Товнда сидя ёнар’’ самлязимдей’ яӈганя похона ты’’ниць ирийна хасуюдимдей толыркана Победа ялям’ мэтава’’. Пудана ӈарка сайнорма ёльце’’махад си’’ив ю’’ по’’ ваера. Я’ сяр ниня’’ илена’’ хибяри’’ е’’эмня саць ӈарка яля.

Сайнорма по’’ тось ӈока хибяри’’ ямдо’ лэтбавась нулъядаць. Хойхана мюсермы’’ хасава’’ мято’ тер’’, нюдо’, недо’, тыдо’ хаесь сайнормась ӈэдалэйдаць. Ханяӈыдо’ пуня илесь яхандо’ нидаць тэв’’, ӈока ӈацекы’’ евакоӈэ’ хаёсь вадыць. Ил’ тамальӈгы похо’’на ханярина саць тоенась. Тарця сер’’ юрбада’’ ни’’ӈа’’.

Маня’’ яханана Победа ялян’ хамякова’’ маля миӈа’’. Мурманск’ маркана «Салют Победы» нюбета фестиваль-конкурс’ ваерась. Таня округхадана хибярина ӈэдалёрӈаць. «Илебц» театрава несэй масьтевы манзаямда манэ’’лабтась. Тикы нямна Матрена Ивановна Талеева няюв лаханамась. Пыда тарця вади’’ хэтась: – Тарця ӈарка сер’’ теда яндавна миӈа’’. Товнда похона Победа яля’ си’’ив ю’’ пом’ мэтава’’. Мурманск’ март’ маня’’ фестивалян’ ядэрӈаваць. Фестивальна нюмда – «Салют Победы». Хибяри’’ яндахат’ тоць. Мал’’ ӈокханда фестиваль – конкурсан’ товы’’ ӈокаць. Ӈысми’’ яхад’, Санкт-Петербургхад’, Ленинградской областьхад’, тикахад’ Калининградхад’, Мурманской областьхад’ таняць, маня’’ яхадана’’ няхар’’ ю’’ тет хибяри’’ ӈэдалёрӈаць. «Илебц» театрава, тикахад’ ӈысма’’ коллектив’, хасава’’ турӈаць. Невхэна сайнорман’ яхадана’’ хибяри’’ хаяць, ханзер’’ ты’’ сайнорӈаць, оленно-транспортной батальон’’ таняцьнё, тикы е’’эмня маня’’ сер’’ма минреваць. Сайнорма’ по’’ мальӈгана нина’’ ханзер’’ сайнорӈаць, тикы е’’эмня фильм’ манэ’’лабтабиць. Ты’’ манэ’’лабтабиць, нюд’’ ханзер’’ миӈа’’, снаряд’’ ты’’ тэво’’ла’’, мя’’ ӈади’’. Ненэця’’ хибя илевам’ ханяӈы’’ нюртеймэвна манэ’’ман’ хабець. Округна культура серу’’ пэртя ӈуда’ ӈылы’’ Анна Ивановна Лыченко нянана’’ ядэрӈась, театрхадана Серафима Петровна Дуркина, тикахад’ ӈысмахат’ харто’ ервотадо’ танясь, тарем’ ӈод мал’’ ӈобкана сер’’ сертабиваць. Ӈацекы’’ нянана’’ ӈэдалёрӈаць, ӈацембой хибяри’’ таняць, ханяӈыдо’ Няръяна маркы педколледжхана, НАЭТ тоходана’’. Маня’’ сямянд’ ӈарка хибярива ӈэван’ хабева’’.

Корр: Тюкумэвахана пыдара’’ хурка манзаи’’ манэ’’лабтадаць, масьтевы’’ композицияра’ ӈамгэ’ нямна ӈэсада?

– Маня’’ ненэцяӈэ’ театрава манэ’’лабтадась, ханзер’’ невхэна си’’ив ню’’ небя си’’ив нюмда’’ мал’’ сайнорман’ ханэйдо’. Хибяхартадо’ пуня ни’ ту’’. Тикым’ Фаина Харитоновна луца’’ вадавна толабидась, мань’ ненэця’’ вадавна хыно’’ӈамась. Саю’’ похона мал’’ хасава’’ хэбэяць, нери’’ хойхана хаиць. Не’’ мал’’ манзаи’’ пэрӈаць, тикым’ маня’’ манэ’’лабтаваць. Ханзер’’ сайнорма мальӈгана си’’ив ню’’ небя ӈамгэ’ манзи’’ сертабаса.

Евгений Ледков, не ӈацекы Дарина Надежда Николаевна талеева не ню, пыдо’ хэвханана’’ стихотворении’’ хэтбиць. Тикахад’ Мурманскхана илена’’ хибяри’’ мэтина’’ паской мальцина, панына, панына пан’ няблюйкона сертавы, сывы сави’’ сербиваць. Александр Алексеевич Ледковва шаманӈэ’ тарась. Хусувэй хибяри сёнзянда мюня нив’ туес’’, нумд лахана, тикым маня ӈани’’ манэ’’лабтаваць. Валентина Ивановнава хыно’’ӈась, сёмда мэ’’ӈась ханзер’’ маня’’ нув’ няюв лаханава’’. Ся’’ня маня’’ тарцям’ манэ’’лабтабиваць, хибяри’’ мал’’ нулъядаць, хайладо’ сэвханато’ ӈадиць. Няндо’ тарця манэ’’лабтабадава ёльце сава ӈэвы. Тикахад’ Анна Ивановна Лыченко мась: «Круглой столхана хибяри’’ мавыць – ненэця’’ манэ’’лабтабада я’’авлы мэкадась. Хибярида ёльце сянако тенева’’, манэ’’лабтабададо’ сейхад миндарха.

Мань таняна хыно’’ӈамась. Сёмда харн’ сертавась, вадида Прокопий Андреевич Явтысый падвы. Тикы сём’ пилибт’ мэцьтыв’, сямянхат’ мэнена сёв’. «Салют Победы» фестиваль’ темада серо’’ӈа.

Мурманскан’ маня’’ манзарась нява Елена Боброва ӈэдалёрӈась, пыда сидяӈг’ сертавы.