Маня’’ округханана хуркари’’ тенз’ ненэця’’ хари’’ культурамдо’ тю’’у минрева’ серт’ ив’ ер’ сырӈа’’, тикы е’’эмня ӈокавна манзара’’. Культурам’ манэ’’лабтавахана нядаӈгодидо’ таня.

Хуркари’’ тенз’ мэта ненэцие’’ ӈобня’ пэртяӈэ’ нянэювна округна этно-культурный центр нюмдембива’’. Тюку по’ этно-культурный центрава сидя ю’’ помда ядабтамби. Сидя ю’’ по’’ ямбан хуркари’’ тенз’ ненэцие’’ культура’ нямна таняна манзарана’’ харто’ манзаидо’ минре’’. Со’’яма яляндо’ нямна хамандавы ма’’лёвамдо’ этно-культурный центр’ манзарана’’ тюку ирийна няхар’’юдимдей яляхана мэтадо’. КДЦ мякана ӈарка концерт’ ваераӈгу. Нина’’ программамдо’ таремъюв’ нюмдедось: «Живи традиция.» Тарця ялян’ культура манзаям’ пэртина’’ теда хамяку’’.Хусувэй яля’ хуркари’’ коллектив’’ ма’’лы’’, этно культурный центр ӈарка ялямдо’ мэтадо’. Тюку ялян’ тэвась округна этно-культурный центрхана манарана’’ коллектив’’ тянё ни’’ӈа’’. Маня’’ яханана илена’’ хуркари’’ тенз’’ мэта’’ ненэця’’ харто’ коллективдо’ таня, поӈгнандо’ усцилём’’ «Родные напевы» нюбета народный ансамбль, «Печорянка» ӈысми’’ ансамбль, ӈацекы’’ фольклорный коллективэ «Талица», тамна ӈацекы’’ ӈопой группа «Тиньганьяс». Этно-культурный центрхана нянэй ненэцие’’ отдел’ манзара, маля ӈока по’’ ямбан ненэцие’’ самодеятельный театр «Илебц» хари’ манзаида ханярина манэ’’лабтамби, маля сидя по’’ ямбан «Ханибцё» фольклорный группахана нина’’ хыно’’ӈа. Тамна этно-культурный центрхана «Заполярьем» нюбета литературный объединение манзара, таняна округна паднана’’ хибяри’’ ма’’лы’’. Пыдо’ падвы’’ манзаидо’ хибярина теневыдо’. Этно- культурный центрхана ненэця’’, луца’’, ӈысма’’ вадавна падвы’’ книги’’ сертамби’’.

Этно-культурный центр’ мякана манзарана’’ хуркари’’ тенз’’ мэта’’ ненэцие’’ колектив’’ харто’ культурамдо’ тю’’увку минре’’, хари’’ культурандо’ нямна манзара’’. Ненэцие’’ коллективхана манзарана’’ нина’’ минрена’’ серкато ив’’ер сырӈа’’. «Илебцхана» сянакода’’ нина’’, «Ханибцёхона» хынота’’ нина’’ малӈэ ӈарка, тарана манзаям пэрӈа’’. Тарця манзаравандо’ е’’эмня ӈобкартадо’ есям ни’’ня’’амарпю, тарем’ ӈод пыдо’ хусувэй си’’ивхана ма’’люрцеты, хуркари нумӈгана репетицияхато’ паромбась ядсеты’’. Хари’’ тенз’’ ненэцието’ вадам’, невхы илм’, культурам’ теневана’’ нина’’ хари’’ паӈгамдо теневава’’ е’’ эмня ӈокавна манзара’’. Пыдо’ ненэцие’’ культурам’ манэ’’лабтабавась ханяримна ӈэдалёрцеты’’, маня’’ вадана вабц’ ханярина илена’’ хибяри’’ намдурӈадось.

Тюку по’ этно-культурный центр сидя ю’’ помда ядабтамби. Историяда маля нюдя ни’’ӈа. Сидя ю’’ по’’ ямбан культурам’ минрена центрава сэвхана маниесь вады. Нядандо’ ӈока сейхана сомбой мероприятия’’ миӈа’’, хусувэй по’ фольклорный фестивалька сидна’’ ма’’лабсеты, «Сава сё», «Печорянка», «Визула ю» конкурсха торомбэва’’, народной творчество смотр’’ танесеты’’.

Хуняна маркана илена’’ хибяри’’ этно-культурный центрхана манзарана’’ няхато’ сейхад ӈэда’’ вадидо’ мэ’’манзь ма’’лаӈгуд. Сава ихиня хамандавы концертхана ныланаӈгу’’.