Я’ хой ниня ю’’ мя’’. Ӈэсындо’ ервота Сидя Сэрм’ Мэта. Ся’’ны ӈэбта ӈод’’ ӈэсындо’ ервота поёрӈа. Харасяда ян’ ӈэдалэй’’. Неранда няна ӈоб’’ мя’’. Мяд’ хэвхана ю’’ ванде’’э. Сидя Сэрм’ Мэта ханамда сярада. Мят’ яда. Сырада салмуй. Хуерябт вэн’ яда’’ма, ты ядамахарт яӈгу. Мят’ тю. Мякана вэсокохо’, пухуцяха’ ӈоб’’ ёхорт’ ӈамдавэхэ’. Едэй товы хасава вэсако’ си’ няӈгы хэван’ ӈамды’’. Вэсако ма: – Худ ядэртан?
Хасава вахалъй’’: – Тэри тайкуд ядэрӈадм. Мань Сидя Сэрм’ Мэтам’ нюбе’’ӈадм’. Вэсако пухуцяханда ма: – Едар пире’’. Пухуця сянамбой санэй’’. Тумда тюне. Едм’ ӈыда. Товы хасава сэварида мэ’’ӈа. Тяханяна, пелей’ няна падавы вэно’’ небя сяравы. Нюкця венекоцяда танявы. Ӈули’’ париде. Пухуця ӈопой’ таня худамй’’, тарем’ ма: – Тюку вэнеко’ хани ӈули’’ налнэрӈа, ни тара. Мядондами ябсяламда. Си’ панувна пин’ мода. Ӈамгэ пирка’’на еддо’ пи. Ӈамзи теда. Пелей’ няна ӈани’ ӈоб’’ вэнекоця сярцей’’. Пухуця ӈопой худамй’’, манэ’’ӈада. Сэр’’ вэнекоця ӈэвы. Хасава си’ няӈы хэван’ мода, ма: – Мядондани яб! Хасава сеӈгабата сава.
Вэнекоця Сидя Сэрм’ Мэта си’ няӈы хэвахана лябтабарӈа. Тамна сэваси. Ӈаворць ӈамдыд’’. Ӈани вэнекоця сярцей’’. Пухуця санамбой’ тяханя’ санэй’’, ма: – Тюкохов хора сэр’’ вэнекоця ӈэвы. Мань нюми.
Едамдо’ ӈаадо’. Сидя Сэрм’ Мэта’ Ирида ядэрӈа: «Сеӈгаӈгодакэдм’.» Хонэяд’’. Хуняна хубтахана юркыд’’. Пухуця вэсокохонда ма: – Сеӈгнанд тэд хо’’ин. Мань сеӈгняни мюдм’ хурахадм’. Пин’ тарпаяха’. Мале пон’ нись мы’’ хасава ӈани’ пин’ тарпы’’. Пухуця ханяд ӈамгэхэд ӈадимдевакыда, юд’ хурюдам’ хуравы, тикыта малан’ нойтана ханм’ хамэдавы. Вэсако хой’ няд сидя юд сэрм’ вада та, таминанда мюдм’ пуйда. Нойтана ханан’ сидя сэр’’ хабтм’ подерӈа. Пухуця мякад сэвасяда вэнекоцям’ ӈадимде, нойтана хан’ ни’ мода, ма: – Вэсако, не нюмд сеӈганани’ пумна парабтаир.
Сидя Сэрм’ Мэта ӈэдалэй’’. Вэсако нойтана ханам’ ненэця’ пумна валӈада. Хасава ӈоб’’ ӈэдалавахана хая. Идя ядэрӈа: -«Вэнеком’ ханя’ минрев. Нини ха’’манда’’.» Сидя сэрекоця хэвувнанда хайнаӈаха’. Нултади’. Не ханан’ ялъй’’. Ной пис’ ӈэвам’ тю’’уку’ мэда. Сэвасяда вэнеко сэвармы. Ной пис’ ӈэвам’ ӈани’ тасику’ мэда. Ихинянда ма: « Ет’ ханахав. Вэсакохо’ пухуцяха’ тавы мюдми саванё’’. Ӈани мюдӈэ мэӈгу’’ нивав’’. » Ӈани’ ӈэдалэй’’. Ӈамгэ пирка’’на нултада. Идя ӈани’ ядэрӈа: -« Вэнеком’ ханя’ минрев. Нини си’’ми писядаӈгу’’. Ервотава’’ вэнеком’ тавы.» Сидя сэреко’’ хэвувнанда нултади’. Хасава не’ ханан ӈани хая. Ной пис’ ӈэвам’ тю’’уку’ мэда. Вэнекоця ӈармы. Тэванда нид тёсьне, сидяри сэвамда мэ’’ӈа. Сидя Сэрм’ Мэта ной пис’ ӈэвам’ ӈани’ тасику’ мэда.
Малда ни’’ӈа’’
