Ваеравы ирийхана Няръяна март’ турмы’’ мядондина тянё ниць’ ӈа’’. Яндахат’ товы’’ хибяри’’ таняць. Нянэй ненэця’’ мядондина ӈод’ турӈаць. Малӈэ’ пыдо’ ӈарка’’ пэ’ хой тяхана ӈэда’’ округхад’ турӈаць.
Мал’’ турмы’’ хибярина хынокад’ ненэця’’. Харто’ яханандо’ «Вы’ сейм’» нюбета группахана хыно’’ӈа’’. Малӈэ’ ӈацембой хасавако’, пирибця’. Нянандо’ ӈармбэй некоця ӈэдалёрӈа, невхы ярабц’’ мэта не. Нюмда Галина Пянковна Вануйта. Нянанда лаханакурӈамась, нями’ мась: – Мань’ Яр’ Саля няд’ товэм’, Яр’ Саля терам’. Ехэрана ям’ манэ’’манзь’ тодамзь’. Теда ям’ савовна ӈули’’ манэ’’ӈав’. Ненэциеда’’ ӈули’’ сава ненэця’’ ӈэвы’’. Мал’’ лахана’’, ӈули’’ сава. Теда маймба мякнани’ вадет’’ нинув’ тикыни’. Тамна таюв’ хан’’ӈаваць, хардакон’ ханяна нянэй ненэця’’ иле’’. Таняюв’ ӈэдалёбнана’’ сян’ ӈэсыкоцям’ хаеваць, халядана’’ манэ’’ӈаваць. Инян’ мадамзь: тикан’ нултабнана халядами’ хоидамзь’ӈэй. Тикад’ тамна хэ’’ нивам. Ӈули’’ сава. Халядани’ ядтаваць, тикахад’ яда’’ ядэрти’’ манэ’’ӈаваць, харкында’’ ӈэдакы’’ хадри’’. Хоркы есь’’ мэта’’ ӈани’ танесеты’’, тикы поё’’хана. Тарцяӈэ’ пэръян’. Ханена’’ ним’ тане’’, ханяӈэр’ тэвасим’ ня’’амӈгу. Сыра’’ ёльцяӈгана тарця’’ ӈэ’’ним’’. Сарпякона хадаӈгуда тэвасикомда. Тарем’ ядэрта’’ ӈэва’ сер’ ӈа’’.
Теда ӈани’ яхана’’ ӈэдалаӈгуна’’.
Корр: Маля’’ пон’ ӈэдалёрӈада’’?
– Маля’’ понӈэй’’. Тэдохова тэри’ сава. Пон’ ӈэдалёрӈава’’. Москвана сеӈгува’’, тикад’ тад’ хэ’’мявахадана Саля’хардан’ тэвӈгуна’’, таняна сеӈгась’ хар’’ни’ яхани’ пяӈгув’, Яр’ Саляни’. Ядэрць’’ нятини’ тохолкурта’’ ӈэ’’ним’, тикахавини’ Саля’хардана хаёвнда’’.
Корр: Ӈавнанда пыдар’ ханяна соявэн’, со’’явы яр’ ӈамгэ’’ я’’?
– Мань’ ӈавнани’ тамна Яр’ Саля тяхана Новый Порт’ таня’’. Новый Портхана соявэм’. Мань’ ӈари’’мана соявэм’ лекарьхарт’ яӈгувы’’. Хой’ някуна нянэй мяду’’ мэ’’мы’’ ӈани’’. Тамальӈгана мань’ нисянани’ рыбакӈэ’ таравы’’. Халям’ пэрмы’’ ӈань, мань’ нянэй мякана соявэм’. Тайкуй’ няни’ ядэрта не ӈацекэнд’ нисянда небя ня’’амвэм’ тамна. Луца’’ вадавна ӈамгэ’ Иры ӈэдакы? Хор’’ иры мюний’ ӈэвы. Танядэт’ ӈэдам’.
Корр: Хойхана илесан’, нянэй мякана?
– Тальнявахана хой’ няна илесадамма’’. Хой’ няна иледамзь’ ӈани, тикахад’ нями’ юху’’ нисяв’. Нята’ нями’ лодкана юхусь. Ӈанона’ хаясь. Хэбнанда хасава нюни’ синдтетпой ялядась. Сиднтетимдей ялямда тамна вунива’’ мэс’’ ӈобкана. Тикани’ тальня’’ илевани’ нюни’’ вадэйнась. Няхар’’ нюми’. Хардана мэнами’ таня, тэна мэнаха’ ӈани’ таняха’. Тикавини’ харто’ иленя’’. Ӈули’’ ӈарками’ не, Сэротэттана’’ хаюпи’. Ӈэсына мэсь’, тедахова хаи’’. Небо’ ты’’ ха’’ ним’’. Ӈарка’ хасава нюхувами’ Юрибэва’ таня’’, Юрибей’ хара няна’’ иле. Портана’’ тю’’уна мэ’’. Таняна иле. Харта тыда’’ пэрӈава’’. Маня’’ хардана иленаӈэ’ теда няхар’’ма’’. Теда, ню’’ни’’ ӈарума’ сер ӈань, ти’ ядэлыв’’. Ман’’ нидум’: таӈгал’’мани’ сер’, ехэрана’’ ненэцие’’ манэ’’карцюдм’. Ӈэсыдан’ манзадам’. Мам’’: тарем’ ӈэдалёрпани’, ехэрана’’ ненэцие’’ нинакэдм’ манэс’’? Клубан’ хаядм’, тикад’ сими’ таминда ням’ ним’’. Тедахова ӈока ям’ падтамэй. Тюмень’ ӈэдакы, теда Москвам’ манэ’’ӈадамню, Няръяна март’ тэвыв’’.
Корр: Нянэй ненэця’’ ханярина иле’’, Няръяна маркана таня, Таймыр’ няна иле’’ма’’, ӈобтарем’ хойхана мюсерта’’. Тикахад’ Ямалкана ӈока’’ма’’. Маня’’ ӈопой паӈгхад’ перева’’, ненэця’’ ханярина ӈоб’ толас’’, няхататто’ яӈга’’?
– Сэвханато’ маниесь яӈга’’ма’’ таранзяханандо’. Ненэцяӈэ’ пыдавидо’ мал’’ ӈоб’ то’’ласэ’’. Таранзяридо’ пи’ няд яӈг’’ним’’. Ненэць’ харта ӈоб’’ то’’олас вуни’’ӈа’’. Тодо’ я’’ ӈэвадо’ нив’ ӈа’’. Тодо’ я’’ тер’’ ӈэвадо’. Теда, тэхэна’’ мэхэкар’’, тэкоцянд’ тензада яӈга’’. Падвэр’’ падвыню, сэрар’ сэр’’ма’’, сэлхар’ сэлхарава’’, париденяр’ паридева’’. Ненсял’’ ӈани’’ ӈоб’ тикым нюда’’ нив’’. Ти’, харта тарця.
