Маня’’ округна «Союз женщин России» общественной организация региональной отделение манзаям’ минрена’’ хибярина яханана ӈарка манзаям’ сертамби’’. Не’’ ханярина нерде: хари’’ манзаяханато’, хари’’ мякнандо’, хуркари’’ общественной сер’ пэр’’махана.
Тарця организация’ хусувэй по’ «Женщина года» конкурс’ хамадабсеты. Тюку по’ маля няхарамдэймэвна округханана нерденя не’’ нюмдебиць. Не’’, хуний хуркари’’ манзаянато’ сававна манзара’’, тикахад’ мядудо’ сававна пэрӈа’’, общественной манзаям’ минре’’, ныланась’ ӈод тенева’’. Тарця не’’ округна хусувэй ӈэсыхына иле’’, маркана таня’’. Ӈока’’ хибярихит’ самляӈг’яӈганя нем’ тюкумэвахана ваеравы конкурсхана тэраць. Нюбедо’ ти’: ӈокаюв’ пелядо’ маркана илена’’ не’’ – Ангелина Тарасова «Женщина победитель», Лидия Некрасова «Служение людям», Надежда Головина «Гражданская позиция», «Открытие года» Ирина Терещенко, «Наши надежды» Надежда Латышева, « На службе Отечеству» Ольга Кузьмина, «Преодоление» Мария Шкаль, «Женские инициативы» номинациям’ Людмила Хозяинова ня’’амась Оксино’ ӈэсыхыд’, «Женщина лидер» Валентина Ардеева Коткино’ ӈэсы’ тер’’ не.
Самляӈг’ яӈганя номинацияхад’ сидямдо’ маня’’ няхаюна’ ня’’амадись. Нянэй некоцяха’ Надежда Васильевна Латышева, Нина Ивановна Баркулёва. Надежда Латышева тикы пирибця’ сертабада манзаяда ӈули’’ ӈока’’ ӈэсьты, илан’ мэёвна сырта не ӈацекы. Пыда харта манзаямда’ пэрӈа, тикы’ хавна шахматхана сянаковахана нердесьты, падтаӈгова серм’ харвабтана. Округна ӈацекы молодёжной палатахана мэ’’. «Хранительница народных традиций» номинациям’ Нина Ивановна Баркулёва ня’’амадась. Пыда ӈармбэй не, «Няръяна ты» колхозхана тет ю’’по’’ ямбан манзарась, илеванда ямбан художественной самодеятельностьхана сянакосьты’’, ненэцие’’ сё’’ мэцьты. Теда ӈод’ маля ӈока по’’ ямбан пенсияхана мэбнанда ӈод’ ӈопой яхана нисьты’ хасена’’. Сэдорасьты, ненэцие’’ «Илебц» театрхана сянаку’’, хуркари’’ выставкахана манзаида манэ’’лабтабасьты. Харта ямда’, вадамда’ мэнена нямбара не. Илевамда сибцяӈэ’ нир’’ нюмдеӈгу, теда ӈод’ ихинянда вэвко сер’ таневам’ сяхарт’ нисьтыда манэ’’лабтамбю. Иб’ ӈо’’, ханяӈэна хаӈгурць’ пэртакы, ханяӈэна сёнзянда мюй’ таборцавэй’ ӈэсь’ пэртакы, хуркахова сер’ нямна сейда няркнась’ пэртакы. Нина Ивановна няюв’ лаханаб’’, хамандаӈгур’: Си’’ив юкад’ вата понанда нерня сертаванда серуда тамна ӈока’’ ӈэдарха’. Ӈоб’ нерня тарем’ ядая’’.
