Няръяна маркана мел’’ ненэциена е’’эмня яӈга’ харад’ таня, «Дом мастеров» -луца’’ вадавна тарем’ нюмдембива. Тарця хардахана манзарана’’ нита манзаям’ нерня’ пэртяӈэ’ Елена Елисеевна Канюкова манзара.
Теда дом мастеров хардахана лэвна’’ маторана’’ ненэця’’ е’’эмня мастер-класс’’ миӈа’’. Саля’ хардахад’ товы хасава тарця хибярина няюв’ манзара.
Канюкова: – Хусувэй по’ творческой лабораториява манзарасьты, ханяна ненэциена лэвна’’ маторасьты’’. Тюку по’ маня’’ мел’’ ненэцям’ тэвраваць, Сотруев Александр Анатольевич тось. Лэвна’’ маторана ненэць, хэвхы округна еркы маркана Дом ремесел мякана манзарана. Пыда социально-гуманитарный колледж’ студент’’ е’’эмня мастер-класс’’ манэ’’лабтамби, мел’’ ненэциена ӈод’ турӈа’’. Тюкон’ хусувэй хибяри тось пир’’ӈада, тарця хибяри’’ тюкона ӈатейна’’. Хибяри’’ турӈая’’, хуний лэвна’’ маторава серт’ тоходанван’ харва’’. Маня’’ яханана лэвна’’ маторана’’ нина’’ ӈобтарем’ таня. Тикы Виктор Михайлович Вылка, пыда Салехард’ маркана училище искусств’ ёльцесь. Тикахад’ Филипп Ардеев, Сергей Куликов, Руден Рубцов. Теда тамна ӈацембой хасава’’ ӈадимдана’’, хуний ӈобтарем’ лэвна’’ маторавам’ хорпи’’, Роман Лаптандер, Николай Апицын. Пыди’ ӈобтарем’ тюкохона манзараӈаханзь’, хусувэй яля’’ турцетыхы’. Нянандо’ тарем’ манзарава мэкад’ то’’олха, пыди’ ӈобтарем’ лэхэд’ манзаи’’ сертабаван’ харваӈаха’.
Нись’ ӈахакуна тамна Оман’ ӈэдалёрӈаваць. Проектмана манзарава’’ – «Изюмина мастерства –дерево ремёсел». Традиционный культурам’ нерня’ пэрӈава’’, декоративно- прикладной творчеством’ манэ’’лабтамбива’’. Тамна проектмана мел’’ хибяри’’,ӈудидо’ мэта ненэцие’’ тохолабива’’, пыдо’ е’’эмняндо’ мастер-класс’’ хамандабива’’. Ӈани’ яхана манзарани’’ тэврамбива’’, хуний ня’’хато’ харто’ манзаидо’ манэ’’лабтамби’’, ваде’’ӈадо: ханзер’ манзара’’. Тарем’ ваеравы ирий’ пудана’’ яля’’ пиркана Лариса Николаевна Салиндер Саля’хардахад’ турӈась. Пыда таняна ведущий методистӈэ’ манзара, мел’’ не, ӈудидо’ мэта’’ ненэцие’’ манзаям’ теневана. Оман’ ядэлаваць. Таняна мел’’ не’’ няюв манзарась. Хибярихина саць’ савархась ӈобкана манзаравадо’. Маць: тамна турӈая тарця хибяри’’.
