Няръяна маркана иленаӈэ’ этно-культурный центр’ мят’ харвась’ ядсетыва’’. Таняна манзарана’’ нина’’ маля сидя ю’’ по’’ ямбан яханана илена’’ хуркари’’ тенз’ мэта ненэцие’’ ӈобт’’ ма’’ламби’’.
Хусувсэй тенз’ ненэця’’ харто’ культурамдо’ манэ’’лаб-тамби’’, тю’’ури’ пэрӈадо’. Сидя ю’’ по’’ ямбан сертавэдо’ маля ӈока. «Сава сё» фестиваль’, «Печорянка», «Мел’’ манзарана’’», «Аргиш надежды», тикы’ хавна хуркари’’ ма’’лёва’’, презентация’’, выставка’’ танесеты. Клуб «Землячеств» маля ӈахэт’ таняна манзара’’. Ханяна хибяри’’ ма’’ ламби, хуний тены’’ илевахана харто’ со’’явы ямдо’ илелтемби’’. Тюку по’ «Венок дружбы» нюбета ныланавам’ ӈобкана мэ’’ӈаваць. Тарця ма’’лёвава хусувэй по’ танесеты. Невхы похона яханана тарця ӈэсы’’ таняць, хуний тены’’ похо’ нидаць’’ тэв’’. Тарця ӈэсы’’ округна картахана яӈгу’’. Нерняӈы товнда похо’’на тарця сер’ яханана сяхарт’ яӈгобнанда. Хусувэй теда яханана танеда’’ ӈэсы’’ танябнандо’, хусувэй по’ сэвхана маниесь савумдандато’. Таняна илена’’ хибярина манзаядо’ танябнанда, недбидо’ сава ӈэбнандо’, ӈэсыхы’ тер’’ ненэциена маям’ ехэрась илебнандо’.
Хэбидя’’яляхана этно-культурный центрана мят’ турць’ мэнесетыва’’. Тенева’’: этно-культурный центрхана манзаранина’’ сеюна маймбтеӈгу’’. Тарем’, ӈарка пэвдэй ирийна маттамдэй яляхана ӈась.Тикы яляхана «Арктикам’» нюбета хардан’ хувэхэд’ хибяри’’ ядаць. Едэй пом’ ядтамбава нямна лаханава’ ’ваераць, ӈока’’ мастер-класс’’ таняць. Ханзер’’ едэй’ товнда пом’ ядабтась, товнда по’ хурка ӈэвнда, ӈамгэ ӈавар’’ тол’ ниня’ танябнандо’ тара, мядонзэйӈэ’ ӈамгэм’ миць серо’’ӈа’’. Тикахад’ хусувэй товы хибяри харта сянаком’ сертась тоходанась, ӈацекы’’ ныланаць, сянакуць, падтаӈгуць.
Тюку яля’ культурахана манзарана’’ хибярихи’, этно-культурный центрхана манзарана’’ няха’’на сейхад’ ӈэда’’ вадина хэтбим’: пыдара’’ хусувэй хибярихина тарана манзаям’ пэрӈада’’, савовна манзарада’’, ,ӈоб нерня пыдара’’ мяканда харвась хибяри’’ турӈая’’. Хибяри’’, хуний манзаито’ пуд някунда ныланавась ядсеты’’. Сензда’’ ӈада’’, минрена манзаита’’ таром’ маниесь иледа’’!
Валентина Зганич: – Маня’’ сава нина’’! Ти’, тамна ӈопой пом’ мадава’’. Яхана культура’ поӈэ’ таславы пось. Культура’ серу’’ пэртя’’ манзаядо’саць ӈокась. Сертавэва’’ ненсянда ӈод тянё нись’’ӈа. Хумбаси’ ваеравы по’ ни’’ӈа. Тюку яля’, культура серу’ пэртя’’ няха’’ан’ сямянд’ сава, ӈарка вади’’мэ’’ӈадм’. Пыдара’’ пэдовада’’, ӈоб нерня тарем’ манзарада’’! Сян’’ яля’’ ваерась едэй по’ тута. Товнда по’ яхана ӈока сава серм’ тэврая’’, сава юн’ яндахат’ турӈая’’. Хусувэй хибяри’ сенз’ ӈэя, сававна манзарая’’, сававна ныланая’’. Хусувэй ялямда сава ихиня ядабтамбира’’, Сава сёнзям’ мэць, нида’’ нядабась иледа’’.
