Александр Анатольевич Сотруев Саля’хардахад’ товысь. Пыда ваеравы си’’ивхана Няръяна маркана илена’’ мел’’ ненэцие’’ нида’’ лэвна маторась тохолабидась. Мастер-класс’ манэ’’лабтабись.

Мань’ тикы хасавам’ лаханакурць ня’’ӈавась. Тарця вади’’ хэтась: – Мань’ Саля’хард маркад’ тодамзь. Окружной Дом ремёсел’ мя’’ма таня, таняна манзарадм’, лэхэд’ манзаи’’ мадабидм’. Няръяна март’ нертеймэвна тодамзь, мастер-класс’’ манэ’’лабтабагудм’. Маня’’ яханана лэвна’’ маторана’’ ненэциена таня, пыдо’ манзаидо’ ваде’’тадм’, хэтгув: ханзер маня’’ яханана манзарава’’. Округна Дом ремёсел’ мякана маля самляӈг по’’ манзарадм’. Пэртя’ манзаяв’ ивнян’ ӈа’’. Мань’ нюдякодан’ маниевась: ханзер’ мел’’ хибяри’’ лэхэд’ матора’’, хурка манзаи’’ сертамби’’. Нисяв’ Анатолий Павлович Сотруев мел’’ ненэць, пыда илеванда ямбан лэвна’’ маторовам’ манзаяӈэ’ мэ’’ӈада. Нюдякодан’ нисян’ хэвхана мэсь, манзаравамда маниевась, нядаӈгосьтыдм’. Школахана тоходаван’ мальӈгана маля теневамась ханя тамна нерня тоходанвась хантадм’. Саля’хард маркана многопрофильный колледж’ таня, тикы колледж’ сидя ёнар’’ хасуюдимдей похона ёльцедамзь. Специальностюв’ – художник декоративно-прикладного искусства. Колледж’ пуд тикаминда Дом ремёсел’ мят манзаравась тодамзь. Манзараван’ сер’ тамна Менделеев’ нювм’ нюбета Тобольский государственный педагогический академияна тоходанамась. Маля хаювы по’ ӈарка пэвдэй ирийхана диплом’ ня’’амамась. Таняна тоходанась саць’ савась, мебэта’’ тохолкода’’ сими’ тохолабиць. Мастерскойхана манзарасьтыва’’, хуркари’’ ивняна ӈэда’’ манзаи’’ сертабасьтыва’’. Самлязимдей курсхана тоходанбан’ курсовой манзаяв’ тохолкодан’ мастерскойхана сертамбивась.

Нисяв’ сава тохолкодав’, теда пилибт’ сими’ нядабасьты’’, табадабсеты тарана серт’. Мань’ инзелесьтыдм’, тикахад’ ханзер’ хэтгуда, таремъюв’ сертаӈгув’. Тикахад’ сими’ тохолабвы тохолкодин’, пыдо’ някундо’ тэворцетыдм’, тарабнанда хонаркосьтым’- ханзер’ ӈамгэм’ сертась’ саварка. Маня’’ яханана ӈудидо’ мэта хибярина тянё ни’’ӈа’’, поӈгнандо’ тарця ӈацекы’’ таня – хибя’’ няюв ӈобкана тоходанаваць. Нина’’ хобсетына’’, лаханакурцетыва’’, няхатана’’ тоходанава’’. Сертавы’’ манзаина’’ манэ’’лабтабасьтыва’’, ӈамгахэвам’ ниня’’ тарем’ сертабнана’’ – ня’’хана’’ хэтбасьтыва’’. Тикы’ пуд ханзер’ тара, тарем’ сертаӈгур’ манзаямд’. Тикахад’ Саля’хардан хусувэй районхад’ мастер’’ турцеты’’, пыдо’ манзаидо’ маниесьтыва’’, пыдо’ няюв’ манзаина’’ ваде”цетыва’’. Ӈани’’ тоходанва.

Мань’ нянэвна лэвна’’ маторадм’, лэхэд’ мадавы’’ манзаин’ маля ӈока. Персональной выставкам’ тамна нимась’ хамадабю. Нерняна тарця серм’ нямна ив’ ядэрӈа, ёльцяда тэвӈгу. Дом ремёсел’ мякана манзаранаӈэ’ окружной фонд’ е’’эмня манзаи’’ сертабива’’. Тикахад’ манзаина ханяримна ӈэдалёрӈа’’, хуркари’’ яхана танеда’’ выставкаха’ ядалэйдо’. Москва’ маркана хусувэй по’ танеда «Северная цивилизация» нюбета выставкан’ хан’’ласьтыдо’. Нерняна товнда ирийхана тарця выставка’ ӈани’ ханярид’ товы’’ ненэцие’’ ма’’лаӈгу’’, мел’’ хибяри’’ таняна ма’’лаӈгуд’. Мань’ тюку по’ Москван’ манзаин’ ханагудм’, мастер-класс’’ таняна танеӈгу’’. Тикахад’ округханана сян’’ тенз’ выставка’’ танесеты’’, пуняна нисьтыва’’ хаюр’’, манзаина таняна ӈобтарем’ манэ’’лабтабасьтыва’’.

Няръяна мар’ нюдяко мар’ ӈэвы. Пыдара’’ яхананда ӈока сава хибярим’ манэ’’ӈадм’. Мар’ вадюдана, паской, хибярида сава. Мел’’ хибярида тянё нивы’’ӈа’’. Ханяӈы’’ нюртеймэвна бор-машинана манзара, ни’’ пин’, матора, тоходанван’ харва’’. Тикы саць сава. Тоходанван’ харвабнандо’ манзаидо’ ӈадимдангу’’.