Вы здесь

Падвэмда мядонзэйӈэ’ ӈэдарась

Тюку ирийна сидя ю’’ самлязимдей яляхана округна музей’ хардахана хибярина ма’’люрӈаць. Владимир Мельниченко нювм’ яханана илена’’ хибяри’’ савовна теневадо’, тикы падтаӈгода округханана ӈока манзаида падбись. Невхы похона’’ ненда Ада Рыбачук няюв’ Холгован’ ӈока тэвормэхэнзь.

Тюку’ мэвахана падвы книганда « Мы – о своём острове» презентация’ ваерась.

Владимир Мельниченко Ада Рыбачук маня’’ округханана нюртеймэвна ёнар’’ хасуюёнар’’самляӈг ю’’ хасуюдимдей похона товэхэсь. Тамальӈгана пыди’ ӈацембой хибярихись’, тандая Киев маркана художественный институтм’ ёльцебихись. Дипломный манзаиди’ Холгов’ ӈохона падбидись. Тикы похот’ округва мэнелӈаханзь’, Холговхана иленя’’ хибяри’’ сава няданди’ хаяць.

Нянэй ненэця’’ поӈгана ӈока илеӈахась, хоян’ тэворӈахась, Бугринохона мэӈахась. Ӈока падтавы’’ манзаи’’ сертаӈахась, тикы’ хавна скульптуры сертабихись, тадтавы’’ манзаиди’ таня. Музейхана ма’’лавы’’ хибяри’’ иба’ я’ тер’’ паднана нямна ӈока сейхад’ миндя’’ вади’’ хэтбиць. Юлия Александровна Ледкова илеванда’ ямбан падтаӈгоди’ теневыда. Пыди’ небянда, нисянда мят’ ӈока тэворӈаханзь. Юлия Ледкова тарця вади’’ мэ’’ӈась: – Владимир Меньниченко – падтаӈгода, недаАда Рыбачук . Нюртеймэвна яхана тобнанди’ мань тамна яӈгумась. Няхарамдэй тобнанди’ тикахана мань’ маля соявэмась. Тикахана’ тобнанди’ маля самляӈг повась, тамальӈгана сертавы книгана «Рисуют дети острова Колгуев» мань’ фотографияв’ лапцеты. Нюдякоцям’.

Дипломной манзаямди’ сертась’ тарась. Иба’ яхана тарця манзаям’ сертабась ниӈаханзь’ харва. Ӈэрм’ яхана манзараван’ харваӈаханзь, манэ’’ман’ харвадись тарця я’ хурка, хибяри’’ хурка. Тарем’ Архангельск’ ӈэсонд’ тоӈаханзь’. Таняна сава хибярим’ едте’’ӈаханзь, хуний мавысь: – Няръяна март’ хаяди’. Тикы сава луца Гударев ӈэвысь, тамальӈгана маня’’ яханана окружкомхана нюртей секретарьӈэ’ тарась. Тарцям’ намдась, тюкон’ тоӈаханзь. Маркана Левчаткин ядтавэхэнзь, тикы хасава «Няръяна вындеркана» редакторӈэ’ манзарась, пыда нянди’ мавысь: – Холгован’ хаяди’. – Ханзер’ таня еримданида?,- пыди’ хонаркуху’. Газетана мэваханди’ сер’ Левчаткинан’ теневана няда’ тювысь Дмитрий Жуков, хуний «Юшархана» капитанӈэ’ таравысь. Левчаткин нянда ма’’нив: – Холгован’ ханахаюд’. Тарем’ Холгован’ тоӈаханзь’.

Теда Холговхана ӈока хибярина сидди’ тенева’’. Ненэця хибярин’ харти’ саць’ саваханзь’. Пили’’ ненэця’’ поӈгана илеӈаханзь’, ӈайбарць’ тухуӈанзь’. Пуна Бугринохона илебти’, маня’’ хардахана турцетыхы’. Ӈайбартаӈаха’. Нисяв’ Ӈарка Санкоӈэ’ пэрцетыдо’, небяв’ Степанида Ивановна Апицына. Григорий Иванович Ардеев небя, нися’ хэвхана илеӈаханзь, Нина Ивановна Хыльма не нядо’ тюкона иле, тикахад Клавдий Иванович Ардеев нида’’ ӈокаць, тикы мякана илесетыхы’.

Иван Егорович Ледков ӈод’ падтаӈгоди’ теневыдась. Е’’эмнянди’ тарця вади’’ хэтась: – Ма’’лёвана яляхана Владимир Мельниченко со’’яма ялядась . Тюку по’ падтаӈгода сиднтет ю’’ сидя пода паны. Маля ӈармбэй луца. Ӈацекэрка ӈэбнанда Аданда’ ня Холгован’ товысь. Маля понку’’ таняна илевэхэсь. Хибяри’’ малбуй’’ теневыдось. Пыди’ ӈод Холговхана илена’’ хибяри’’ теневыдись. Мельниченко книгананда тарем’ паднась: – Нюртеймэвна Холгован’ тобнани’ луца’’ хэвхана иленись’. Пыдо’ няни’ масьты’’: – Ненэця’’ хибяри’’ мал’’ ябехадко, вэвкоця хибяри’’. Поӈгнандо’ сава хибяри’’ яӈгударха’. Тикы метеостанцияна, Совхозхана манзарана’’ харто’ ханявахад’ тобэй’’. Иб’ӈод харто’ вэвковна вадета’’ хибярито’ поӈгана илець.

Падтаӈгодаха’ хусувэй хибярим’ со’’ вадецетыди’. Масьтыхы’: – сяӈгова Холгован’ ӈэдалёва мальӈгана Иван Ардеев ядтанись, хэвхананда нюдяко ӈацекэцяда ӈэдалыць. Билетдо’ палубной ӈэвыць, нюдякоця ӈацекыда таняна миӈаць, пихиня тецись. Мани’ каютами’ танесь. Ӈацекэци сяньзь’ нянда каютами’ ми’’ӈамись, хар’’ни’ тю’’уна миӈанись.

То’’махадана, сян’ яля’’ Холговхана иле’’мяхад, сырӈава’’- хой’ няд ӈэдалёда’’ то’’. Маня’’ хардакона хэван нултадо’, сидна’’ ханавась товы’’. Сырӈава’’, тикы хасава’ товы, хуний ӈацекыта няюв’ нянана пароходхана ӈэдалысь. Пыда сидна’’ хоян’ тэвра’’. Тарем’ ненэця’’ поӈгана пон’ илеваць. Нянэй хибяри’’ ёльце сава хибяри’’ ӈэвы’’. Идо’ сава, хибяхи’ вэвкова нисьты’’ сыр’’, вэвко вадам’ ӈод нисьты’’ хэтбю’’ хибяхартан’. Ненэця’’ е’’эмняни’ сямянд’ сава хибяриӈэ’ хаяць, илевани’ ямбан сиддо’ тенейни’’. Пыдо’ е’’эмняндо’, нюто’ мядонзэйӈэ’ «Мы – о своем острове» книгам’ сертамась, мядонзэйдо’ ӈэя.

Теда Владимир Мельниченко Киев маркана харта манзарась’ хардаконда иле. Небяданда, нисяданда хаювы квартирамди’ мирда’’ӈадись, тикы есяхана книги’’ сертабихись. Хибя’’ падтаӈгодам’ теневадось нянда лаханада, телефонда маркана илена теневанида теневадо’.