Сиднтет по’’ тяхана ненэцие’’паднана Алексей Ильич Пичков яӈгумась.Пыда ненэць’ ӈэбнанда ӈод луца’’ вадавна паднанась. Товнда похона Алексей Пичков сиднтет ю’’ пом’ ядтаӈгува’’. Тарця яляха’’ хибярина маля хамяку’’.

Алексей Пичков ӈэрм’ ненэцие’’ паднана’’ поӈгана теневана’’ паднана. Пыда мэбета паднанась, илеванда мальӈгана падвы книгида тянё ниць’’ӈа. Яӈгу’’махаданда хаювы манзаяхататта’’ сян едэй книгам’ Литературной объединение «Заполярье» манзаям’ пэртина ма’’лаць.

Паднана со’’яма ялям’ ядтамбава сер’’ поӈгана Заполярный районхана манзарана’’ конкурс’ сертавась идейдаць’’. Тикы переводчик’’ нюртей конкурс’ ӈэӈгу. Тюкумэвахана тарця конкурс’ А. И. Пичков сиднтет ю’’ пом’ ядабтабван’ хамандавы. Конкурсан’ Заполярный районхана илена’’ хибярихит’ тарця манзаи’’ ӈате’’: Алексей Пичков падвы манзаи’’ луца’’ вадахад’ ненэця’’, нысма’’ вадан’ сертавы’’ ӈэбнандо’. Тарця конкурсан’ манзаидо’ ю’’ пота’’, тикахад ӈаркарка хибяри’’ сертавы’’ манзаидо’ тэврась пир’’ӈа’’, хуний Заполярный районхана иле’’. Хусувэй сертавы’’ манзаям’ комиссияхана манзаравнда хибяри’’ манэ’’сартадо’, хусувэй Пичков падвы’’ стих’’ сававна сертавы ӈэбнанда тара: луца’’ вадавна падвэхэд’ нибнанда яӈг’’, ӈамгэм’ ваде’’мамда тэврась, паднана мэбцом’ манэ’’лабтая’’.

Конкурсан’ паднаван’ харванахат’ падарм’ ( луца’’ вадавна хэтась – заявкам’) хор’’ ирийна няхар’’ нюртей яля ӈэсонд Заполярный районхана ма’’ламбидо’.