Вы здесь

Несэй ян’ ямдэяд’

Округна администрацияхана ненэцие’’ серу’’ тасламбада управлениена манзарана’’ нина’’ сян по’’ ямбан торомдавы хардахана манзараць. Хусувэй маркана, округна ӈэсыхына илена’’ хибяри теневась.

Ервана поӈгана таславнда серта’ таняб’’, март’ тэвась хари’ управлениехэна манзаранаха’ тэвӈгун’. Маня’’ серуна тасламбада’’ нина’’ улица Ленина, 27 В хардахана ӈамдыць. Таславнда серт’ таняб’ таняюв’ ядсетыва’’. Таняна манзарана’’ нина’’ тарана серкана нядаӈгосьты’’. Теда маня’’ нина’’ торомдавы’’ хардахад’ несэй ян’ ямдэйдаць. Тад’ нерня, ненэцие’’ серу’’ тасламбада нина’’ улица Оленная, 25 хардахана манзараӈгу. Невхы’’ похо’’на таняна «Ясавэй» нюбета гостиницась. Тикы мядм’ округна хибяри’’ со’’ теневадо.

Округна ервӈэ’ едэй хибяри’ тось администрацияна манзарава ӈод’ несэювна миӈа. Теда ӈэрм’ ненэцие’’ серу’’ тасламбава комитет’ ӈэӈгу. Ненэцие’’ серу тасламбава комитет’ нерм’ пэртяӈэ’ Алексей Иванович Ардеев маля сидя ирийхад’ вата манзара. Тикы нява тарця манзаяхана маля сидя юд’ мян по’’ манзара. Нянэй ненэць’, округва тенева, хойхана мюсерта’’ ненэцие’’ манзаям’ теневана, хари’’ вадавнанда лаханана. Тад’ нерня ӈод, маня’’ нина’’ харто’ манзаямдо’ минреӈгудо’, пыдо’ ӈэрм’ тенз’ ненэцие’’ нядабава е’’эмня манзара’’. Теневада’’, теда маня’’ нина’’ несэй хардахана ӈамды’’, Оленной улицахана сидя ю’’ самлязимдей хардахана хоӈгуда’’. Тарана’’ серуда таслась нядаӈгось’ тарабнанда, таняюв’ турӈада’’.