Маня’’ округхадана’’ президентской грант’ конкурсан’ няхар’’ яӈганя проект’ падавыць.
Сертаванда’ манзаито’ нямна проектадо’ некоммерческой организация’’ тэвраць, тикы е’’эмня падарм’ хамадавыць. Ӈокханда Россия’ хусувэй яхад тамбир’ конкурсан’ ю’’ ёнаркад вата проект’’ еримяць. Нерня’ тарпвы’’ проектадо’ падвы’’ организация’’ поӈгана 10,2 млрд. селкой’ тярта’’.
Округна’’ НКО’ тарця конкурсан’ няхар’’ яӈганя проект’’ тэвраць. Поӈгнандо’ ТОС «Будущее Шойны», пыдо’ ӈэсыхынандо’ ӈацекыто’, ӈацембой хибярито’ ныланава’’ е’’эмня общественной пространством’ сертаван’ харва’’. Ханяна пыдо’ сянакованзь, тарана серудо’ тасламбась ма’’люрта’’, творческой манзаидо’ сертабаӈгу.
РОО’ « «Особое детство в НАО» проектадо’ ваерабнанда, хаӈгурта’’ ӈацекы’’ ма’’лёва’’ е’’эмня сянакова лохом’ хамадавась’ ятна’’, таняна ӈацекы’’ тоходанаӈгу’’, танеда серудо’ таслабаӈгу’’. Округна’’ краевед’’ общество’ тарця проектамда нерня пэрӈа’’, яханана’’ танеда илебця’’ толабаӈгу’’, илебця’’ cуса’’ нибнандо’ тикым’ маниеӈгу’’.
Округна’’ Фонд экологического развития, конкурс’ пирдалебнандо’, тарця манзаи’’ сертабаӈгу’’. Луца’’ вадавна хэтась займутся популяризацией раздельного сбора мусора, яӈга контейнер’’ ӈамдтаӈгу’’, хибяри’’ харад’ хэвхана вторсырьё е’’эмня сетки’’ масебтеӈгу’’. Пуданана ма’’лавыдо’ ӈарка ян’ ӈэдарабгудо’.
РОО’ «Центр русских традиций в НАО «Русский Дом» проект’ хамадась, манзаядо’ 32 мастер-класс’ сертаван’ таславы. Таняна ӈудидо’ мэта’’ ӈармбэй мел’’ ненэця’’ ӈацембой хибярихи’ теневанамдо’ манэ’’лабтабаӈгу’’. Ӈацембой хибяри’’ ниткахад, тэхэд’ ӈавори’’ паӈгалпась, сяронданзь тохолабӈгудо’.
Ханзер’’ конкурс’ ваеравам’ 2021 по’ нертей ирий’ еркы яляхана намдӈгува’’. Тикы’ пуд конкурс’ пирдалевы’’ манзараидо’ сертабава’’ е’’эмня есьдо’ ня’’амарпа пяӈгу’’.
Маня’’ округна’’ некоммерческой сектор’ манзаи’’ минрена’’ президентской грант’’ фонд’ конкурсан’ манзаидо’ 2017 поход’ тэврамбидо’.
Таӈок по’’ ямбан’ си’’ив яӈганя проект’’ падавы организация’’ конкурсхана нердець. Ӈокханда социальной проект’’ манзаи’’ сертабава’’ е’’эмня фондхад 13 млн.селкой ня’’амаць.
Тамна хэтась тара, Ненэцие’’ округханана’’ тюку по’ нертей ялян’ 171 некоммерческой организация’’ манзаидо’ минре’’.
