Маня’’ яханана хуркари’’ тенз’ мэта хибяри’’ хынёси’’ илевамдо’ ӈобкана минредо’. Хусувэй тенз’ мэта хибяри’’ харто’ вадамдо’ мэ’’ӈа’’, харто’ паӈгудо’ тенесь иле’’, харто’ культурамдо’ няхато’ манэ’’лабтамбидо’.

Сидя ю’’ по’’ ямбан маня’’ яханана этно-культурный центрава таня, таняна манзарана’’ нина’’ хуркари’’ тенз’ ненэцие’’ ӈобт’ ма’’ламби’’. Тарця центрана нэвахана мэнанэ пудана’’ сян’ по’’ ямбан Валентина Сергеевна Зганич тара. Этно-культурный центрхана хуркари’’ тенз” ненэця’’ ӈобкана манзара’’: луца’’, нянэй ненэця’’, ӈысма’’, устьцилём’’ харто’ фольклорный коллективдо’ таня. Ӈысми’’ отдел’ манзаям’ нерня минренаӈэ’ Ольга Михайловна Кацюбанская манзара. Сертабада манзаяда тянё ни’’ӈа’’. Пыдо’ харто’ сёдо’ мэ’’манзь ма’’люрцеты’’, тикахад’ харто’ хуркари’’ ӈарка ялудо’ хамадабсеты’’. Теда ӈысми’’ отделкана манзарана’’ хибяри’’ хэбидя ялямдо’ хамадаби’’. Тарця ялудо’ хор’’ ирийхана Няръяна маркана ваераӈгу’’. ӈысма’’ нина’’ культура тарця ӈарка яля’ Няръяна маркана хор’’ ирий няхарамдэй толыркана манзаямда нэӈгуда. Тюку по’ округханана « Визула ю» нюбета яля’’ маттадамдэймэвна ваераӈгу’’.

Ольга Кацюбанская вадавна: – Тарця ӈарка яля’’яханана хусувэй сидя по’’ ваерась танесеты’’. Округханана танеда’’ ӈысма’’ коллектив’’ ма’’ламбива’’,нядабина’’, тикахад’ ӈысма’’ культурам’ ӈани’’ тенз’ мэта’’ хибярихи’ манэ’’лабтамбива’’. Тарця яляха’ хусувэй коллектив’ яӈга хамякосьты, едэй ембдяртамдо’ сэдбасьты, таслабсетыдо’: ӈамгэм манэ’’лабтабаӈгу’’. Небой по’ваеравы ӈарка яляхана ӈысма ембдяр’’ нямна лаханаваць, невхы мэ’’мы’’ ембдяр’’ ӈэсыхыт’ товы’’хибяри’’ тэвраць. Тарця ембдяр’’ тэвравы’’ хибярина тадтамбинаць, тикы’ пуд альбом’ сертаваць.

Тюку по’ ӈысма’’ сянакова нямна лаханаӈгува’’. Хурка сянаковахана ӈысма’’сянакуць, хурка сянакова таня – мал’’тикым’ манэ’’тава’’.Ӈэсыхыт’ товы’’ нина’’харто’ ӈэсынандо’ илена’’ ӈармбэй хибяридо’ сянакова нямна хонрабнандо’ тарась, тарця сянаковам’ товы’’нина’’ сцена’ниня хибярихи’ манэ’’лабтаӈгудо’. Тюку по’ сянаковам’ манэ’’лабтабада’’ нина’’ поӈгнандо’ пирдырта’’.

«Визула ю» ӈарка яляхана мэкад ӈэвась мэнарха. Тюку’мэвахана ӈысма’’ коллектив’’ Харута, Хорей Вер, Каратайка, Несь, Волоковой, Нижней Пёша, Оксино, Кмменка, Хонгурей ӈэсыхыт’ товась ятна’’. Маня’’округна’ хавна тамна мядондина’’ танеӈгу’’, хуний Ӈысми республикахад’ тута’’, «Шондiбан» нюбета ансамбль’ Коми-Пермяцкий округхад’ тута.

Ханярид’ товы’’ хибяри’’сян яля’’ ямбан ӈобкана манзараӈгу’’. Хыно’’та’’, сянакода’’, нерня манзарава’’нямна лахарёдо’ мэта’’. Ӈысма’’ нина’’ няхар’’ яля’’ямбан яханана манзараӈгу’’. Нюртей яляхана этно-культурный центрхана выставкам’нэӈгу’’, ханяна ӈысма’’ ембдяр’’, ӈани’’ӈавори’’ манэ’’лабтабаӈгу’’. Тикахад’ коллективна’’ хор’’ ирий няхарамдэй толыркана Красноян’ ӈэдалаӈгуд, нябю яляхана Оксинон’ тэворта’’. Тикахад’ Ненэцие’’ агроэкономической техникумхана, социально-гуманитарной колледжхана концертадо’ танеӈгу’’.

Ӈарка концерт’ хор’’ирина самлязимдей’ толыркана КДЦ-мякана ваераӈгу. Таняюв товы’’ хибяри’’ сянакода’’, викторина танеӈгу, нысма’’ ӈухуком’ мастер-классхана сертабаӈгу’’. Ӈысми’’ил’нямна кином’ манэ’’лабтаӈгу’’.

Хусувэй маркана илена’’, мядондина’’ тарця яляха’ тобнандо’сава, мэкад’ ӈэӈгу.