«Ялумдханана» паднана’’ нина’’ манзаи’’ падбасьтыва’’. Тарем’ ӈока манзаи’’ толадаць. «Таты» пьеса’ М.И.Талеева падвы манзая. Сян’’ пелямда маля газетаханана хомбираць. Тюку яля’ си’’ивумдей пелямда толада’’.

Вэн’’ мадлыд’’, ты’’ то’’, сую’’ туроӈа’’. Хасаваха’ ты’ помна ядэрӈаха’, тэ’’эмна сырӈаха’, ӈацекы’’ ты маремби’’, ӈобтарем’ нядаӈгу’’. Не’’ пин тарпыд’’, вад’ няю ядалъяд’’.

Мика: Еваней, вэя хыдяха хамада, ӈаябаддава ня’’амгудм’.

Луке’ пухуця: Еване, пыдар тум’ пята, ӈамзам’ парада тараӈгу, вэя хыдям’ мань ӈо хана пиртадм’.

Тыне: Небёв, мань сит тым’ хыраба нядаӈгудм’, вэя’ хыдям’, сэрм’ хотадм’, ӈатена. Еване, ӈатен, ӈобкана хэхэни’. Харт хибярит мяк’ тэворцан? Папар нелевы?

Еване: Тюку сыв’ харто’ мядоманзь турӈаць. Папав Я’мал няд недамда мэвы, теда сидя мято’. Сававна иле, мэвы недо’ мел’’ не, сэдора тенева, ненэй не.

Тыне: Савва сер’’. Палев масьню’’ хасава’ нюми’ неле тараӈгу. Харта нюдяко не’ нямда ваторман харва. Пыди ӈоб’’ӈарсаха’, тюку по ӈэвтава’’. Нюв пыда татым’ мэва нерцюнда нелеӈгув. Сава?

Еване: Ханя сава ӈата, хасава’ ню ватохонандо’ нелебада. Мань хасава’ нюв ӈобтарем’ няхар’’ по пиркана нелеӈгу, тарця юнм’ намдаваць. Сидна’’ харвабта ни’’ханд, хадав харта нюв вадада.

Тыне: Ӈадьӈгува, нюмд’ пыдар нирась хае, хадат ва’’лер, илева’ ямбан саць табекобта саӈась.

Еване: Тыне, нянд хэтӈгув, ӈока яр хаябэй. Ӈока по’ пуд вэваку юрбада, хадахан’ ним нену. Микан’ ня не’ нюни’ вадаӈгуни’, хаепа митыни’. Мал’ хэвня илеванзь харвабта ни хант’’, хэвханани’ хибяхавадо’ хасавам’ табта сава ӈэӈгусь.

Луке’ пухуця: Тыне, сянд’ ядэрӈанда, мерку, мань мале суюм’ яхав, хасаваха’ ханди’ мале подерпихи’.

Ӈацекы: Небяв, ӈамзам’ парадаванзь тава, моракоця пэвсюмы няна парадаӈгуна’’. Нисява’’ пэси’ нябы пидям’ ховы, мат’’ сар’’нюда, хыдяко тара.

Еване: Ӈамзи стол’ ни мэйди’’, мань парадаӈгун, пуна хар’’н татын, сар’’ню ларь’ мю ханэйда’’.

Тыне: Небёв, пыдар сит нябакор тэдорпасьты? Нисяхавав сит сямыкы, мэневакы?

Луке’ пухуця: нисянд мякана яӈгоб нябаков си’’ым тэдорпасьты, пудана похона сава ӈэсьты, мань ӈамгэ хар’’н харва пыда мяканда илеванзь товэдм’ вуним ӈа, хибя таты ӈэван харваӈгу. Пыда нюда яӈгумбэй, тикым’ нидав хамадамбю, нюртей ӈацекыми, харта вадабидась, пыда небяданда пэрцятыда. Нисяхавар ханя си’’ым сяй’’, мэне’’, хуркари серкана нядаӈгосьты, самляӈг яӈганя похонан нюртей ӈацекэв танясь.

Тыне: Небёв, ӈока маям манэмакэн? Ӈамгэхэртм нисьтын вадес’’, нисява’’ӈо пилибт’’ мунзьсяты. Хибя мякнанда табекосьтыда?

Луке’ пухуця: Саць ӈока мая манэмав яӈгу, хари хибяри ӈэбэй, мань ӈо’’ намдортетыдм’, манзарасьтыдм’, мякана не манзаяда ӈока, харт теневан. Мяд серкна нябаков табекосьты, пыда мята. Пыдар ӈо’’ харт мя’’ал, тякавна ир нёя ядэр’’, Сэрнер мунмян не’ӈацекы, сит саць мэне, валакада Палем’ нисядарев мэнеда.

Мань нят янамбовна невхы илемяхадана вадав пяӈгув. Пыдар ӈо’’ няданд не’ нюнд илева миндя, теда харт мал тасламбад. Тарем!

Тыне: Небёв, тарем! Мань мал ла’’амдаӈгув, пыдар сит пыдадм, нянд намдӈгум, нисян ӈо’’ вадам’ нив мадаӈгу. Вы’ яханана ӈарка мян’ мюня сём’ нянд мэтадм’.

Малда тамна ни’’ӈа’’.