Ирий’ ямбан яханана ненэця’ вада яля’’ ми’’ӈа’’. Ирий’ ямбан янда’’хана хуркари’’ мероприятия’’ ваераӈга’’. Маркана, округна ӈэсыхы’’на’’ ӈацекына е’’эмня сертавы’’ манзая’’ӈод тянё’’ ниць’ӈа’’. 

«Вадава’’ лэтрахава’’» таремъюв’ нюмдевы конкурс’ ӈацекына’’ е’’эмня этно-культурный центрхана манзарана’’ нина’’ хамадаць. Тикы конкурс’ хаювы си’’ивна самлязимдей яляхана аграрно-экономический техникум’ мякана ваерась. Ханзер’’ ӈацекына вадамдо’ теневаван’ харвадо’, ханзер’’ тохолабидо’, ӈамгэм’ ненэця’ ил’, культура’, традиции’ нямна тенева’’ манэ’’лабтабидось. Конкурсхана тет’’ команда’’ поӈгнандо’ пирдыр’’ӈаць:  

«Харп» - Ненэцие’ агро-экономической техникумхана тоходанна’’, «Мел’ ӈацекы’’» - профтехучилищехэна тоходанна’’, «Пирибтяко’’»-  социально-гуманитарной колледжхана тоходанна’’, « Сэр’’ яв’ ӈацекы’’» - Красной ӈэсыхы’ школахана тоходанна’’ ӈацекы’’.  Пирибтя’’, наны’’ харто’ теневанамдо’ манэ’’лабтавась ма’’лэйдаць. Нерде’ хусувэй команда’ харта пыдадо’ ваде’’ӈаць: ханяхад’ товы’’, сё’’ мэ’’ӈаць, ненэця’ вадавна лаханаць’. Тикахад’ викторинахана сянакуць. Хибядо’ сямянд’ сававна хой’ ил’ теневадо’,  мядм’ ханзер’’ ма’’ламбада, ненэця’ ембдяр’’ ханзер’ сэдбада’’, ӈацекы’’ ненэцие’ хобцоко’’ хомбиць, вада’ хара’’ нюмдебиць. Хусувэй команда’ творческий номер’ манэ’’лабтась, тикахад’ ненэця’ вадавна хыно’’ӈаць. Мал’’ ӈацекы’’ манэ’’лабтавы’’ манзаяхато’ хамяковыць. Вадам’ ехэрабнандо’ ӈод вадидо’ тохолавыдось. Тикада саць’ сава, ӈацекы’’ харто’ вадамдо’ теневаван’ харваду’’, паӈгуто’ ханяхад’ мимам’ тенева’’. Тет’’ сянаковы’’ команда’’ поӈгана сямянд’ нерня Красной’ ӈэсыхы’ школахана тоходанна’’ ӈацекы’’ тарпыдаць. Пыдо’ я’’авлыць. Хусувэй манэ’’лабтавы’’ манзаямдо’ ив’ ер хамадавэдось. Ӈамгэкоцядо’ ниня’ тарем’ хэбнанда ӈоб’ пуня’’ нисьты’’ ӈа’’, ӈоб’ нерня’ минзьты’’. Ӈопой вада, пэдова’’! Тарця ӈацекы’’ сценахана маниесь маймбцо’. Ӈацекэмна’’ ӈади’’: ханзер’ ӈэсындо’ школахана тохолкодидо’ манзара’’. Ненэця’ вадам’ пэртя тохолкодадо’ Валентина Хатанзейская, музыкам’ минрена тохолкодадо’ Валентина Власова ӈацекыто’ няюв’ ив’ ер манзара’’.

Пирдырмандо’ е’’эмня ӈацекына’’ хусувэдо’ ёльце сомбой, нянандо’ тарана’’ мядонзэй’’ ня’’амаць: ноутбук’’, планшет’’, смартфон’’. Тетимдейӈэ’ местам’ ханавы’’ боулинган’ ядэрмам’ недво’’ӈаць.