Тюку по’ маня’’ округна сиднтет ю’’ самляӈг пода панысь. Яна’ со’’яма яляӈэ’ неняӈг’’ ирий’ самлязимдей яӈганя толыр’’ таславы. Сиднтет ю’’ самляӈг по’’ тяхана ӈэрм’ няна сямянд’ нюрте ӈадимы Национальный округ.

Таӈок по’’ ямбан ява сэвхана маниесь хусувэй по’ савумдана, ӈарумдана. Тюкохона илена’’ хибяри’’ ил’ ӈод хусувэй по’ саваркаӈэсь’ хантана’’. Тарця илм’ хибяри’’ харто’ сертабидо’. Хусувэй яханана со’’явы хибяри харта ямда сахарамбась илевамда мэ’’ӈада. Хибярина хуркари манзаяхана ныхыдо’ нись сяй’’ манзара’’. Луца’’ нина’’ тарця вада’ харадо’ таня’’: ханяна’’ со’’ян’ таняна таралъян’. Ненсянда’ ӈод тарця ӈэ’’нив’: маня’’ ӈокаюв’ хибярина тарця вада’ харам’ мэць иленарха’. Ӈокаюв’ хибярина илевандо’ ямбан харто’ со’’явы яханандо’ манзара’’. Тарця ӈопой нява Несьхана иле. Тикы Анна Егоровна Сулентьевна, харта тензда Лаптандер’ ӈэвысь. Анна Егоровна Канинхана соявы некоця. Небяда, нисяда тэхэ’’на мэвэхэнзь’, илеванди’ ямбан Канин’ выӈгана мюсермэхэнзь’. Ю’’ нюкцяди’ ӈэвысь, теда си’’ивдо’ Несьхана иле’’, харто’ ӈэсынандо’ манзара’’. Анна Егоровна Канинской Совет’ ӈуда’ ӈылӈэ’ ӈока по’’ ямбан манзарась. Валакада по’ ханзер’’ ни’’ манзара. Няхар’’ ю’’ си’’ив по’’ ямбан манзаравысь, хусувэй манзаямда ив’ ер минресьтыда. Тюку по’ маня’’ нява «Ненецие’’ округна Почетной гармотам’» ня’’амась. Тарця падарм’ ня’’амвась Няръяна март’ турӈась. Тамальӈгана лаханась ня’’навась, лаханавами’ тарця вадаха’’на’’ ханадась: – Мань’ ӈока по’’ ямбан Несьхана иледм’. Тюкохона школахана тоходанась’ пявась, си’’ив классм’ ёльцемась, тикахад’ сиднтетимдей классхана Няръяна маркана самлязимдей школахана тоходанамась. Тикахад’ хасуюдимдей классхана Ленинрадский областьхана танеда Пушкин’ маркана тоходанамась, таняна по’ ямбан санаторийхана мэдамзь’. Юдимдей классхана маля Шойнана тоходанамась. Ти’, школав’ Шойнахана ёльцевась. Тоходанась пилибт’ харвасетыдм’, ӈодьбянда школан’ пуд тамна нерня тоходанвась Ростов – на – Дону март’ ӈэдалэюваць. Таняна гидрометшколана тоходанамась, тикахад’ техникумхана мэдамзь. Специальностюв’- техник – метереолог. Си’’ив по’’ манзарамась гидрометслужбахана, манзаяв’ сацей мэневась. Тикахад’ тамна Новгородской зональной комсомольской школана тоходанамась, тикы’ пуд сидя по’’ комсомолкана манзарамась. Несьхана «Северный полюс» колхозна комсомольской организация’ секретарьӈэ’ тарамась. Ӈамгэсь’ тамна мань’ пилибт’ Несьхана мэдамзь? Мань’ небяв’, нисяв’ мер’’ яӈгумаханзь’, нюдяко’’ нин’’ хаиць. Тамальӈгана мань’ сидя ю’’ ӈопой’ повась, манзарамась. Нюдяко’’ нин’’ ханяхарт’ нинась’ мис’’. Небяси’, нисяси’ хаёсь’ мамась: нин’’ харн’ вадагун’.

Тикахад’ Советхана манзарамась. 17 декабря 84 похона сим’ Советан’ манзаравась’ хаӈаць. Советана ӈэвахана мэнана ӈуда’ ӈылӈэ’ манзарамась. Сидя ю’’ си’’ив по’’ ямбан тарця манзаям’ пэрӈамась.

Анна Егоровна Канинской сельсоветхана няхар’’ юд’ мян по’’ ямбан манзарась. Таӈок по’’ ямбан ӈока хибярим’ нядась, тарана серт’ табадась. Манзаямда теневана, харта ӈэсынанда илена’’ хибярида сававна теневава’’. Военкомат, ЗАГС, нотариальной действия’’ мал’’ пыда минревы’’ манзаида. Хуркари’’ несэй ӈадимы’’ программавна манзарасьты. Хусувэй едэй ӈамгэн’ харта ӈод’ тоходансеты: – Илеван’ ямбан манзарам’, тикы’ поӈгана манзаяхана несэй ӈамгэ’’ ӈадиворцеты’’, пилибт’ тоходана’’ тарасеты. Ӈамгахэртат’ нисьтым’ пин’’. Хибяри’’ ӈокавна турцеты’’, тэхэ’’на мэна’’ ненэциена малӈэ’ някун’ турцеты’’. Теда ним’ маля манзара’’, тарем’ ӈод нина’’ турцеты’’, лаханасьты’’. Хонаркосьты’’: тикым’ ханзер’ сертась? Ханзер’’ ним’ нядаӈгод’? Нядаӈгосетыдм’. Валакада масьтым’ – мань’ тарем’ хэтбив’. Сертаванда нерцю хонаркуда: тарем’ ӈэвы’’, нивы’’. Хусувэй ӈамгэ теда мер’’ несэюворӈа’’, едэй Закон’ ӈадиберӈа’’. Советан’ ядэрӈада’’, хонаркуда’’- ханзер’’ сертая’’.

А.Е.Сулентьева по’ ни’’ манзара. Тарем’ ӈод сертабада манзаяда ӈока ӈэсьты. Ӈопой яхана хасенам’ ехэра. Харта паӈгута’’ нямна книгам’ падвысь, тикахад’ хуркари’’ сувенир’’ сертамби’’, тикахад’ ӈэсынандо’ танеда нянэй не’’ группахана хыно’’ӈа’’. Округна со’’яма яля’, Анна Егоровна е’’эмня ӈод ӈарка яля, пыда илеванда ямбан харта янда’ е’’эмня манзаравы!