Вы здесь

Паднана’’ ма’’лыць

Хусувэй по’ Санкт Петербург маркана «СеЗаМ» нюбета конкурс’ ваерасьты, ханяна паднана’’ хибяри’’ харто’ манзаидо’ манэ’’лабтабасьты’’. Тюку’ по’ ӈод тарця конкурс’ ӈока паднани’’ ма’’лась.

Северо-Западный федеральный округхана манзарана’’ медиасфера сямянд’ ӈарка ма’’лёва тюку по’ манзаямда Санкт-Петербург’ маркана хор’’ ирий’ сидя ю’’ нюртей яляхана пядась. Маня’’ округва ӈод’ тарця конкурсхад’ нисьты’’ хадю’’, хусувэй по’ маня’’ паднина’’ харто’ манзаидо’ таняюв’ тэврабсеты’’. Тюку по тарця конкурсан’ товы’’ хибяри’’ нюртеймэвна Александринский театрхана ма’’лэйдаць. Хусувэй яхад’ товы’’ хибяри’’ харто’ илесь ямдо’ манэ’’лабтабиць, тикы е’’эмня яӈга манзаидо’ хамадавыць.

Маня’’ округхадана тарця конкурсан’ хибярина ӈэдалэйдаць. Округна харта стенда танясь, ханяна округхадана тэвравы’’ манзаи’’ манэ’’лабтабиць. Поӈгнандо’ маня’’ газетава таня. Сидндет ю’’ тет по’’ ямбан газетава сидя ю’’ ёнаркад’ ватамэвна тарпыць, сидя ёнар’’ номерта тюку по’ пилю’’ ирий’ няхар’яӈганя толыркана ӈадимясь. Тикы номерва конкурсан’ хаясь. Ханзер маня’’ округханана «Сямянхат’ мерета» хэбидя яля ваерасьты’’, «Тельвиска –ART» этнографический лагерь’ манзаравам’ конкурсан’ товы’’ хибяри’’ маня’’ газетана манзаяхат’ намдгудо’.

Тамна округханана телевидение маля сидя ю’’ по’’ ямбан манзара. Ненэцие телерадиокомпания сян манзаям’ конкурсан’ тэврась, поӈгнандо’ сидя «Илебц» театр’ масьтевы радиоспектакль, тикахад’ ненэцие вадавна сертавы «Тюнтава» фильм’. «Север» нюбета телеканал «Сей юн» нюбета проект’ манэ’’лабтась. «Выӈгы вада» журналва’ ӈод тюку’мэвахана тарця конкурсан’ ядэрӈась, ты’’яля’ нямна падвыдо’ тэвраць.

«Выбор НАО» газетахана манзарана’’ манзая’’ ӈобтарем’ таняць.

Тюку по’ тамна маня’’ округна губернатор Игорь Федоров специальный приз’ танясь, хибя тарця мядонзэйм’ ня’’амгуда, тикым’ ӈани яляхана падгува.