Тюку яля’ Матрёна Ивановна Талеева падвы пьеса’ няхарамдэй пелям’ толара’’, няна’’ падвы манзаяда ямб’ янамбовна мал’’ газетахана падвы ӈэӈгу.

Пале мунзялма, яха’ няю сырӈа, таняд’ нернда ӈацекы’ мун’ со. Нерняна’ паромбари ӈарка нерзянсавэй Саля яда, пумнанда нюдяко нида, ханяӈы панханато’ пэкоци мине’’, ханяӈы’’ икна панта сяйник минре’’. Мертёвна ицавэй сяйникдо’ мят’ ханэйдо’’, нюдяко ӈацекы’’ нисяндо’ няю маймба сюрбыд’’. Саля пин тарпы’’, пя’ севолм’ ня’’ма, мяд’ няю ядалй’’. Пале вадарэнда’ пумна сырӈа. Тыне хасаванда саӈом’ хамадада, невхы ватом’ хасавада нида юрӈгу’’. Тыне сёнзянда мюй’ тудрев ядемя, ида вома, ладвэдрев’’, мята’ няю ядалй’’. Пале нюдяко ӈацекыта’ няюна хая.

Пале: Сара, Татё, ханан’ нерняна сар’’ню ӈа’’, мят’ янамбовна ханэйди’. Саляра’’ пуна пиреӈгуда. Петё, Яктя, пыдари’ ӈани’’ ябту мяд’ няю ханэйди’. Сяй’ пуд ниӈгиди’, пэвсюмы’ ӈавормаханана’’ ябто’ ям’, ӈамзам’ хортава’’. Хуняна’ харвабта халяком’ татадм’. Няманзэйм’ яхан’ мяраманзь.

Саля: Небёв, едва’’ ядемя, столва’’ ӈамтаӈгудм’? Ӈамзи тедӈгун? Нисява’’ ӈамгэм’ тавыда’’? Няна’’ нин’ маймба лаханавадо’ соню’’?

Тыне: Нисяр няхар’’ ябтом’ ядавы, тамна сидя ӈа’’ ӈо’ пидям’ ховы. Теда’ нид мят’ татыдо’’. Пэвсюмы’ сяймахана сар’’ ню, ябтом’ пиреӈгуни’. Едэй ӈаварм’ хортава’’. Саля, тарем’ сава? ( Саля небянда сят’ сылы’’, ихинянда пыса, небяда няданда юнра).

Саля: Небёв, ханя’ сава ӈата, нядан’ юнрава тараӈав’’, ханзер’’ харт таслар тарем’ ӈэӈгу. Нисяв, Нин сяйманзь хандын. ( нём’ нэ, пин’ тёрей’’). Ӈэцёв, Саров, Татёв, Петёв, Яктя, ӈавортава’’! Ёкора’’ ханзеӈгу. ( Пихид ма’’ мят’ тю’’, хусувэй харта ӈамдёлаваханда ӈамды’’, ӈаволыд’’).

Тыне: Нумда саць ниню’’ ядембю’’, харвабта ӈэрм’ яляӈэ Ханта. Небяв, Хаврява’’, папав’, Еванем’, не нюди’’ ӈана нинаць вэдамбю’’, мято’ яв’ вархана ӈэсьтыню’’ яв’ халядава’’ ӈамзавна мэбна’’ сава ӈэись. Нисяна’’ яӈгума мале’ самляӈг поӈэ хая. Мика’ папан’ Еваненда’ ня тет не’ нюди’, хури’’ мале’’ вадёванӈгабя’’. Еване харта хасава нюда ӈоб’’ тарем’ самляӈг яӈганя пота, сидя потаком’ хадада хаередась, тенад’ нянанда иле, небян’ мят’ турмакы харвабта. Ӈацекы’’ын’ нися, ӈамгэм’ хэтӈгун?

Пале: Вэвада яӈгу, мядона хахаяван небямд’ манэпа’’ни’ тара. Ӈобкана ӈэдалёркани’, ӈока по’’ ваера’’, нябар ӈамгэм’ хэтӈгу, вадамда хар’’н’ хаханан’ намдван харвав’’. Сидя ӈацекэми’ мядоманзь ханаӈгуни’. Сидя ханхана ӈэда-лаӈгуна’’. Мяд’ ервӈэ’ Салява’’ ӈэӈгу, тына’’ ӈод’’ манасартыдо’’, няхарӈэ ты’ няю ханта’’. Тыто’ ва’’анван’ хобцкурта’’. Тыне, тарем’ сава?

Тыне: Тарем’ ӈэёв! ( маймба вахалй’’). Нумда теда’ писавэй яля, сармик’’ яӈгу’’, варк’’ ӈо’’ ни ӈадибер’’. Харвабта сеӈггуни’. Небян’ вада хурка ӈэӈгу, ӈадьӈгува. Саляко, ты’ няю хэбта’’, хаёвнда вэнод’’ сяръид’’, пумнани’ нибто’ то’’. Сэвко’ вэнекомд’, нянанд’ ты’ ня ханаин, пыда танырпата мел’’. Мят’ нём’ есанабцьӈгана мэйраир’’, мерця нём’ нибта нэ’’. Няхаюд’ хэвхананд’ мэяха’, ӈобкана сейтада’’. Трубамд’ нён’’ юр’’, янда’’ амна сырцету’’, хэвний’’ ты’’ лэркабт’’ нёя’’ то’’. Ӈысма’’, колхозник’’ мядодо’ хахаи’’.

Саля: Небёв, нисёв, нюртей мэва’ вунива’’ хаюр’’, иди’ нёя’’ няркна’’, вэнон’’ сярӈгун, ни’’ын’ ня тына’’ сававна лэтмбаӈгуна’’. Нер’’ пилю мят’ тюсь, тецьда нум’ ӈэӈгу, хакэва’’ тарем’ манзьты. Ханзо яляко ӈэбта савась. Ядембата тына’’ хадырманзь яв’ няю ӈэдараӈгун, ва’’ан вась мяна’’ хэван татын, неняӈгахат пурадм’ сертаӈгудм’, пилё’’ таняб’’, пилёндава’’. Ӈэцёв, сава!