Округханана ненэцие’’ культура яля’’ тюкумэвахана носиндалава ирийна сидя ю’’ тетимдей яхад’ ӈарка пэвдэй ирийна няхарамдэй яля’ ӈэсонд минда’’. Мэта’’ си’’ивна нюртей яляхана «Арктикам’» нюбета КДЦ мякана культурана ялу’’ ӈэванзь’ хибяри’’ ма’’лэйдаць. «Илебц» театрава, «Печорянка» ансамбль’ няюв масьтевы’’ манзаямдо’ маниеваць.
Ненэцие’’ культура ялу’’ этно-культурный центр’ манзаранина хамадэйдось. Си’’ив’’ яля’’ ямбан’ хуркари’’ мероприятия’’ ваераӈгу’’.
Культура’ ялуна’’ тюкумэвахана «Арктикам’» нюбета КДЦ мякана нэбидось. «Илебц» театрхана сянакода’’ нина’’, «Печорянка» ансамбльхана хынота’’ нысми’’ няюв’ несэй манзаямдо’ манэ’’лабтаць. Манзаядо’ Победа си’’ив ю’’ пом’ ядабтабван’ сертавы. Хибярина сцена’ ниня манэ’’лабтадонзь: ханзер’’ маня’’ яхадана’’ ненэциена сайнормась ӈэдалэйдаць, оленно-транспортный батальонхана сайнорца’’. Ханзер’’ маня’’ ӈокаюв’ ненэциена сайнормахад’ пуня яхандо’ нидаць ту’’. Саць ихиня сававна масьтевы манзая, хайласи’ маниева сер’ нись’ӈа’’.
Тикахад’ сидя ю’’ самлязимдей яляхана ЭКЦ ненэцие’’ отделкана манзарана’’ нина’’ санаторно-лесной школан’ тэворӈаць, таняна «Нянэй ненець» сянаковам’ манэ’’лабтаць. Округна толанго хардахана хибярина М.Я.Бармич со’’яма яля’ ед хамандавы презентациян’ ма’’лыць. Тикы яляхана «Ханибцё» фольклорной группана сянакодина Няръяна маркы евако’’ ӈацекы’’ хардан’ тэворӈаць. Ненэцие’’ вадавна хамандавы вадаком’ манэ’’лабтаць.
Мел’’ ненэця’’ хибярина мастер-классан’ хуркахова манзаи’’ сертавась ма’’лабидось.
«Илебц» театрава, «Ханибцё» фольклорный группава культура ялуна мальӈгана санаторно-лесной школа’ хавна тамна харто’ масьтевы манзаидо’ школа-интернатхана, евако’’ ӈацекы’’ хардахана манэ’’лабтэйдось.
Тамна этно-культурный центрана манзарана нина’’ тюку яляха «Пунушка» едэй журнал хамадаць, пуданамэвна ваеравы «Сава сёхона» мэ’’мы сё’’ сборникан’ ма’’лавы манзаидо’ сертавыць. Тарця манзая презентация ваерась.
Носиндалава ирийна сидя ю’’ хасуюдимдей яляхана нина’’ «Тиман» ресторанхана хибярина ма’’ лаць, таняна « Вадава’’ лэтрахова» – «Сбережем родной язык» конкурс’ ваерась.
Ненэцие’’ культура ялуна’’ ӈарка пэвдэй няхарамдэй толыркана ёльцейнаць. Тикы яляхана тарця хибяри’’ сава вади’’ намдаць, хуний харто’ манзаянандо’ ненэцие культурава тю’’ури пэрӈадо’. Поӈгнандо’ культура манзарана’’, мел’’ ненэця’’, хуркари’’ коллективхана сянакода’’, хынота’’, тарана’’ нина’’, паднава серм’ пэртина’’.
