Нерняна товнда яляхана Саля’хардахана Всероссийский ассоциацияна съезд’ манзарась пяӈгуда. Ханярид’ товы’’ хибяри’’ таняна манзараӈгу’’. Ассоциацияна тет по’’ ямбан манзаравам’ таслаӈгу’’, тикахад’ тэранзёва ваераӈгу’’.
Тюку’ мэвахана президентадава, тикахад Координационный Советхана манзараванди’ тэрабаӈгу. Маня’’ округна делегация’ таняюв’ ӈэдалаӈгу’’, ӈарка ассоциацияна ма’’лёвахана манзараӈгу’’. Хэвхы округхана ваеравы съезд’ нямна вадина нерняна тамна падвы ӈэӈгу.
Ты’’ саполана ирийна мат яӈганя яляхана Няръяна маркана «Ясавэй» нюбета ассоциацияна ӈарка ма’’лёва ваерась. Юдимдей съездан’ товы’’ хибяри’’ тянё ниць’ӈа’’, ханярид’ товы’’ нина’’ ассоциацияна манзаравам’ тасламбиць. Хусувэй хибяри’’ харта ибедормамда мэ’’ӈась. Анна Ильинична Ледкова округна хибяри, пыда маля ӈока по’’ ямбан сэв’ врачӈэ’ манзарась. Ассоциациява ӈадимдебва мальӈгана пыда манзарась, нертей яляхад’ манзаравамда маниедась. Тюку яля’ тарця вади’’ мэ’’ӈась: – « Хусувэй съезд’ мальӈгана месури’’ лаханана’’ хибяри’’ мунзялабтабасьтым’. Хуний сер’’мана ваньсеты’’ лахана’’, тэри’’ тарем’ тёрырта’’. Тюку мэвахана сейхана сава, тюкухона манзарана’’ хибяри’’ ӈарка хибяри’’ мале’’. Ассоциациява нерня пэртина тет ю’’ пото’ няку миӈа’’. Нина’’ манзарась туху’’ таӈок по’’ ямбан, тарця сер’ маймбава. Месури хибяхарт’ ни’’ посана’’, ӈопой – сидя танедакы.
Нюртей съезд’ мальӈгана манзаям’ тамна саць нинархадось’ хамандабю, ӈодьбята тёрырта’’ хибярина тянё ниць’ӈа. Сидя юкад’ вата по’’ ваерась хибярина манзарась’ туху’’. Тюку’ яля нина’’ теневась манзаямдо’ минредось. Хибярина сер’’мана лахана’’. Тамна тарця сер’ маймбава. Хибярина малбуй’’ нояцята. Хасава’’ ной мальцята, не’’ ной паныта ненэця’’ тенз’ ӈэдавадо’ ӈади’’. Тарцям’ сэвхана маниеб’ саць’ саварха.
Яля’ ямбан манзаравамдо’ ӈод хибярина’’ сававна мададось. Ваде’’манда вадидо’ малбуй’’ хэтыдо’, тэранзёвамдо’ валакада ёльцеӈгу’’. Мякана хантава’’. Ӈади’’, хибярина манзарась’ тоховы. Луца’’ вадавна хэтась: «командаӈэ’» манзара’’. Енаӈгува’’, нерня ӈод’ хибярина таремъюв’ сававна манзараӈгу’’. Тарем’ мэвандо’ сер тенебто’ тара – ассоциациява общественный организация.»
