Максим Ледков «Харп» колхозхана манзарана ненэць. Паӈгуда хойхана мюсерта’’ хибярихит’ миӈа’’. Ӈодьбянда Максим’ ӈод нюдякоданда хой’ илм’ теневада.

Школанда’ пуд ты’’пэртяӈэ’ манзара. Маля сян по’’ ямбан СПК «Харп» сидндетимдей ӈэсы серм’ пэртяӈэ’ тара. Манзаямда теневана хибяри, тыта мюсерць ям’ ӈод сававна теневада. Тикы хасава варёмда мэць тэхэна мэсьты, харвась’ хуркари манзаян’ сырцеты.

Неняӈг ирийна няхар’’ юдимдей толыркана «Харп» СПК сидндетимдей ӈэсыхына ты’’ялям’ мэта’’. Тикы ӈэсына теда ӈарка яляхандо’ хамяку’’. Сава нядаӈгодаӈэ’ мякана Максим небяда Валентина Петровна тара. Пыда хойхана мюсерць’ нюмда вадахана, серкана нянэвна нядамбида. Максим хаювы яляхана со’’яма ялямда мэ’’ӈась. Ты’’пэртя хасава неняӈг ирий’ сидя ю’’ няхарамдэй толыркана няхар’’ ю’’ пода панысь. Хойхана манзарана ненеця со’’яма яляхартада ты’’ялян’ ха’’мурӈа. Илевада тэхэт’ пере. Ирината, хадуната сарпявна мэёвна миӈа. Нерняӈы илӈгананда ӈод’ тарем ӈэя. Со’’яма ялянда ед’ ӈацембой ты’’пэртян’ тарця вади’’ мэ’’ӈадм’: тамна пон’ тарана манзаямда сававна минремда, сенз’ ӈэя, ябда илевамда мэ’’ӈамда. Ӈацембой манзарана’’ хойхана саць’ тара’’. Тарця тарана серкана, Максим, ӈоб’ нерня ӈэя!