Маня’’ округханана юр’’ си’’ив ю’’ ёнар’’ тэва’’ , тыбэртя’’ ненэциена тыдо’ пэрць вымна мюсерць илевамдо’ минредо.

Ханярина мюсертина’’ таӈы’’ ирийдо’ мадась, ӈэрёйӈэ’ хэсь тыто’ толыр’’ таславы’’. Ненэциена хаводава ян’ тэвравнда тыдо’ янамбовна яӈгремби’’. Хор’’ ириян’ тэвась округханана хаводава’’ манзаидо’ маля пэрцетыдо’. Тюку по’ нюртей ха’’амвы сыра ява’ хор’’ ирий’ хасуюдимдей толыркана тондадась, тенад’ ни’’ юӈг’’. Тарем’ ӈэбнанда нерняна товнда ирийхана округна тыбэртя’’ янамбовна хаводавамдо’ пяӈгудо’. Нюртейӈэ’ забой манзаидо’ «Красный Октябрь» СПК пэрцетыдо’. Пыдо’ хусувэй по’ ӈэрёйӈэ’ хэсь тыдо’ Воркута марад’ хэван’ танабидо’. Хаводалавадо’ таняна ӈэсьты. Тюку по’ ёнар’’ сиднтет ю’’ тым’ хаводаван’ яӈгрець, ты’’ ӈамзан’ таслась – самляӈг юкад’ вата тонна’’ ӈэӈгу. «Красный Октябрь» СПК ты’’ӈамзам’ маля ӈахакуд’ Няръяна март’ нидо’ тэврамбю’’, округна лавкахана нидо’ мирдапю’’. Тыбэртя’’ Воркута марад’ хэвхана хавода’’, таняна ӈод’ ӈамзам’ мирдапидо’.

Нянэювна округханана хаводава манзая’’ носиндалава ирийхана минзьты’’. Тюку по’ ӈод нумда серо’’пата несэй хадавы ты’’ӈамзам’ маркы лавкахана нерняна товнда ирийна еркы’’ толыркана валакада манэ’’тава’’. Тедари’’ маркы лавкахана небой по’ ня’’амвы ӈамзам’ мирдапи’’. Ӈокханда округна тыбэртина тюку по’ ӈэрё’ хаводаван’ тет ю’’ няхар’’ ёнар’’ тым’ яӈгрець, ӈамзан’ таслась тянё ни’’ӈа’’. Хусувэй СПК, семейно – родовой общинахана тюку по’ ваеравнда хаводаван’ маля хамады’’.