэ’ варувна тет ладсэр’’ ты’’ няватормы’’. Нерня мэтамдо’, есь’’ тахаруй’ ярка пяв. Тынзями тад мовани салтана мярада ӈодь’ серибтей’’. Нерня мэтадо’ тад нэкалманда няхар’’ тархалъяв’’. Тахав’ янема. Тарси’’ манэць янахав’’ ӈэвы’’. Мэтидо’ пелейдо’ пунда ялъяд’’. Мэта ханахани подер’’ нивав’. Няхар’’ Нохоми, ханодо’ подерць ханодо’ валӈа’’. Хэсянд яхана’’ пили’’ ӈэдалэйна’’.

Сёда хэӈгада. Тет ладсэр’’ сава’’ ты’’ ӈэвы’’. Няхар’’ ӈэдалёда хараси’’ ӈэдалы’’. Няхар’’ си’’ивахав’ пиняри’ миӈава’’. Паӈгарка соты ниня’’ харбилы’’. Нерденетава’’ сотэ’ ӈэва’ ни’ варцадтеда. Миндана’’ е’’эня си’’ив юр’’ мя’’. Я’ тер’’ мандалавы’’. Тарем’ сырпа’’ни: Си’’ив юр’’ерня си’’ив ю’’ мя’’. Си’’ив юд’ерня си’’ив ӈарка мя’’. Си’’ив Сэвсэро’’ мяд’’ ӈэӈгоданакы.

Ӈарка тэта Нохоми пыда тарем’ маси’’: -Мядона’’ такы’’.

Мядо’ нё’ няд маня’’ ӈадимява’’. Вадо’ няби хан’ нултава’’. Вадо’ махарин ха’’мась пяв. Нюдя тэта Нохо’ савакам’ екась, мят’ яда’’ нив’. Ӈарка тэта арка тэта охо нита маханяӈы мят’ мялкада. Нини мят’ тю’, мяк’’ мятю’’. Мань ханани ниня та’ ӈамдё хаидм’. Тюми нароӈоць манзелабтав. Харини ярэлы’’. Мякы мякана Ӈарка тэта арка тэта охо тарем мамононда: -Ваян Сюдбя, ӈамгэ серо’’ нид тев’ тэвын?

Ваяр масьнё’’: -Нендава’ е’’эманя тев’ тэвыв’’. Ӈарка тэта арка тэта охо пыда ӈо’’ масьнё’’: – Ӈари’’ мань ӈод’’ ӈани’ тарця сер нид тев’ тэвъяв’’. Мань сидяхавм’ хоӈгудм’.