Вы здесь

Ӈарка ялямдо’ мэ’’ӈаць

Маня’’ округханана санаторно-лесной школава маля ӈока по’’ ямбан таня, таняна округна ӈэсыхыт’ товы’’ хануй’’ ӈацекы’’ пыдадо’ савумдамбавандо’ мальӈгана тоходансеты’’. Ханяӈэна сян по’’ ямбан илесеты’’. Тарця ӈацекы’’ тянё нисьты’’ӈа’’. Пыдо’ няюв манзараидо’ теневана’’ хибяри’’ манзара’’.

Санаторно- лесной школам’ Няръяна маркана ёнар’’ хасуюёнар’’ тет ю’’ тетимдей по’ июнь’ ирий нюртей яляхана нэдось. Тамальӈгана нюмда тарцясь – Нарьян-Марская оздоровительная школа. Нюртей директорӈэ’ Карпов Николай Степанович тарась. Нюдяко’’ ӈацекы’’ Малик Ирина Андреевна тохолабидась. Сямянд’ нюртей воспитательӈэ’ Александра Андреевна Ануфриева таравысь. Нюртей лекарьӈэ’ Зексель Т.В. манзара пявэдась, медсестраӈэ’ таравы Шалина Н.В. Санаторно-лесной школа сямянд’ нюртей тоходанна’’ Ӈарка яхад тэвравы’’ ӈацекы’’ ӈэвыць: Анатолий няби Федор Мохте, Ирина Хенерина, Клавдия Коскова, Николай Валей, Пантелей Чаклинов, Андрей Ануфриев, Алексей Рокин, Константин Рокин, Анастасия Николаенко. Тамальӈгана ӈокханда школахана сидя ю’’ сиднтет ӈацекы’’ маля тоходанаць. Ӈокаювдо’ тивак’ хабцяӈгана хаӈгуртаць. Школам’ маркана таневы ныланава’ хардахана нэдось, таняна маля подсобной хозяйстводо’ танявысь, матлава, халтаӈгова харададо’ таняць, хуркари тарана ӈаворидо’ мал’’ хамадёвыць. Хойхад тэвравы’’ ӈацекы’’ луца’’ ембярка ембпидось. Школахана ӈацекы’’ ненэця’’, луца’’ вадавна тохолабидось.

Сидя по’’ ваерась школа – семилетней оздоровительной школаӈэ’ хаясь, таняна маля тет ю’’ няхар ӈацекы’’ тоходанаць – 28 ненэця’’ ӈацекы’’, 15 ӈысма’’ ӈацекы’’ӈэвыць.

Си’’ив ю’’ по’’ ямбан юкад’ вата директорӈэ’ таравы’’- нюртей Карпов Н.С., теда Пакулина О.С. 2005-2006 поход школандо’ нюм’ тарця: ОГООУ «Санаторная школа-интернат».

Теда ӈод’ тикы школахана хаӈгурта’’ ӈацекы’’ тоходана’’, пыдо’ няюв тохолкода’’, лекарь’’ манзара’’. Таняӈы похо’’на толырто’ си’’ив ю’’ ӈэсонд тэворцеты’’.

Ӈока по’’ ямбан школахана манзараць, ханяӈыдо’ тенад манзара’’, тикы Л.П.Кузнецова, А.И.Протасова В.Н.Иливанова, М.М.Истомин, Ф.В.Вологжанинова, А.С.Коскова, Н.И. Мелехова, Т.С.Коткина. Нянэй некоця ӈод’ таняна пилибт’ манзараць, теда манзарана’’ поӈгана Н.В.Корепанова, пыда ервандо’ ӈуда ӈылӈэ’ тара, П.И.Кауц, Ю.А.Ледкова, П.А.Большакова.

Тюку яля’ школахана хибяри’’ манзара’’, ӈацекы’’ тоходана’’. Мал’’ пыдо’ ӈока ныхымдо’ манзаяхато’ паклемби’’. Ӈацекэхэна сава ӈэва’’ е’’эмня манзара’’. Тены’’ похо’’на манзарана’’ нина’’ нямна падвы вадина тамна нерняна танеӈгу’’.

Тюку ирий пудана яляхана санаторно-лесной школахана манзарана’’, тоходанна’’ школандо’ си’’ив ю’’ пом ядабтаӈгу’’. Тарця яляхана ӈока ихид’ ӈэда’’ вади’’ намдгу’’, мядонда’’ мякандо’ тута’’. Ханяӈы мядонзэйм’ тэвраӈгу’’, ӈока по’’ ямбан сававна манзаравы’’ манзарана’’ благодарность, грамоты ня’’амгу’’. Тикы нямна тамна паднаӈгува. Тюку яля’ мань’ школахана манзаранаха’ мададм’- пыдара’’саць тарана манзаям’ пэрӈада, хаӈгурта’’ ӈацекы’’ няюв манзарада’’, нерня ӈод’ харвась манзаянда ядада, хусувэй ӈацекым’ маймбась ядабтамбида. Сензда ӈада, ябда иледа, недбида сава ӈэя!