Анисья Васильевна Канюкова Омахана иле. Ӈока ню’’ небя. Сырэй мальӈгана не’’ нюта’’ хэвхана маркана илесеты. Мань’ тикы нем’ ма’’лёвана мальӈгана хомбивась, иланда нямна хонравась.
Анисья Васильевна тарця вади’’ мэ’’ӈась: – « Мюсерӈамась, тэна мэмась. Тет ю’’ по’’ ямбан выӈгана мюсерӈамась, таӈок по’’ ямбан манзарамась. Пуданана «Восход» колхозхана манзарамась, тикы нерцюна «Россиясь», тамна тяхана «Чкаловась» колхозва. «Чкаловхана» манзарась пявась. Тикахад «Россияӈэ’» колхозва’ хаясь, тикахад’ «Восходӈэ’» хая. «Восходхад» пенсиян’ тарпываць. Хасаван’ ня мюсерӈамась. Канюков Елисей Максимович вэсаков’, ты’’ пэртясь. Саць сава хибярись, сававна манзаравы хибяри.
Семьясавэй мюсерӈаваць, тамальӈгана саць сава ӈэдархась. Маӈгартаӈгу нин’ хардахана илеб’ сава ӈэдакы. Ӈэсыхына илева нямна ир’ нисьты ядэр’, нисьтыва ман’ – хардахана илеб’ сава ӈэдакы. Лакамбой деревнян’ тутан’ ӈаврадабт’ хосеявась, ир’ таминда хой’ нямна ядэлаӈгу’’, пуня’ хэван’ харвасетыва’’. Ӈацекы’’ каникулто’ ёльце’ тэвась хоян’ мякандо’ парумбаӈгу’’. Сырэй мальӈгана хосеявась тобнана ёлкартан’ хаёван’ нисьты’’ харва’’. Мят’ хэван’ харвасеты’’. Масьты’’: ӈэдалахана’’, ӈэдалахана’’, мякана хэхэва’’ ӈоб, ёлька ни’’ тара маня’’ нянана’’.
Ӈацекын’ ӈокаць, ӈоб’ яӈганям вадаманзь. Теда пыдо’ мал ӈарка хибяри’’, няхар не’’ нюв’ маркана иле’’. Мань’ не’’ нюн’’ хэвхана илесетыдм’. Елена Елисеевна не нюв, теда тоходанвась хаясь, пыда хасава нюкцямда теда пэрӈадм’. Культурана манзара, теда манзаравахана высшей образование’ тара, ӈодьбянда тоходана.
Маркана илева иб’ӈод хань’ сава ӈа. Мякана иба, яӈга тодаламба ни’’ тара. Уголь’ пэрць ни’’ тара. Ита кранхад’ миӈа. Харван’ япда и, харван епьда итап мэӈгун’. Омахана тэна’’ мэнана ӈани’ хуний система нинарха’ тара ӈоб, пяхана тодаламбада печь’ ханяцей сава.
Тэна’’ мэнина сырэйхана Ома’ хэвхана мэсьты’’, апрельхад’ нерня ханта’’, таӈы мюсерць яхато’ пяӈгудо.
Хойхана соябэм’. Нисяв’ Василий Филиппович Бобриков войнан’ хаясь, таняна хавысь. Мань’ няхар повась, нив’ тене. Нея’ хасав Фёкла Ефимовна масьты – ялэ’’ нисят’ хэвхана мэсьтын’. Саць сими’ сямы ӈэсьты. Нисянан’ ядэрцетыдм’, ханяна ханда ниня’ хонараӈгувти’. Нися’ хасав сё’’ мэта ненэць ӈэвысь, саць сава хибяри ӈэвысь, нямбара. Хибяри’’ вадецетыдо’, масьты сядота ненэця ӈэвысь. Небя’ хасав ӈокавна манзарась, самляӈг ӈацекесавэй хаись».
